Éxodo 25:1-40
25 Uan Jehová kiluij Moisés:
2 “Xikinilui israelitas maj nechualkuilikan nochi tein kinekiskej nechmakaskej. Xikuikan tein kiualkuiskej nochin akin kinekiskej kitemakaskej ika nochi ininyolo.
3 Yejua nejin tein moneki nankikuiskej: oro, plata, cobre,
4 hilo azul, morado, chichiltik, lino tein tel kuali, chivojtsonti,
5 ipankuetaxyo ichkaueuet* tein chichiltikya, ipankuetaxyo foca uan acaciajkouit.
6 No xikuikan aceite para candilmej uan chokil tein ajuiyak tein monotsa bálsamo. Nejin ika kichijchiuaskej aceite para kixeloskej tein noaxka uan para kopal tein ajuiyak.
7 Uan no xikuikan tetsitsin tein moixmatij kemej ónice uan okseki tetsitsin para kitaliliskej koton tein kiluiaj efod* uan bolsita tein yas iyolixpan tiopixkat.
8 Yejuan moneki nechchijchiuiliskej se kaltsin kampa nechueyichiuaskej uan nejua ninemis iniuan.
9 Moneki nankichijchiuaskej nejin kaltsin uan nochi tein kipias, ijkon kemej nimitsnextiliti.
10 ”Moneki nankichijchiuaskej se tatiochiualkaxon* ika acaciajkouit. Maj kipia makuil cuarta* de ueyak, eyi cuarta* de patauak uan eyi cuarta de uejkapan.
11 Uan moneki tiktamitalilis oro tein okachi kuali taijtik uan tapani. Uan no, sentatenoj de ikuapan tatiochiualkaxon xikualtsintili ika oro.
12 Xikatili oro uan xikchijchiua naui rueditas, uan xiktalili ajkotsin de imetsuan tatiochiualkaxon: sekopa ome rueditas uan oksekopa no ome.
13 No moneki tikchijchiuas seki kouit tein ueueyak uan tiktamitalilis oro. Moneki yeski acaciajkouit.
14 Nejon koujmej moneki tikinkajkalakis itech rueditas tein kipias inajnakastan tatiochiualkaxon para kiuikaskej.
15 Nejon koujmej moneki nochipa aktoskej itech rueditas tein kipias tatiochiualkaxon. Amo xikixtilikan.
16 Uan taijtik den tatiochiualkaxon moneki tikalakis lajas tein nimitsmakati.
17 ”Uan no, moneki tikchijchiuas ipantsak tatiochiualkaxon ika oro tein okachi kuali. Maj kipia makuil cuarta de ueyak uan eyi cuarta de patauak.
18 Ika se martillo moneki tikchijchiuas ome querubines de oro. Tikintalis tajtatenoj de ipantsak,
19 se querubín yetos sekopa uan okse oksekopa.
20 Nejon querubines moneki kiajoktoskej ininajtapaluan uan ika kiyekauilijtoskej ipantsak tatiochiualkaxon. Moneki moixnamiktoskej uan ixpilkatoskej.
21 Tiktalilis ipantsak tatiochiualkaxon uan ompa tikalakis lajas tein nimitsmakati.
22 Ompa nimonextis uan nitajtos mouan desde ipantsak tatiochiualkaxon, kampa yetokej ome querubines. Desde ompa nimitsmatiltis nochi tein nikneki maj israelitas kichiuakan.
23 ”No moneki tikchijchiuas se mesa ika acaciajkouit, tein kipias naui cuarta de ueyak, ome cuarta de patauak uan eyi cuarta de uejkapan.
24 Moneki tiktamitalilis oro tein okachi kuali uan sentatenoj tikualtsintilis ika oro.
25 Tikyoualoltis se tablita tein patauak chikome centímetros,* uan sentatenoj de nejon tablita no tikualtsintilis ika oro.
26 Ika oro no tikchijchiuilis naui rueditas uan tiktalilis kampa pepechiujtoskej naui imetsuan mesa.
27 Nejon rueditas moneki tiktalis tanitsin* den tablita para ompa kinkajkalakiskej koujmej tein ika kiuikaskej mesa.
28 Nejon koujmej moneki tikchijchiuas ika acaciajkouit uan tiktamitalilis oro.
29 ”Uan no, tikchijchiuas platos, copas, uan seki komit uan uejueyi kaxit tein ika kipantekaskej vino itech altar para kimaktiliskej Dios. Moneki tikchijchiuas ika oro tein okachi kuali.
30 Uan itech mesa, nochipa tiktalis pantsin tein yetos noixpan.
31 ”Tikchijchiuas se tauilketsaloni ika oro tein okachi kuali. Ika se martillo moneki tikchijchiujtias uan tiktalilis tein ika moketsas. Tatajkoyampa ijkatos kemej se koujtsin uan kipias imauan, seki taman kemej xiujtsitsin,* bolitas* uan xochimej. Maj mosenkuito ika sayoj se ueyi cacho oro.
32 Tauilketsaloni kipias chikuasen imauan: sekopa kipias eyi uan oksekopa no eyi.
33 Sekopa, sejse imay kipias eyi taman tein tamati kemej ixochiyo almendro, eyi bolitas uan eyi xochit. Yas se almendrojxochit, se bolita uan se xochit uan ijkon motojtokatiaskej. Itech imauan tein kipias oksekopa no ijkon yeski. Ijkon chijchiujtoskej chikuasen imauan tauilketsaloni.
34 Uan koujtsin tein ijkatos tatajkoyampa kipias naui taman tein tamatis kemej ixochiyo almendro, naui bolitas uan naui xochit. Yas se almendrojxochit, se bolita uan se xochit uan ijkon motojtokatiaskej.
35 Tanitsin* de kampa kisaskej yekinika ome imauan tauilketsaloni kipias se bolita, uan ijkon yeski tanitsin de kampa kisaj okseki imauan. Ijkon yeskij chikuasen imauan tein kisaskej den koujtsin tein ijkatos tatajkoyampa.
36 Bolitas, imauan uan nochi tauilketsaloni chijchiujtos ika sayoj se ueyi cacho oro. Ika se martillo moneki tikchijchiujtias.
37 Tikchijchiuilis chikome candilmej. Keman kinxotaltiskej tauiskej taixpan.
38 Pinzas uan tapalkatsitsin para mechas tein tataskejya moneki chijchiujtoskej ika oro.
39 Moneki tikchijchiuas ika oro tauilketsaloni uan nochi tein mokuis para in tauilketsaloni. Tikuis 34 kilos* de oro tein okachi kuali.
40 Xikyekita maj mochijchiua ijkon kemej nimitsnextilij itech nejin tepet.
Tajtolmelaualismej
^ Oso “borrego”.
^ Xikonita tatiochiualkaxon.
^ Itech hebreo, “ome molik uan tajko”. Xikonita B14.
^ Itech hebreo, “se molik uan tajko”.
^ Itech hebreo, “naui majpil”. Xikonita B14.
^ Oso “ataujtsin”, “tauakaltsin”.
^ Nejin xiujtsitsin yejua tein yetokej itsintan se xochit.
^ Oso “kekepotsitsin”.
^ Oso “Ataujtsin”, “Tauakaltsin”.
^ Itech hebreo, “se talento”. Xikonita B14.
