Nopa tlajtoli kuali samariaejketl kiixnextia se akajya katli kinpaleuia maseualmej tlen kinmonekilia se tlamantli. Ni tlajtoli mokixtia ipan se tlapoualistli tlen Jesús kiijtok, kampa tlamachtik se kuali maseuali kiniknelia uan kinpaleuia sekinok maske amo sanse elij.

Ipan ni tlamachtili tikitasej:

•  ¿Tlake kiixtoma nopa tlapoualistli tlen nopa kuali samariaejketl?

•  ¿Kenke Jesús kiijtok ni tlapoualistli?

•  ¿Tlake techmachtia?

•  ¿Ajkia eliyayaj samariaeuanij?

•  ¿Nelia panok nopa tlapoualistli tlen nopa kuali samariaejketl?

Nopa tlapoualistli tlen Jesús kiniljuik kiijtoua: Se judío temoyaya tlen Jerusalén uan yauiyaya Jericó uajka kitlachtekilijkej kimakilijkej uan nechka kimiktiaj.

Kema se sacerdote judío panok nopaya uan kiitak nopa tlakatl katli tlauel kikokojtoyaj amo kipaleuik, teipa nojkia panok se levita uan nojkia amo kipaleuik. Maske ni omej nojkia eliyayaj judíos amo kipaleuijkej.

Teipa panok se tlakatl katli amo eliyaya judío. Eliyaya se samariaejketl (Lucas 10:33;17:16-18). Kema kiitak nopa tlakatl katli kikokojtoyaj nopa samariaejketl kitlasojtlak, kipajtilik kampa kikokojtoyaj uan teipa kiuikak kampa kochij paxalouanij uan kimokuitlauik. Ualmostla kema kitlaxtlaui nopa tlakatl katli kintlanejtia kampa kochij paxalouanij kiiljuik, ma kimokuitlaui nopa tlakatl katli kikokojtoyaj uan nojkia kiiljuik nojua ma kimokuitlaui uan ya kiixtlauaskia tlen monekiskia (Lucas 10:30-35).

Jesús kipouilik ni tlapoualistli se tlakatl katli san moiljuiyaya uelis kinpaleuis maseualmej katli euaj ipan ialtepe uan kipiaj sanse itlaneltokilis. Kipouilik pampa kinejki ma kikuamachili ni tlamantli: monekiyaya kimachilis uan kinpatiitas nochi maseualmej uan amo san katli eliyayaj judíos (Lucas 10:36, 37). Ni tlapoualistli moijkuilok ipan Biblia pampa kinpaleuia nochi katli kinekij kiyolpakiltisej toTeotsij (2 Timoteo 3:16, 17).

Ni tlapoualistli techmachtia se kuali maseuali kinextia tetlasojtla ika tlen kichiua. Ni maseuali kinpaleuia katli kinpano tlen amo kuali, maske amo momajtokej kichiuaj sanse tlamantli uan maske euaj ipan sekinok altepetl. Se kuali maseuali kinchiuilia sekinok tlen ya kipaktiskia ma kichiuilikaj (Mateo 7:12).

Nopa samariaeuanij mochantijtoyaj ika norte tlen Judea. Nopaya nojkia itstoyaj ininkoneuaj judíos katli mosenkajtoyaj ininuaya katli amo eliyayaj judíos.

Ipan achtoui siglo, kema ya ualajtoya Jesús, samariaeuanij ya kipixtoyaj ininreligión. Inijuantij san kitlepanitayayaj nopa makuili pilamochtsitsij tlen Escrituras Hebreas uan nopa sekinok amo kitlepanitayayaj.

Kema Jesús itstoya, judeaeuanij kinkualankaitayayaj samariaeuanij yeka, amo kinnojnotsayayaj (Juan 4:9). Uan se keski judíos kitekiuiyayaj nopa tlajtoli samariaeuanij san pampa kinekiyayaj tetlaijiljuisej (Juan 8:48).

Maske Biblia amo kiijtoua tlaj nelia panok tlen Jesús kiijtok tlen nopa kuali samariaejketl. Tlen kena tijmatij, kema Jesús tlamachtiyaya nochipa kitekiuiyaya se keski tlamantli tlen maseualmej kiixmatiyayaj kiampa kikuamachiliskiaj tlen kinekiyaya kinmachtis.

Miak tlamantli tlen kiijtoua ni tlapoualistli, kinextia tlen panoyaya ipan nopa tonali. Ma tikitakaj se keski tlamantli:

• Nopa ojtli tlen Jerusalén katli onasiyaya altepetl Jericó iuejkaka eliyaya kipano se 20 kilómetros (12 millas). Uan nopa ojtli eliyaya tlauel tlaixtemolis. Uajka, Jesús amo mokuapolok kema kiijtok “se tlakatl kiski altepetl Jerusalén uan temoyaya ipan nopa tlaixtemolis tlen asi altepetl Jericó” (Lucas 10:30).

• Nopa sacerdotes uan levitas katli mochantijtoyaj Jericó nopaya moojtiyayaj kema yauiyayaj Jerusalén.

• Pampa nopa ojtli tlauel tlatsitsikayaya, katli yauiyayaj ininselti ueliskia kintlachtekilisej pampa nopaya motlatiyayaj tlachtekinij.