Éxodo 15:1-27
15 Nejon tonal, Moisés uan israelitas peuak kicantarouiliaj Jehová ijkuin:
“Nicantarouiliti Jehová porin okachi moueyitalij.
Caballo uan akin yaya ipanko kitamotak itech mar.
2 Jah* nechchikaua uan nechpaleuia. Yejua nechmakixtia.
Yejua noDios uan nejua nikteixmatiltis. Yejua iDios nopaj, uan nejua nikueyitalis.
3 Jehová kemej se soldado akin semi chikauak. Yejua monotsa Jehová.
4 Kintamotak itech at icarros tekiuaj uan akin iuan yayaj,uan isoldados akin kuali tateuiayaj pankalakitoj itech mar Rojo.
5 At tein motatamotaya ininpan uetsik uan kemej se tet pankalakkej hasta taijtik.
6 Jehová, moyekmay semi chikauak.Jehová, moyekmay kintamia akin mitstauelitaj.
7 Kemej titelueyi, tikintamota akin mitsixnamikij.Mokualanyo kemej tit,* kintatia* kemej sakat tein uakik.
8 Keman tikpitsak at moajkoketsak;amo moolinij uan motsakuilij.At tein motatamotaya takuauayak tatajko den mar.
9 Akin techtauelita kijtoj: ‘¡Nikintokatias! ¡Nikinajsitiuj!
¡Nikinkuilis tein kipiaj uan nikuikas nochi tein niknekis!
¡Nikixtis nomachete tein ojkan tenej* uan nikinchiuilis tein niknekis!ʼ.
10 Tejua tikpitsak mar uan at kintoloj.Yejuan pankalakitoj kemej tepos itech at tein motatamotaya.
11 Jehová, amo moajsi nion se dios kemej tejua.
Tejua senkis tichipauak. Nion se dios kemej tejua.
Moneki se mitsmojkatokas, uan mitsnamiki maj mitsueyitalikan ika tatsotson. Tikchiua uejueyi taman tein se kimojkaita.
12 Tikmelauak moyekmay, uan tal kintoloj.
13 Tikinnextilij ke tikinteltasojta keman tikinixyekanak akin tikinmakixtij.Ika mochikaualis tikinuikas kampa tinemi, kampa tejua titaxeloj.
14 Nochin monekis kikakiskej nejin. Yejuan uiuiyokaskej.Akin nemij Filistea semi tajyouiskej.
15 Ijkuak, taixyekananij de Edom fiero mouiskej.Ueyichiuanimej de Moab uiuiyokaskej.
Nochin akin nemij Canaán amo yeskijok yolchikaujkej.
16 Mouiskej uan fiero mojkakalakiskej.
Kemej semi tichikauak amo mooliniskej kemej se tethasta maj panokan mokoneuan Jehová,hasta maj panokan akin tikinmakixtij.
17 NoDios Jehová, tejua tikinuikas para maj nemitij itech tepet tein moaxka,tein tejua tikijitak* para ompa tinemis,mochantsin tein tikmachijchiuak Jehová.
18 Jehová taixyekanas kemej tekiuaj nochipaya.
19 Keman icaballos tekiuaj, icarros uan akin yayaj itech caballos kalakkej itech mar,Jehová kichiuak maj at oksepa mosentili uan maj kintolo,sayoj ke israelitas kipanauijkej mar tatajkoyampa kampa tauaktoya”.
20 Uan Míriam kikuik se tambortsin* uan nochin siuamej kitojtokatiajkej* uan kitsilinijtiayaj tambortsitsin uan mijtotijtiayaj. Míriam katka iikniuj Aarón uan kitematiltiaya tein Dios kijtoua.
21 Míriam cantarojtiaya uan kinnankilijtiaya takamej ijkuin:
“Xicantarouilikan Jehová porin okachi moueyitalij.
Caballo uan akin yaya ipanko kitamotak itech mar”.
22 Satepan, keman israelitas yetoyajok itech mar Rojo, Moisés kinkuiteuak. Yajkej itech taluakyan kampa motanotsa Sur. Nejnenkej eyi tonal uan amo kiajsikej at.
23 Uan ajsitoj Mará,* sayoj ke amo uelik tayikej at tein ompa onkaya porin chichik katka. Yejua ika, ompa motanotsak Mará.
24 Uan peuak kijijtouaj Moisés. Kijtouayaj: “¿Toni titayitij?”.
25 Moisés kitataujtij Jehová maj kipaleui uan Jehová kinextilij se koujtsin. Keman Moisés kitamotak itech at, in at amo chichikok katka.
Ompa Dios kinmakak se tanauatil uan kinnextilij tein monekia kichiuaskej. Dios kinekia kimatis ox kitakamatiskiaj.
26 Kiniluij: “Komo kuali nanechtajtolkakij nejua namoDios Jehová, uan nankichiuaj tein nikita ke kuali yetok, uan komo kuali nankikakij tein namechnauatia uan nankichiuaj nochi tein nikixtalia, amo namechtitanilis nion se kokolis* tein nikintitanilij akin nemiaj Egipto; porin nejua Jehová, nikchiuas xipaktokan”.
27 Satepan ajsitoj Elim, kampa onkaya 12 ameyalmej* uan 70 palmajkoujmej. Uan ompaka kinkejketskej ininkaltsitsin.*
Tajtolmelaualismej
^ Jah se tokayit tein no ika moixmati Jehová.
^ Oso “tekol”.
^ Oso “kinchichinoua”.
^ Oso “noespada”.
^ Oso “tikixpejpenak”.
^ Oso “pandereta”.
^ Oso “kitoktilijkej”.
^ Tokayit tein kijtosneki ‘chichik’.
^ Oso “kokoxkayot”.
^ Oso “amelmej”.
^ Nejin kaltsitsin chijchiujtoyaj ika tasal (tilmaj).
