Biblia kamanalti tlen tatuajes san sempatsi ipan Levítico 19:28, nopaya kiijtoua: “Amo xikixkopinakaj tlaixkopinkayomej ipan inmotlakayo ika tinta”. ToTeotsij kinnauatik israeleuanij ni tlamantli pampa amo kinekiyaya ma kichiuakaj kej sekinok maseualmej katli kiixkopinayayaj ipan inintlakayo inintoka o ininixkopinka ininteotsitsij (Deuteronomio 14:2). Maske Cristo itokilijkauaj ayokmo timoyakanaj ika nopa Tlanauatili tlen toTeotsij kinmakak israeleuanij, tlauel techpaleuis tlaj tikitasej kenke toTeotsij kiijtok nopa tlanauatili.

¿Kinamiki mochiuilis tatuajes se Cristo itokilijka?

 Ma tikitakaj se keski textos tlen uala ipan Biblia tlen techpaleuis ma tijmatikaj.

•   “Siuamej ma moyoyontikaj uan moyektlalisej keja kinamiki para sekinok ma kintlepanitakaj” (1 Timoteo 2:9). Ni tlamantli nojkia kinamiki kichiuasej tlakamej. Se Cristo itokilijka moneki amo kichiuas sekinok amo kuali ma kiitakaj uan amo kuali ma kiyolmatikaj kema kiitasej.

•   Sekij mochiuiliaj tatuajes pampa kinekij kinextisej amo aka kinnauatia, pampa kiampa kichiuaj ipan ininaltepe o pampa moiljuiaj uelis kichiuasej san tlen kinekisej ika inintlakayo. Maske kiampa moiljuiaj, Biblia kiijtoua: “Ximotemakakaj ika toTeko Dios [...]. Keja se tlakajkaualistli para ya, pero ma eli se tlakajkaualistli tlen yoltok uan tlen tlatsejtseloltik, pampa keja nopa kipaktia toTeko. Kena, ya nopa tlen kinamiki para inkichiuasej para inkiueyimatisej” (Romanos 12:1). Tlaj se akajya kuali kitekiuia itlalnamikilis, uelis kipaleuis ma moyoliljui kenke kineki mochiuilis se tatuaje. Se neskayotl, uelis se akajya kineki mochiuilis se tatuaje san pampa sekinok nojkia mochiuilijtokej o pampa kineki kinextis mouika ininuaya se keskij maseualmej. Tlaj kiampa mitspano, moneki timotlatsintokis: “¿Tlake nijchiuas tlaj teipa sekinok ayokmo kitekiuisej nopa tatuaje o tlaj ayokmo nijnekis nijpias?”. Tlaj se akajya kuali moiljuia kenke kineki mochiuilis se tatuaje, uelis kuali kitlapejpenis tlen kichiuas (Proverbios 4:7).

•   “Aki achtoui moiljuia ika miak cuidado kejatsa kichiuas se tlamantli kipantis para kisas kuali iteki uan yajaya moricojchiuas. Pero nopa tlakatl tlen momajkaua nimantsi uan kej ueli kichiuas se tekitl axkikualtilis uan yajaya mochiuas se teikneltsi” (Proverbios 21:5). Maseualmej miakpa sanima kitlapejpeniaj mochiuilisej se tatuaje. Uan kema kiampa kichiuaj ouijtij ipan se keski tlamantli pampa amo kinekij kintekimakasej uan sekinok amo kuali kinitaj. Nojkia, kema kinekij mokixtilisej nopa tatuaje, tlauel kuajkualo kimatij uan moneki kiixtlauasej tlauel miak tomij. Ixtlamatinij kiitstokej miakej maseualmej kinekij kiampa kichiuasej, uan nopa nelia pampa katli kikixtiaj tatuajes kitlanij tlauel miak tomij.