Ipan se keski xiuitl tlen panotok, ipan se keski altepemej momiktiaj tlauel miakej piltelpokatsitsij. ¿Kenke kiampa pano? ¿Uelis mokone nojkia kiampa moiljuijtok kichiuas? a

Ipan ni tlamachtili tikitasej:

•  Ipan ni tonali miakej konemej uan piltelpokatsitsij momiktiaj

•  ¿Kenijkatsa uelis tijmatis tlaj mokone kineki momiktis?

•  ¿Tlake uelis tijchiuas tlaj mokone moiljuijtok momiktis?

 Ipan 2009 hasta 2019, miakej piltelpokatsitsij katli momachtiaj secundaria ipan Estados Unidos, momiakilijkej se 40% katli tlauel mokuesouaj. Uan tlauel miakej momiktijkej. b Uan ipan 2021, nopa Unicef kiijtok “kipano 10 piltelpokatsitsij momiktiaj mojmostla ipan América Latina uan Caribe”.

 “Amo tijmatij kenke ipan ni tonali piltelpokatsitsij kiixnamikij miak kuesoli [...]. Uan nopa kichijtok amo kuali ma kiyolmatikaj” (Vivek Murthy, katli tlayakana ipan Salud Pública tlen Estados Unidos).

 Texto tlen mitspaleuis: “Kema se tlakatl moyolkuesoua kitlamiltia ichikaualis keja se kokolistli tlen kiuatsa iomiyo” (Proverbios 17:22).

 Xijnankili ni tlajtlanili:

•   ¿Kipanotok ni tlamantli? ¿Kiixnamiktok se tlamantli tlen ouij? ¿Kiiyokakauaj, kikajki katli kiixtokayaya, amo kuali kiski tlen kinekiyaya kichiuas o mijki se katli tlauel kiikneliyaya? Tlaj kena, ¿nopa tlamantli kichijtok tlauel ma mokueso?

•   ¿Kipatlatok kej monejnemiltia? ¿Mouejkatlalijtok tlen iuampoyouaj uan ifamilia, o ayokmo kichiua se keski tlamantli tlen kipaktiyaya? ¿Temakatok se keski tlamantli tlen achtouia tlauel kipatiitayaya?

•   ¿Tlen tlake tlamantli kamanalti? ¿Kiijtoua o moiljuia ni tlamantli: “Más kuali tlaj ayokmo niitstoskia”? ¿Kiijtojtok ayokmo kineki inmechouijmakas?

   Kemantika uelis san nima kiijtos se tlamantli (Job 6:3). Uelis kiampa kichiuas pampa kineki ma kipaleuikaj. Yeka, moneki kuali tijtlakakilis pampa tlen kiijtos uelis kinextis kineki momiktis.

 Tlaj mokone kena moiljuijtok momiktis. Uelis tijtlatsintokis: “¿Timoiljuijtok kema uan kenijkatsa tijchiuas?”. Ika tlen mitsnankilis tijmatis kenijkatsa tijpaleuis.

 “Kemantika titetajmej amo tijnekij tikintlatsintokisej kenijkatsa kiyolmatij tokoneuaj pampa tijmakasij tijkakisej tlen kiijtosej. Pero tlaj kiijtouaj tlen kiyolmatij, tlauel techpaleuis” (Sandra).

 Texto tlen mitspaleuis: “Uejkatla ipan iyolo sejse tlakatl eltok nopa tlamantli tlen yajaya achi más kiita para ipati uan tlen yajaya kineki kichiuas, uan tlen tlalnamiki kimati kejatsa kipaleuis para tematiltis” (Proverbios 20:5).

•   Xijpia moyolo uan xijchiua kampeka ma kiijto tlen kiyolmati. Achtoui xijtlaskamatili pampa kiijtok tlen kiyolmati. Uan teipa uelis tikiljuis: “Nijneki nijkuamachilis, xinechiljui tlen mitspano” o “¿uelis tinechiljuis kenijkatsa tijyolmati?”.

   Kuali xijtlakakili tlen mokone mitsiljuis. Amo ximoiljui amo ipati tlen kiijtoua yon nima xikiljui tlen moneki kichiuas.

   Texto tlen mitspaleuis: “Nimantsi xijtlakakilikaj kuali kema seyok inmechkamauia. Pero kema inkinkamauiaj sekinok, xikinkamauikaj ika yamaktsi, uan kema inkinekij inkualanisej, achtoui ximoiljuikaj intla kuali inkualanisej o axtle” (Santiago 1:19).

•   Xikita tlake uelis kipaleuis. Xijpaleui mokone ma kiita uan ma kiijkuilo ni tlamantli:

   Tlen peuas kinextis kineki momiktis. ¿Tlake tlamantli uelis kichiuas ma peua kineki momiktis?

   Tlen uelis kichiuas. ¿Tlake tlamantli kipaleuia ayokmo ma motetsopto uan ma moiljui ipan tlamantli tlen kuali?

   Katli uelis kipaleuisej. ¿Kimati ajkia inijuantij uelis kipaleuisej kema monekis? Uelis ta, se akajya katli iuaya kuali mouika, se tepajtijketl o kampa kinpaleuiaj maseualmej katli kinekij momiktisej.

   Texto tlen mitspaleuis: “Aki achtoui moiljuia ika miak cuidado kejatsa kichiuas se tlamantli kipantis para kisas kuali iteki” (Proverbios 21:5).

•   Nojua xijpaleui. Nojua xijpaleuijto mokone maske tikitas ya kuali kiyolmati.

   “Kema nokone nechiljuik ayokmo moiljuiyaya momiktis, nimoiljuik ya kuali itstoya. Nikita na amo nijmatiyaya tlen kipanoyaya, pampa uelis panos se tlamantli tlen uelis kichiuas sampa ma kineki momiktis” (Daniel).

   Xijpaleui mokone ma kikuamachili se tlamantli tlen tlauel ipati: amo nochipa timokuesojtos. Amochtli El Cerebro del Niño kiijtoua: “Eli kej kema uetsi atl. Nesiskia kejuak tiuiuitikej tlaj timokauaskiaj kampa tlauel uetsi atl uan tijnextiskia kejuak amo tixolonij. Uan nojkia tijnextiskiaj tiuiuitikej tlaj tikijtoskiaj ayokmo kema kisas tonati” (traducción de Isabel Ferrer Marrades).

•   Xijpaleui kuali ma kiyolmati: Xikiljui mokone tikiknelia uan uelis tijpaleuis kema monekis. Uelis tikiljuis: “Nijchiuas kampeka nimitspaleuis kuali xijyolmati”.

   Texto tlen mitspaleuis: “Se tlen tokualuampo temachtli techiknelia nochipa. Kema onka tlaouijkayotl techpaleuia keja eliskia se toikni” (Proverbios 17:27).