Miakej tetajmej amo kinkauiliaj ininkoneuaj ma kitekiuikaj redes sociales pampa moiljuiaj uelis kinpanos tlen amo kuali. Tlaj ta kena tikinkauilia mokoneuaj ma kitekiuikaj, ¿kenijkatsa uelis tikinnextilis kuali ma kitekiuikaj? ¿Kenijkatsa uelis tikinpaleuis achtoui ma moiljuikaj tlake kitlejkoltisej?

Ipan ni tlamachtili tikitasej:

•  Tlen achtoui moneki kichiuas mokone

•  Tlen kiyolmati mokone

•  ¿Kenijkatsa eli mokone kema kitekiuia redes sociales?

•  Tlen uelis inkipouasej sansejko

 Tlen moneki tijmatis: Uelis tijnextilis mokone amo tlauel ma uejkaua kitekiuijto redes sociales pampa uelis momatis uan nochipa kinekis kitekiuijtos.

 Texto tlen mitspaleuis: “Xijmatikaj kejatsa inkitlapejpenisej tlen nelia kuali” (Filipenses 1:10).

 Ximoiljui ni: ¿Mokone ayokmo kuali kochi, amo kichiua itarea o amo itstok ininuaya ichampoyouaj pampa tlauel kitekiuia redes sociales? Miakej ixtlamatinij kiijtouaj telpokamej moneki kochisej se nueve horas sejse youali. Uan katli tlauel kitlachiliaj redes sociales, uelis san kochij nechka siete horas.

 Tlen uelis tijchiuas: Xikiljui mokone tlake tlamantli achtoui kinamiki kichiuas uan kenke moneki amo tlauel kitekiuis redes sociales. Nojkia xikiljui tlake tlamantli amo moneki kichiuas, kej amo ma kitekiui iteléfono kema ya kochis. Xijpaleui amo ma kichiua san tlen ya kineki, pampa nopa nojkia kipaleuis kema ya motlantos (1 Corintios 9:25).

 Tlen moneki tijmatis: Kema mokone kiita ipan redes sociales se tlaixkopinkayotl tlen kikualchijchijtokej uan videos kampa nesi iuampoyouaj tlauel moyolpakiltiaj, uelis kichiuas ma moiljui itstok iselti, ma motekipacho o ma mokueso miak tonali.

 Texto tlen mitspaleuis: “Ayok xitekokolikaj” (1 Pedro 2:1).

 Ximoiljui ni: Kema mokone kitekiuia redes sociales, ¿moyolkokoua pampa amo nesi kej sekinok? ¿Moiljuia sekinok tlauel moyolpakiltiaj uan ya amo?

 Tlen uelis tijchiuas: Xikiljui mokone kenke amo kuali tlaj nochipa san kitlachilijtos tlen sekinok kichiuaj. Xikilnamiki, nopa kichiua tlauel amo kuali ma kiyolmatikaj ichpokamej pampa inijuantij nochipa kinekij kuali nesisej uan kuali mouikasej ininuaya sekinok. Nojkia uelis tikiljuis motelpoka o moichpoka ayokmo ma kitekiui redes sociales se keski tonali. Se telpokatl katli itoka Jacob kiijtouaj: “Nikixpolok redes sociales se keski tonali. Nopa nechpaleuik ma nijpatla kej nimoita uan kej nikinita sekinok, uan nojkia nechpaleuik ma nikita tlake monekiyaya nikachtouitlalis”.

 Tlen moneki tijmatis: Kiijtouaj kema se akajya kipia redes sociales kinnextilia nochi maseualmej kenijkatsa eli inemilis, uan pampa nochi uelij kiitaj tlen kichiua, uelis mokualanis ininuaya o moiljuisej tlen amo nelia.

 Texto tlen mitspaleuis: “Ayok ximoyolkuitlamakakaj, ayok ximochiuakaj inyolkentsitsij, ayok xikualanikaj, ayok xikualankatlauejchiuakaj, ayok xitetlaijiljuikaj [...]. Más kuali ximochiuilikaj tlen kuali se ika seyok” (Efesios 4:31, 32).

 Ximoiljui ni: ¿Kichijtok redes sociales ma kiijilnamikikaj mokone, o ya ma teijilnamiki, ma mokualani ininuaya sekinok o ma kiijkuilo tlen amo kinamiki?

 Tlen uelis tijchiuas: Xikiljui mokone kenijkatsa uelis kinextis tlatlepanita kema kitekiuis redes sociales. Nopa amochtli Niños conectados, (tlen Martin Kutscher uan kitlajtolkuepki José Pérez Escobar) kiijtoua: “Tetajmej moneki kinmachtisej ininkoneuaj amo ma kinpinajtikaj sekinok kema kitekiuiaj redes sociales yon kema itstokej ininuaya”.

 Xikilnamiki, amo nochipa moneki tijtekiuijtosej redes sociales. Uan amo nochi tetajmej kinkauiliaj ininkoneuaj ma kitekiuikaj. Tlaj ta kena tijkauilia mokone ma kitekiui, achtoui moneki tikitas tlaj amo tlauel uejkauas kitekiuijtos, tlaj kinpias kuali iuampoyouaj uan tlaj amo kiitas tlen amo kinamiki.