Éxodo 11:1-10
11 Uan Jehová kiluij Moisés: “Oksepa niktatsakuiltiti tekiuaj akin taixyekana Egipto uan akin ompa nemij. Satepan, yejua namechkauas xikisakan. Tein melauj namechtokas.*
2 Axkan xikinilui nochin israelitas, takamej uan siuamej, maj kintajtanikan ininvecinos miak taman tachijchiuj ika plata uan oro”.
3 Jehová kichiuak maj akin nemiaj Egipto kuali kinitakan israelitas. Hasta Moisés semi kitakachiuayaj itech nochi Egipto, itakeualuan tekiuaj uan akin katkaj de Egipto.
4 Moisés kiluij tekiuaj: “Yejua nejin tein Jehová kijtoj: ‘Kemej tajkoyouan, nipanoti itech nochi Egipto.
5 Nochin konemej akin tayekanaj de Egipto mikiskej. Mikis iokichpil tekiuaj* uan hasta iokichpil siuat akin kitakuecholia iteko. No mikiskej nochin tapialmej tein achto yolkej.
6 Mokakis keniuj eliuis tayokolchokaj itech nochi Egipto, kemej amo keman mokaktoya uan amo kemanok mokakis.
7 Sayoj ke nion se itskuinti kinuajuis israelitas nion inintapialuan. Ijkon nankimatiskej ke Jehová kinpaleuia israelitas uan amo kinpaleuia akin kayomej Egiptoʼ.
8 Uan nochin motakeualuan nechitakiuij uan motankuaketsaskej noixpan uan kijtoskej: ‘Xikisa tejua uan nochin akin mitstakamatijʼ. Satepan, nikisas”. Keman Moisés kitamiijtoj nochi nejon, kikaujteuak tekiuaj uan semi kualantiajki.
9 Uan Jehová kiluij Moisés: “Tekiuaj amo namechkakis. Ijkon panos para okachi nikchiuas milagros itech nochi Egipto”.
10 Moisés uan Aarón kichiujkaj nochi milagros iixpan tekiuaj, sayoj ke Jehová kikauak maj tekiuaj amo takaki uan maj amo kinkaua israelitas maj kisakan de Egipto.
Tajtolmelaualismej
^ Oso “namecheualtis”.
^ Itech hebreo, “tekiuaj akin tokotsyetok itech iueyi silla”.
