Éxodo 39:1-43
39 Ika hilo azul, morado uan chichiltik, yejuan kichijchiujkej tasal* tein kualtsin tajkitil, tein kikuiskej akin tekitiskej kampa Dios taxeloj. No kichijchiujkej tasal tein kikuis Aarón kemej tiopixkat, ijkon kemej Jehová kinauatijka Moisés.
2 Bezalel kichijchiuak koton tein kiluiaj efod* ika oro, hilo azul, morado, chichiltik uan linojtamalin tein tel kuali.
3 Ika martillo kitejteuijkej oro hasta ke kualtsin kanauayak. Uan yejua kitetejtekik nejon oro tel pijpitsaktik kemej hilo para kiijkitis iuan hilo azul, morado, chichiltik uan lino tein tel kuali. Koton ijtsontoya kemej se tajmach.
4 Kichijchiujkej ika ome tasal tein monamikiaj uan ijtsontoya iajkolko.
5 Uan cinturón* tajkitil tein ijtsontoya itech koton para ika motajkotilintis, no chijchiujtoya ika oro, hilo azul, morado, chichiltik uan linojtamalin tein tel kuali, ijkon kemej Jehová kinauatijka Moisés.
6 Uan tetsitsin tein moixmatij kemej ónice kinkajkalakijkej itech oro. Kintektiajkej nejon tetsitsin para itech kijkuiloskej inintokay ikoneuan Israel, ijkon kemej kitekij teisa para kichijchiuaskej se sello.
7 Uan yejua kintalij iajkolko tiopixkat, itech ikoton para maj kinelnamikikan ikoneuan Israel, ijkon kemej Jehová kinauatijka Moisés.
8 Uan kichijchiuak bolsita tein kipiaya iyolixpan. Ijkon kemej koton, no chijchiujtoya ika oro, hilo azul, morado, chichiltik uan linojtamalin tein tel kuali.
9 Keman kikelpachouayaj, mokauaya cuadrado uan kipiaya se cuarta* de ueyak uan se cuarta de patauak.
10 Kintejtekpankej tetsitsin itech naui filas. Yekinika tekpantoyaj eyi tetsitsin: rubí, topacio uan esmeralda.
11 Itech ojpatika fila tekpantoyaj turquesa, zafiro uan jaspe.
12 Itech expatika fila tekpantoyaj léshem,* ágata uan amatista.
13 Uan itech naujpatika fila tekpantoyaj crisólito, ónice uan jade. Kampa aktoyaj nochin tetsitsin chijchiujtoya ika oro.
14 Itech nejon tetsitsin ijkuiliujtoyaj inintokay 12 ikoneuan Israel. Sejse tokayit kiixnextiaya semej den 12 uejueyi kalyetonij. Sejse tetsin kitektiajkej para itech tajkuiloskej, ijkon kemej kitekij teisa para kichijchiuaskej se sello.
15 Uan kichijchiujkej seki tamalin para bolsita. Nejon tamalin chijchiujtoya ika oro tein okachi kuali.
16 Ika oro kichijchiujkej kampa aktoskiaj tetsitsin uan ome anillos. Kintalijkej nejon ome anillos itech ome esquinas tein kipia ajko den bolsita.
17 Satepan kikalakijkej ome tamalin de oro itech ome anillos.
18 Uan kikalakijkej ipuntas nejon ome tamalin itech oro tein yetoya iajkolko, uan ijkon bolsita mokauak taixpankopa.
19 Satepan kichijchiujkej ome anillos de oro uan kitalijkej itech ome esquinas tein kipia tani.* Nejon anillos kintalijkej taikankopa den bolsita uan mokuiltiayaj itech koton.
20 No kichijchiujkej ome anillos de oro uan kintalijkej taixpankopa den koton. Kitalijkej tani de iajkolko, kampa ika monamikia koton, ajkotsin de kampa yetoya cinturón tein tajkitil.
21 Uan anillos tein kipiaya bolsita kitakuiltijkej itech anillos tein kipiaya in koton ika se tamalin azul. Ijkon in bolsita kuali yetoya tapani den koton, ajkotsin den cinturón tein tajkitil, ijkon kemej Jehová kinauatijka Moisés.
22 No kichijchiuak tasal tein makojkotoltik tein yaya tatampa den koton. Nejon tasal tajkitil chijchiujtoya nochi ika hilo azul.
