ToTeotsij kichijchijki nopa achtoui tlakatl uan nopa achtoui siuatl, uan teipa kichijki ma mosenkauakaj. ToTeotsij kichijki ma monamikti se siuatl iuaya se tlakatl, kiampa moikneliskiaj, yolpakiskiaj uan kinpiaskiaj ininkoneuaj (Génesis 1:27, 28; 2:18).

 ToTeotsij kineki ma yolpaktokaj katli mosenkajtokej (Proverbios 5:18). Yeka, ipan iTlajtol kinmaka tlanauatili tlen kinpaleuis kuali ma itstokaj.

Ipan ni tlamachtili tikitasej:

•  ¿Tlake tlanauatili kinmaka toTeotsij katli mosenkajtokej?

•  ¿Kenijkatsa kiita toTeotsij kema mokauaj o kema kiixpolouaj nopa amatl kampa nesi mosenkajtokej?

•  ¿Moneki mosenkauasej ininixpa tlanauatianij?

•  ¿Tlake kiijtoua Biblia moneki kichiuas se tlakatl uan se siuatl katli mosenkajtokej?

•  ¿Kinchiualtia toTeotsij ma kinpiakaj ininkoneuaj katli mosenkajtokej?

•  ¿Kinpaleuia Biblia katli mosenkajtokej?

•  Se keski textos tlen kinpaleuis katli mosenkajtokej

 ToTeotsij kineki nochipa ma itstokaj sansejko se tlakatl uan se siuatl katli mosenkajtokej (Génesis 2:24). Ya amo kineki se tlakatl ma kinpia miakej isiuajuaj, ma mosenkauakaj se tlakatl iuaya seyok tlakatl o se siuatl iuaya seyok siuatl o ma itstokaj sansejko katli amo moamasenkajtokej (1 Corintios 6:9; 1 Tesalonicenses 4:3). Jesús kinmachtik itokilijkauaj ma kitlepanitakaj nopa tlanauatili tlen toTeotsij kinmaka katli mosenkajtokej (Marcos 10:6-8).

 ToTeotsij kineki katli mosenkajtokej nochipa ma itstokaj sansejko. Kema se tlakatl uan se siuatl mosenkauaj, kiijtouaj amo kema mokauasej uan nochipa itstosej sansejko. ToTeotsij kineki ma kichiuakaj tlen kiijtojkej (Marcos 10:9).

 Kemantika uelis nopa tlakatl uan nopa siuatl amo itstosej sansejko se keski tonali, pampa se tlen ininchampoyouaj uelis kipanok se tlaouijkayotl. Maske katli mosenkajtokej kipiaj kuesoli, Biblia amo kiijtoua ma mokauakaj. Nopaya kiniljuia ma kichiuakaj kampeka moyoltlalisej (1 Corintios 7:10).

 Biblia kiijtoua kena uelis kiixpolosej nopa amatl kampa nesi mosenkajtokej tlaj se tlen inijuantij momekatia (Mateo 19:9). Yeka, tlaj katli mosenkajtokej kinekij mokauasej o kiixpolosej nopa amatl kampa nesi mosenkajtokej san pampa kipiaj sekinok kuesoli, amo uelis sampa monamiktisej o mosiuajtisej (Mateo 5:32; 1 Corintios 7:11).

 Cristo itokilijkauaj moneki kineltokasej kema tekichiuanij kiijtouaj moneki moamasenkauasej katli itstokej sansejko (Tito 3:1). Nochi katli kinekij mosenkauasej moneki kichiuasej ininixpa tlanauatianij. Kema kiampa kichiuaj, kinextiaj kintlepanitaj tlanauatianij. Uan nojkia kinextiaj kimatij moneki nochipa itstosej sansejko kej toTeotsij kiijtoua. a

•   Tlen moneki kichiuasej. Katli mosenkajtokej moneki motlepanitasej uan moiknelisej (Efesios 5:33). Moneki kema motekasej sansejko, kichiuasej ika tlaiknelili uan moneki amo mokajkayauasej (1 Corintios 7:3; Hebreos 13:4). Tlaj kinpiaj ininkoneuaj, moneki mopaleuisej uan kuali kiniskaltisej (Proverbios 6:20).

