Nochi tlen tijchiuaj tikixtlauaj ika tomij tlen Jehová itlajtoltemakauaj temakaj ika nochi ininyolo. a Katli kineki temakas tomij uelis kitlalis ipan pilkuakajontsitsij tlen eltok kampa timosentiliaj o nojkia uelis kiitas kenijkatsa temakas tomij ipan jw.org. Se akajya uelis kiijtos tlaj temakas tomij tlen ika tlapaleuis ipan toTeotsij itlanechikol, tlen motekiuis ipan kali kampa timosentiliaj o tlen motekiuis ipan ni ome tlamantli.

 Jehová itlajtoltemakauaj amo kiniljuiaj keski tomij moneki temakasej, amo kintlajtlaniaj diezmo yon kiniljuiaj ma temakakaj achi tomij tlen kitlanij (2 Corintios 9:7). Kampa timosentiliaj amo tlajtlanij tomij yon kininamaj katli kalakij. Katli tlayakanaj ipan tlanechikoli amo tlainamaj kema sekinok moatsonpoliuiltiaj, kema se akajya miki, kema mosenkauaj o kema kichiuaj sekinok tlamantli. Amo tijnamakaj tlakualistli yon sekinok tlamantli. Nojkia amo tijchiuaj ferias, rifas, amo timauiltiaj ika loteria yon tijchiuaj tlakualistli ika tlayoua pampa tijnekij tijtlanisej tomij, yon tikiniljuiaj maseualmej ma techmakakaj tomij. Uan amo kema tikijtouaj ajkia inijuantij temakaj tomij (Mateo 6:2-4). Nojkia, amatlajkuiloli tlen tijchiuaj uan kampa titlamachtiaj ipan Internet amo kiijtoua tlake tlamantli uelis tijkouas.

 Sejse metstli, kampa mosentiliaj Jehová itlajtoltemakauaj kiijtouaj keski tomij onka uan keski motekiuik, kiijtouaj nopa maske sekinok maseualmej nojkia tlakaktokej. Kema pano se keski metstli, kitekitlachiliaj katli kiajokui tomij tlen temakaj ipan tlanechikoli, kiampa kiitaj tlaj kuali motekiuijtok nopa tomij (2 Corintios 8:20, 21).

•   Pilkuakajontsitsij kampa uelis titemakas tomij: Uelis tijtlalis tomij o cheques ipan pilkuakajontsitsij tlen eltok ipan kali kampa timosentiliaj, ipan kali kampa mochiua uejueyi tlanechikolistli o ipan sekinok kali.

•   Uelis titemakas tomij ipan Internet: Ipan sekij altepemej uelis titemakas tomij kampa kiijtoua “Nitemakas tomij” ika tarjeta de crédito o débito, tlaj tijpia se cuenta uelis tijchiuas ma kititlani nopa tomij tlen tijneki titemakas o ika sekinok tlamantli. b Sekij Jehová itlajtoltemakauaj kiiyokatlaliaj tomij tlen kinekij temakasej, yeka ika se tlen nopa tlamantli tlen tikitakej, kichiuaj iselti ma kititlani tomij sejse metstli (1 Corintios 16:2).

•   Kema kuali timoiljuiaj kenijkatsa titemakasej tomij: Kemantika, kema tijnekij titemakasej se tlamantli, moneki kuali timoiljuisej uan tikiniljuisej tekichiuanij ma techpaleuikaj. Tlaj kiampa tijchiuasej, techpaleuis amo tlauel miak tikixtlauasej impuestos. Miakej tlauel kinpaleuijtok kema tlajtlanij kenijkatsa uelis temakasej se tlamantli kema nojua itstokej o kema mikisej. Tlaj tijneki titemakas se tlamantli uelis titlanojnotsas ipan kali Betel uan inijuantij mitspaleuisej tijmatis kenijkatsa tijchiuas ika se tlen ni tlamantli:

  •   cuentas bancarias

  •   seguros uan tomij tlen mitsmakasej kema ayokmo titekitis

  •   kali tlen tijpia tlen uelis kinamakasej

  •   acciones uan bonos

  •   tlen uelis titemakateuas kema timikis

 Tlaj tijneki titemakas tomij kampa ta tiitstok, xikita ipan jw.org kampa kiijtoua““Nitemakas tomij”.