Éxodo 3:1-22
3 Moisés kinyekpiaya iichkauan* imontat, Jetró, akin katka tiopixkat ompa Madián. Se tonal, keman kinnemiltijtoya ichkamej tanakastankopa den taluakyan, ajsik hasta Horeb. Horeb katka tepet tein Dios kijitak.*
2 Uan iángel Jehová monextij iixpan itech se tit* tein kisaya de se kouit tein uitsyoj. Keman Moisés kiyekitak, kiitak ke nejon kouit xotatoya sayoj ke amo tataya.
3 Yejua ika Moisés kijtoj: “¡Amo keman nikitstoya teisa ijkon! Nimotokiti para nikyekitas keyej ne kouit amo tata”.
4 Keman Jehová kiitak ke Moisés motokijtoya, kinotsak desde kouit tein uitsyoj uan kiluij: “¡Moisés! ¡Moisés!”. Uan yejua kinankilij: “Nikan nietok”.
5 Dios kiluij: “Amo ximotokiok. Ximokixtili motekakuan porin tiijkatok itech tal tein nimoxelouilij”.
6 Uan no kiluij: “Nejua niiDios mopaj, niiDios Abrahán, Isaac uan Jacob”. Uan Moisés moixtsakuak porin kimouiliaya kiitas toTajtsin Dios.
7 Jehová no kiluij: “Nikitani keniuj tel tajyouiaj nokoneuan israelitas ompa Egipto. Uan nikakini keniuj motsajtsiliaj porin fiero kinchiuaj. Kuali nikmati tein kijyouijtokej.
8 Yejua ika nitemoti para nikinmakixtis uan para nikinkixtis de nejon tal. Nikinuikati itech se tal kampa moteltachiua uan taueyika, kampa onkak miak leche uan nekti.* Ompa nemij akin kinixmatij kemej cananeos, hititas, amorreos, perizitas, heveos uan jebuseos.
9 Xikita, nikakini keniuj tayokoltsajtsij israelitas. No nikitani keniuj tel tajyouiaj porin ompa Egipto kinteltekitiltiaj.
10 Yejua ika nimitstitaniti xikitati tekiuaj akin taixyekana Egipto. Tejua tikinkixtis nokoneuan israelitas de ompa”.
11 Sayoj ke Moisés kiluij toTajtsin Dios: “Nejua amo teyi nichiujkej. Yejua ika amo uelis nias nikitatiuj tekiuaj uan nikinkixtis israelitas de Egipto”.
12 Uan yejua kinankilij: “Nejua nimitspaleuis. Uan para tikyekmatis ke nejua nimitstitantok, nimitsyekiluia nejin: keman tikinkixtis israelitas de Egipto, nochin namejuan nanualaskej itech nejin tepet uan nanechueyichiuaskej, nejua akin yekmelauj niDios”.
13 Sayoj ke Moisés kiluij toTajtsin Dios: “Maj tikijtokan ke nikinitati israelitas uan nikiniluia: ‘IninDios namouejkaujtatuan nechualtitanik maj namechitaki’. Komo yejuan nechtajtaniaj* keniuj timonotsa, ¿toni maj nikinilui?”.
14 Yejua ika Dios kinankilij Moisés: “Nejua nimochiuas tein niknekis* nimochiuas”.* Uan no kiluij: “Yejua nejin tein moneki tikiniluis israelitas: ‘Akin monotsa “Nejua nimochiuas” nechualtitanik maj namechitaki’”.
15 Dios oksepa kiluij Moisés:
“Yejua nejin tein moneki tikiniluis israelitas: ‘Jehová, ininDios namouejkaujtatuan, Abrahán, Isaac uan Jacob nechualtitanik maj namechitaki’. Ijkon nimonotsas nochipaya, uan ijkon nechixmatiskej* nochin akin yoltiaskej.
16 Uan axkan xiouj, xikinsentili taixyekananij israelitas uan xikinilui: ‘Jehová, ininDios namouejkaujtatuan, Abrahán, Isaac uan Jacob monextij noixpan uan kijtoj: “Xikyekmatikan ke nejua namechitani uan nikitani tein namechchiuilijtokej ompa Egipto.
17 Yejua ika, namechyekiluia ke namechmakixtiti para maj amo namechtajyouiltikanok. Namechuikas itech tal kampa nemij cananeos, hititas, amorreos, perizitas, heveos uan jebuseos, kampa onkak miak leche uan nekti”ʼ.*
18 ”Yejuan mitskakiskej. Uan tejua uan taixyekananij israelitas nankiitatiuij tekiuaj akin taixyekana Egipto uan moneki nankiluiskej: ‘Jehová, Dios akin tikueyichiuaj tejuan tihebreos,* touan tajtoj. Yejua ika, timitstataujtiaj xitechkaua maj tiakan eyi tonal ne taluakyan para tikmaktiliskej toDios Jehová seki tapialmej’.
19 Sayoj ke nejua nikyekmattok ke tekiuaj sayoj namechkauas xiakan komo se kichikaujkauia.
20 Yejua ika, ika nochikaualis nikchiuas uejueyi taman ompa Egipto uan ijkon nikintatsakuiltis akin ompa nemij. Satepan, tekiuaj namechkauas xiakan.
21 No nikchiuas maj akin nemij Egipto kuali namechitakan. Uan keman nanyaskej, nankiuikaskej miak taman.
22 Sejse siuatsin moneki kitajtanis ivecina uan siuatsin akin nemis ichan miak taman tachijchiuj ika plata, oro uan no tasal.* Uan nejon nankintaliliskej namookichpipiluan uan namosiuapipiluan. Namejuan nankinkuilijteuaskej nochi tein kipiaj akin nemij Egipto”.
Tajtolmelaualismej
^ Oso “iborregos”.
^ Oso “kiixpejpenak”.
^ Oso “tekol”.
^ Oso “miel”.
^ Oso “nechtajtoltiaj”.
^ Oso “nikixtalis”.
^ Oso “Nejua nimochiuas tein nimochiuas”. Xikonita A4.
^ Oso “nechelnamikiskej”.
^ Oso “miel”.
^ Oso “tilmaj”.
