Ipan ni tlamachtili tikitasej ni tlamantli:

•  ¿Kenke kema tikamanalti ininuaya sekinok moneki tikinixtlachilis?

•  ¿Kenijkatsa uelis tijpeualtis tikamanaltis?

•  Tlen kiijtouaj sekinok telpokamej

 Sekij maseualmej kiitaj ouij kamanaltisej iuaya se akajya kema kiixtlachiliaj pampa amo kimatij tlake kiijtosej, yeka kiitaj más amo ouij kititlanisej mensajes ika programas tlen onka ipan Internet.

 “Tijmatis más ouij tikamanaltis iuaya se akajya kema tikixtlachilis pampa amo uelis tikijkuilos uan tikixpolos tlen tikijtoua” (Anna).

 “Tijtitlanis se mensaje eli kejuak se programa tlen ya eltok, uan tikamanaltis iuaya se akajya eli kejuak se programa tlen nama panotok. Nochipa nimoiljuia: ‘Tlaj amo nikijtos se tlamantli tlen amo kinamiki’” (Jean).

 Amo tijmati kema, pero uelis teipa monekis tijyekos tikixtlachilis katli iuaya tikamanalti. Tlauel moneki kiampa tijchiuas pampa kiampa uelis timouampojchiuas ininuaya sekinok, uelis tijpantis se tekitl uan uelis tijnojnotsas se akajya katli tikixtoka uan tijneki ma eli monovio o monovia.

 Amo tlauel ouij tijyekos tikixtlachilis se akajya kema tikamanaltis iuaya. Uelis tijyekos kiampa tijchiuas, maske achi tipinaua.

 “Kemantika tikijtos se tlamantli tlen amo kinamiki uan tipinauas, nochi kiampa techpano kemantika. Pero moneki tiuetskasej kema timokuapolouaj” (Neal).

•   Xitlatsintoka. Ximoiljui tlake tlamantli maseualmej kinekiskiaj kimatisej uan xijtekiui kema tijpeualtis tikamanaltis ininuaya. Nika eltok se keski tlajtlanili:

   “¿Tijkaktok ni uikatl?”.

   “¿Tlake videojuego mitspaktia?”.

   “¿Tijmauisok kema mauiltijkej?”.

   Tlaj tijneki ma mitsiljui sekinok tlamantli, achtoui ximoiljui tlake tlamantli nojkia kichiua o kipaktia kej ta. Uelis ya nojkia momachtia ipan nopa escuela kampa ta timomachtia o uelis nojkia tekiti nechkatsi kampa ta titekiti. ¿Uelis tikamanaltis tlen nopa tlamantli?

   “Ximoiljui tlake tlamantli mitspaktiskia ma mitsiljui uan xijtlatsintoki” (Maritza).

   Amo xijchiua ni: Amo xijchiua miak tlatsintokili. Nojkia amo xitlatsintoka tlen amo kinekis mitsnankilis pampa uelis pinaua. Pampa tlaj tijtlatsintokia “¿Tlake tlamantli tlauel tijmakasi?” o “¿Kenke nochipa tijtekiuia moyoyo azultik?”, uelis kichiuas nopa maseuali amo kuali kiyolmatis, uan uelis kichiuas ma moiljui san tijtlachilijtinemij kej moyoyontia.

   Tlaj achtoui o teipa tikiljuia tlen ta timoiljuia tlen tijtlatsintokia, amo nesis san tijneki tijtlatsintokijtos. Xikilnamiki: amo san tijneki tijtlatsintokilis, ta tijneki tikamanaltis iuaya.

   Texto tlen mitspaleuis: “Uejkatla ipan iyolo sejse tlakatl eltok nopa tlamantli tlen yajaya achi más kiita para ipati uan tlen yajaya kineki kichiuas, uan tlen tlalnamiki kimati kejatsa kipaleuis” (Proverbios 20:5).

•   Kuali xitetlakakili. Tlaj tijneki kuali tikamanaltis iuaya se maseuali moneki achtoui kuali xijtlakakili, ya nopa eli tlen más ipati. Tlaj kiampa tijchiuas tlauel mitspaleuis.

   “Nimosentlalia nijyekos se tlamantli tlen yankuik kema nikamanalti iuaya se akajya. Teipa nikilnamiki tlen nechiljuik uan nimoiljuia tlake nijtlatsintokis kema sampa nikamanaltis iuaya” (Tamara).

   Amo xijchiua ni: Amo ximotekipacho tlen tikiljuis teipa. Tlaj kuali tijtlakakilia, tijmatis tlake tlamantli nojua uelis tikamanaltis iuaya.

   Texto tlen mitspaleuis: “Nimantsi xijtlakakilikaj kuali kema seyok inmechkamanaljuia. Pero kema inkinkamanaljuiaj sekinok, xikinkamauikaj ika yamaktsi (Santiago 1:19).

•   Xijnexti mitstekipachoua tlen kinpano sekinok. Tlauel mitspaktis tikinkamanaljuis sekinok tlaj nelia mitstekipachoua tlen kinpano.

   “Kema se maseuali kiita nelia kuali tijtlakakilia tlen kiijtoua, kuali iuaya tikamanaltis, maske kemantika timokuapolos kema tikamanaltis iuaya” (Marie).

   Amo xijchiua ni: Amo xijtlatsintoki tlen kichiuas amo kuali ma kiyolmati. Tlaj tikiljuia “¡nechpaktia mozapatos! ¿Keski ipati tijkojki?”, uelis ni tlamantli ayokmo kinamiki tijtlatsintokilis.

   Texto tlen mitspaleuis: “Ximotekipachojtokaj ika sekinok uan amo san ximoiljuijtokaj ipan tlen inmojuantij inmechpaleuis” (Filipenses 2:4).

 ¿Kenijkatsa tijtlamiltis tikamanaltis iuaya se akajya? Se telpokatl katli itoka Jordan kiijtoua tlen uelis tijchiuas: “Kema tijtlamiltis tikamanaltis xikijto se tlamantli tlen kipaktis nopa maseuali”. Nojkia kiijtoua: “Uelis tikiljuis ‘Niyolpajki pampa mouaya nikamanaltik’, nojkia uelis tikiljuis ‘teipa timoitasej, ¡xia ika kuali!’, tlaj kiampa tijchiua uelis teipa amo ouij tijmatis sampa tikamanaltis iuaya”.