23 Kechtapotoya kemej se teposkoton tein kikui se soldado. Uan kampa kechtapotoya kitenijtsonkej para maj amo tsayani.
24 Uan itech itempan tasal tein makojkotoltik, kichijchiuilijkej seki bolitas kemej yeskia granadas ika hilo azul tein kimalinkaj iuan hilo morado uan chichiltik.
25 Ika oro tein okachi kuali no kichijchiujkej seki campanitas uan kintalijkej itempan tasal iuan granadas. Tajtatajko den granadas kitalijkej campanitas.
26 Kitalijkej se campanita uan se granada, se campanita uan se granada. Ijkon kintajtalijtiajkej itech nochi itempan tasal tein makojkotoltik tein kikuiaj akin tekitiaj kemej tiopixkamej. Kichijchiujkej nochi nejon ijkon kemej Jehová kinauatijka Moisés.
27 Ika lino tein tel kuali, kichijchiujkej tasal tein tajkitil tein kikuiskiaj Aarón uan ikoneuan,
28 uan no tasal tein mokuayoualouiliskiaj. Ika linojtamalin tein tel kuali no kichijchiujkej tatampa calzon tein motaliliskiaj.
29 Uan tein ika motajkoilpiskiaj* kichijchiujkej ika linojtamalin tein tel kuali, hilo azul, morado uan chichiltik. Kichijchiujkej nochi nejon ijkon kemej Jehová kinauatijka Moisés.
30 Uan ika oro tein okachi kuali kichijchiujkej se tepos kanauak tein miliktik tein kinextiaya ke Dios kixeloj tiopixkat. Uan kemej se sello, kitektiajkej uan kijkuilouilijkej nejin: “Jehová senkis chipauak”.
31 Uan nejon tepos kanauak kitalilijkej se tamalin azul para kitsikoskej itech tasal tein mokuayoualouilis, ijkon kemej Jehová kinauatijka Moisés.
32 Ijkon kitamichijchiujkej nochi tein monekia para in kaltsin kampa kiueyichiuaskiaj Dios. Israelitas kichiujkej nochi tein Jehová kinauatijka Moisés. Kichiujkej ijkon kemej kijtojka.
33 Uan kiuikilijkej Moisés nochi tein ika kiketsaskiaj in kaltsin, uejueyi tasal uan nochi tein mokuiskia: ganchitos, ventanas, koujmej tein kinixtapaltaliskiaj, kalikximej uan metstapechmej;
34 ipankuetaxyo ichkaueuet* tein chichiltikya, ipankuetaxyo foca uan cortina tein taxelos kalijtik;
35 tatiochiualkaxon* uan koujmej tein ika kiuikaskej, uan ipantsak;
36 mesa uan nochi tein ompa mokuis uan pantsin tein ompa kitaliskej;
37 tauilketsaloni tachijchiuj ika oro tein okachi kuali, icandiluan tein tekpantoyaj, nochi tein mokuis para in tauilketsaloni uan aceite para taxotatos;
38 altar tachijchiuj ika oro, aceite tein ika kixeloskej tein iaxka Dios, kopal tein ajuiyak uan cortina para ikalakyan kaltsin;
39 altar uan malla tachijchiuj ika cobre, koujmej tein ika kiuikaskej, nochi tein mokuis itech altar, paila uan kampa ijkatos;
40 cortinas tein ika tatsaktos kalampa, postes uan ininmetstapechuan, cortina tein yas kampa kalakiskej para panoskej kampa yetok kaltsin, mekat tein ika tajtalpiskej,* clavos uan nochi tein mokuiskia itech tekit tein mochiuas itech kaltsin;
41 tasal tein kualtsin tajkitil tein kikuiskej akin ompa tekitiskej, tasal tein kikuis Aarón kemej tiopixkat uan tasal tein kikuiskej ikoneuan para tekitiskej kemej tiopixkamej.
42 Israelitas kichiujkej nochi tekit tein monekia, ijkon kemej Jehová kinauatijka Moisés.
43 Keman Moisés kiyekitak tekit tein kichiujkaj, kiitak ke kichiujkaj ijkon kemej Jehová tanauatijka. Uan Moisés kintiochiuak.
Tajtolmelaualismej
^ Oso “tilmaj”.
^ Oso “paxa”, “ilpikat”.
^ Xikonita B14.
^ Amo momati katiyejua tetsin katka. Xa ámbar, jacinto, ópalo oso turmalina.
^ Oso “atauj”, “tauakal”.
^ Oso “motajkotsikoskiaj”.
^ Oso “borrego”.
^ Xikonita tatiochiualkaxon.
^ Oso “tatsijtsikoskej”.
