Sejse metstli tlauel tiyolpakij pampa tijnekij tijkakisej tlamachtili uan videos tlen tlauel techyolchikaua ipan JW Broadcasting. Maske sejse metstli kisa nopa tlamachtili, miakej toikniuaj amo uelij kiitaj ipan Internet. ¿Kenke amo?

 Pampa ipan miak altepemej tlen África amo onka Internet. Uan kampa kena onka Internet, tlauel patiyo titlaxtlauas o amo kuali kiitskia. Se tonali ipan Madagascar, se toikni katli tepaxaloua chijchikuasej metstli kikixtik ipan se cibercafé nopa tlamachtili tlen JW Broadcasting uan monejki tlaxtlauas 16 dólares. a Tlen kiixtlajki kipano tlen kitlanij miakej maseualmej ipan se semana.

 Maske kiampa pano, tlauel miakej maseualmej ipan África uelij kiitaj JW Broadcasting uan amo moneki kitekiuisej Internet. ¿Kenke uelij kiampa kichiuaj?

 Ipan xiuitl 2017, katli itstokej ipan África subsahariana pejkej kiitaj JW Broadcasting ipan se canal tlen mopanoltia ipan televisión. Mojmostla kipanoltiaj ni canal ipan 16 tlajtoli, uan amo moneki tlaxtlauasej.

 Kiampa uelij kichiuaj pampa Jehová itlajtoltemakauaj kiixtlauaj nopa canal tlen kitekiuiaj uan kiampa mopanoltia tlamachtili ika satélite. Ipan 35 altepemej tlen África subsahariana uelij kiitaj nopa tlamachtili, uan sejse metstli moixtlaua kipano 12,000 dólares. Kemantika kema kipanoltiaj sekinok tlamachtili tikixtlauaj seyok canal. Nopa kichiua miakej maseualmej ma kiitakaj uejueyi tlanechikolistli tlen eyi tonali uan nojkia ma kiitakaj nopa tlamachtili tlen kipanoltia se toikni katli kititlanij ma kipaxalo kali Betel.

 Miakej Jehová itlajtoltemakauaj kitlachiliaj ni canal uan nojkia sekinok katli amo elij Jehová itlajtoltemakauaj. Maske kiampa kichijtokej, miakej toikniuaj amo kipiaj tomij, yeka amo uelij kikouaj tlen ika kitlachilisej. Yeka, ipan se 3,670 kali kampa timosentiliaj, kitlalijtokej se tlamantli tlen kiitskia señal tlen satélite. Kiampa toikniuaj uelij kiitaj nopaya tlamachtili tlen JW Broadcasting. Tlaj ipan nopa kali kampa timosentiliaj ya eltok se televisión o se proyector, uajka toikniuaj san kiixtlauaj se 70 dólares. Uan tlaj amo eltok, uajka kiixtlauaj se 530 dólares.

 Toikniuaj tlauel yolpakij pampa uelij kiitaj ni canal. Se toikni ueuejtlakatl kiijtoua: “Nochampoyouaj uan na, tikitaj ni kej nopa maná tlen uetsiyaya ipan uaktok tlali”. Odebode, se toikni katli eua Nigeria, kiijtoua: “Nochampoyouaj uan na timosentiliaj expa ipan se semana uan tijtlachiliaj nopa canal JW. Kema nechka tijtlachilisej, nokoneuaj tlauel yolpakij. Nojkia inijuantij techiljuiaj kinekij kiitasej nopa canal JW ipan sekinok tonali”. Rose, katli nojkia eua Nigeria kiijtoua: “¡Tlauel niyolpaki! Maske achtouia tlauel nechpaktiyaya nijtlachilis noticias, nama nechpaktia nijtlachilis canal JW”. Kema nijtlachiliyaya noticias tlauel nikualaniyaya uan nikuaixpoyauiyaya. Uan kema nijtlachilia canal JW nechpaleuia ma niyolpaki uan amo ma nimotekipacho. ¡Tlauel nechpaktia nopa canal! Nelia eli se tlateochiualistli tlen Jehová techmakatok.

 Se toikni katli tepaxaloua chijchikuasej metstli ipan Mozambique, kiijtoua kikualchijchijtokej se keski kali kampa timosentiliaj, kiampa ueli kiitskia nopa señal tlen satélite uan uelij kitlachiliaj nopa canal JW. Toikniuaj asij kampa timosentiliaj se hora kema ayamo peua tlanechikoli, kiampa uelij kiitaj JW Broadcasting.

 Ipan 2019, ipan ueyi tlanechikolistli kampa yauij tlen miak altepemej ipan Johannesburgo (Sudáfrica), kitekiuijkej nop canal JW uan kiampa kipanoltijkej ipan seyok chiknaui altepemej nopa tlamachtili tlen kiixtonkej katli kinyakanaj Jehová itlajtoltemakauaj. Sphumelele, katli tlatekipanoua ipan Broadcasting ipan kali Betel tlen Sudáfrica kiijtoua: “Achtouia tijtekiuiyayaj Internet kema tijpanoltiyayaj se tlamachtili. Yeka monekiyaya tijpiasej kuali Internet uan tijkouasej datos. Kema pejkej tijpanoltiaj tlamachtili ipan canal JW tlen kitilana ika satélite amo patiyo eliyaya uan kuali nesiyaya”.

 Ika nopa tomij tlen intemakaj, toikniuaj tlen África uelij kiitaj JW Broadcasting ika satélite. Nelnelia tlauel tiinmechtlaskamatiliaj pampa intemakaj inmotomij tlen motekiuia ipan toTeotsij itlanechikol uan nojkia inkichiuaj kej nesi ipan donate.pr2711.com.