   Maske Biblia amo kiijtoua kenijkatsa moneki tekitisej o kenijkatsa kichiuasej tlen moneki ininchaj, sansejko moneki kitlapejpenisej tlen kinpaleuis kuali ma itstokaj.

•   Tlen moneki kichiuas se tlakatl. Biblia kiijtoua “se tlakatl kipia tlanauatili ika isiua” (Efesios 5:23). Ni kiijtosneki moneki kinyakanas ichampoyouaj uan kitlapejpenis tlen kinpaleuis isiua uan ikoneuaj.

   Moneki kinmakas ichampoyouaj tlen ika mopanoltisej, kinyolchikauas uan kinpaleuis kuali ma tlaneltokakaj (1 Timoteo 5:8). Tlaj kema kitlapejpenia se tlamantli, mopaleuia iuaya isiua uan kuali kitlakakilia kema kiijtoua tlen moiljuia uan tlen kiyolmati, kinextia kipatiita nopa kuajkuali tlamantli tlen kipia isiua uan tlen kichiua (Proverbios 31:11, 28). Biblia kiijtoua se tlakatl moneki kinyakanas ichampoyouaj ika tlaiknelili (Colosenses 3:19).

•   Tlen moneki kichiuas se siuatl. Biblia kiijtoua “se siuatl moneki kitlepanitas iueue” (Efesios 5:33). ToTeotsij tlauel kipaktia kema siuamej kitlepanitaj nopa tlanauatili tlen toTeotsij kinmakatok tlakamej.

   Se siuatl moneki kipaleuis iueue kema kitlapejpenia tlen kichiuas, uan kitlepanitas pampa ya kiyakana ichampoyouaj (Génesis 2:18). Biblia kiijtoua tlauel kuali kema siuamej kichiuaj tlen Jehová kinnauatia ma kichiuakaj (Proverbios 31:10).

 Amo. Maske uejkajkia toTeotsij kena kiniljuik se keskij maseualmej ma kinpiakaj ininkoneuaj, ipan ni tonali amo moneki kiampa tijchiuasej (Génesis 1:28; 9:1). Jesús amo kiniljuik itokilijkauaj ma kinpiakaj ininkoneuaj, yon itokilijkauaj kiniljuijkej katli monamiktijtoyaj o mosiuajtijtoyaj ma kinpiakaj ininkoneuaj. Sejse Cristo itokilijka moneki kitlapejpenis tlaj kinpias ikoneuaj o amo.

 Kena, pampa Biblia kipia tlamachtili uan kintlajtolmaka katli namanok mosenkajtokej, nojkia kinpaleuia amo ma kipiakaj miak kuesoli uan ma kimatikaj kenijkatsa kiixnamikisej tlaouijkayotl.

 Biblia uelis kinpaleuis katli mosenkajtokej ipan ni tlamantli:

•   Xijnextikaj tlauel inmoikneliaj (1 Corintios 13:4-7; Colosenses 3:14).

•   Kema amo inmechpaktia sanse tlamantli (1 Corintios 10:24).

•   Kuali inmotlakakilisej (Santiago 1:19).

•   Inmotlepanitasej (Romanos 12:10).

•   Inmotlapojpoljuisej (1 Pedro 4:8).

•   Amo inmokauasej (Marcos 10:9).

•   Inkipiasej inmoyolo (Efesios 4:2, 3).

•   Sansejko intekitisej (Eclesiastés 4:9).

•   Inkichiuasej kampeka nojua tlauel inmoiknelisej (El Cantar de los Cantares 8:7).