Éxodo 4:1-31
4 Sayoj ke Moisés kinankilij Dios: “¿Uan toni nikchiua komo amo nechneltokiliaj nion nechkakij? Porin kijtoskej ‘Jehová amo monextij moixpan’”.
2 Uan Jehová kitajtanij:* “¿Toni tikitskijtok?”. Moisés kinankilij: “Se topil”.
3 Dios kiluij: “Xiktamota talpan”. Uan keman kitamotak, in topil mokepak se kouat. Uan Moisés moajchiujtiuetsik.
4 Uan Jehová kiluij: “Xikuitapilkitski”. Yejua ika, Moisés kikitskij uan kouat mokepak se topil.
5 Uan Dios kiluij: “Ijkon yejuan kimatiskej ke Jehová, ininDios ininuejkaujtatuan, Abrahán, Isaac uan Jacob monextij moixpan”.
6 Uan Jehová no kiluij: “¿Uelis timomakalakis itech bolsa tein kipia motasal?”.* Uan Moisés momakalakij itech itasal uan keman momakixtij, imay kipiaya se pitsotik kokolis* tein monotsa lepra. ¡Mapochiktiak!
7 Satepan Dios kiluij: “Oksepa ximomakalaki itech motasal”. Uan Moisés oksepa momakalakij uan keman momakixtij mapajtikaya.
8 Dios kiluij: “Komo amo mitsneltokiliaj uan amo kichiuaj cuenta yekinika milagro, kichiuaskej cuenta okse milagro.
9 Komo tikchiuakya nejin ome milagros uan kisentokaj amo mitskakij, xikixti tepitsin at den ueyiat Nilo uan xiktoyaua talpan. Nejon at tein tiktoyauas mokepas esti”.
10 Uan Moisés kiluij Jehová: “Jehová, maj nimitsilui teisa. Nejua ipa amo keman niyektajtouani, nion achto nion desde keman peuak nouan titajtoua. Yolik nitajtoua uan nimotentsajtsakuilia”.
11 Jehová kitajtanij: “¿Akoni kichijchiuilij itenoj in takat? ¿Akoni ueli kichiua maj aksa* amo ueli tajto oso maj amo ueli takaki? ¿Akoni ueli kichiua maj aksa tachia oso maj amo tachia? Sayoj nejua Jehová ueli nikchiua nejon.
12 Uan axkan xiouj. Nejua nimitspaleuis keman titajtos uan nimitsiluis* tein moneki tikijtos”.
13 Sayoj ke Moisés kinankilij: “Jehová, nimitstataujtia xiktitani okse, akin tejua tiknekis”.
14 Uan Jehová semi kualanik iuan Moisés uan kiluij: “Mokniuj Aarón* kuali tajtoua. Ualajtokya mitsnamikiki uan semi yolpakis keman mitsitas.
15 Xiktapoui nochi tein nimitsiluij uan xikilui tein moneki kijtos. Nejua namechpaleuis keman nantajtoskej uan namechiluis tein moneki nankichiuaskej.
16 Tejua tikiluis Aarón tein nejua nikijtos* uan yejua kiniluis oksekin tein tejua tikiniluiskia.
17 Uan no, tikuikas nejin topil tein ika tikchiuas milagros”.
18 Yejua ika Moisés mokepak kampa yetoya imontat akin monotsaya Jetró, uan kiluij: “Nikneki nimokepas Egipto para nikitas ox nemijok nokniuan”. Uan Jetró kiluij Moisés: “Kuali yetok, kualtsin xiouj”.
19 Satepan, Jehová kiluij Moisés ompa Madián: “Ximokepa Egipto porin momikilijkejya nochin akin kinekiaj mitsmiktiskej”.
20 Uan Moisés kitejkoltij isiuatsin uan iokichpipiluan itech se burro, uan peuak mokepa Egipto. No kiuikaya topil tein toTajtsin Dios kiluijka maj kiuika.
21 Uan Jehová kiluij Moisés: “Keman oksepa tietos Egipto, ika chikaualis tein nimitsmakak xikchiua milagros iixpan tekiuaj akin ompa taixyekana. Sayoj ke nikauas maj tekiuaj amo takaki uan amo kinkauas israelitas maj yakan.
22 Xikilui tekiuaj: ‘Yejua nejin tein kijtoua Jehová: “Nochin israelitas kemej yeskia se nookichpil, akin tayekana.
23 Yejua ika nimitsiluia: xikaua maj nookichpil kisa de nikan para maj nechueyichiua. Sayoj ke komo amo tikaua maj youi, nikmiktiti mookichpil akin tayekana”’”.
24 Uan keman nejnentoyaj para ajsiskej kampa yaya mokauatij nejon youak, Jehová iuan monamikik uan kimiktisnekia.
25 Satepan Ziporá kikuik se tet tein tenej uan kitekik* iokichpil. Uan kichiuak maj inakayotsin tein kitekilijka uetsini imetsko uan kijtoj: “Nejin esti kinextia ke tinotakatsin”.
26 Uan Dios kikauak maj youi. Uan kemej kitekik* ikonetsin, Ziporá kijtoj “nejin esti kinextia ke tinotakatsin”.
27 Uan Jehová kiluij Aarón: “Xiknamikiti Moisés taluakyan”. Yejua ika, Aarón yajki uan kiajsito Moisés itech tepet tein Dios kijitak,* kitajpaloj uan kimakak se beso.*
28 Uan Moisés kitapouij Aarón nochi tein Jehová kiluijka. No kitapouij nochi milagros tein kinauatij maj kichiuani.
29 Satepan, Moisés uan Aarón mosentilitoj iniuan taixyekananij israelitas.
30 Aarón kintapouij nochi tein Jehová kiluijka Moisés uan yejua kichiuak milagros ininixpan nochin.
31 Yejua ika kineltokilijkej. Uan keman israelitas kimatkej ke Jehová kinekia kinpaleuis uan ke kiitaka keniuj tajyouijtoyaj, motankuaketskej uan moixpilojkej hasta talpan.
Tajtolmelaualismej
^ Oso “kitajtoltij”.
^ Oso “motilmaj”.
^ Oso “kokoxkayot”.
^ Oso “akin”, “akaj”.
^ Itech hebreo, “nimitsmachtis”.
^ Oso “Aarón akin levita”.
^ Itech hebreo, “Tejua tiyeski kemej iDios”.
^ Oso “kichiuilij circuncisión”. Xikonita circuncisión.
^ Oso “kichiuilij circuncisión”.
^ Oso “kiixpejpenak”.
^ Oso “kipitsoj”, “kitenamik”.
