Éxodo 5:1-23
5 Satepan, Moisés uan Aarón kiitatoj tekiuaj akin taixyekanaya Egipto uan kiluijkej: “Yejua nejin tein kijtoua Jehová, ininDios israelitas: ‘Xikinkaua nokoneuan israelitas maj kisakan de nikan, para maj nechiluichiuitij ne taluakyan’”.
2 Sayoj ke tekiuaj kinnankilij: “¿Toni chiujkej nejon Jehová para maj niktakamati uan maj nikinkaua israelitas maj kisakan? Amo nikixmati Jehová uan nion nikinkauas maj kisakan”.
3 Uan yejuan kiluijkej: “Dios akin tikueyichiuaj tejuan tihebreos* touan tajtoj. Timitstataujtiaj xitechkaua maj tiakan eyi tonal ne taluakyan, para tikmaktiliskej toDios Jehová seki tapialmej. Komo amo, kichiuas maj tikokolispeuakan* oso maj techmiktikan akin techtauelitaj”.
4 Sayoj ke tekiuaj kinnankilij Moisés uan Aarón: “¿Keyej nankinekij maj israelitas amo tekitikanok? ¡Xiakan xitekititij!”.
5 Uan no kiniluij: “Xikitakan, tel miakej tekititokej. Uan namejuan nankinekij nankintsakuiliskej”.
6 Nejon tonal, tekiuaj kinnauatij akin kinixyekanayaj takeualmej uan akin kinpaleuiayaj:
7 “Amo xikinmakakanok sakat tein uakik para kichijchiuaskej tabiques. Maj yejuan mokuilitij.
8 Uan moneki nankinchijchiualtiskej tabiques tein ipa kichijchiuayaj. Maj amo poliui nion se tabique. Yejuan seki tatsiuinij uan yejua ika kijtojtinemij: ‘¡Tiasnekij! ¡Tiknekij tikmaktiliskej toDios seki tapialmej!’.
9 Okachiok xikintekitiltikan uan xikyekitakan maj yekmelauj tekitikan, para amo horajtiskej kikaktoskej tein amo melauj”.
10 Yejua ika akin kinixyekanayaj takeualmej uan akin kinpaleuiayaj kiniluitoj israelitas: “Yejua nejin tein kijtoj tekiuaj: ‘Amo namechmakasok sakat.
11 Namejuan ximotemolitij, uan xikchijchiuakan tabiques tein ipa nankichijchiuaj’”.
12 Yejua ika israelitas kitemotoj sakat itech nochi Egipto.
13 Uan akin kinixyekanayaj takeualmej kinijsiuiltiayaj uan kiniluiayaj: “Nanochin moneki nankitamichijchiuaskej tabiques tein ipa nankichijchiuayaj sejse tonal, kemej ijkuak namechmakayaj sakat”.
14 Uan no, kinmagakej* seki israelitas akin kinixyekanayaj takeualmej. Nejin israelitas kinixtalijkaj para maj kinitakan okseki israelitas. Uan kintajtanijkej:* “¿Keyej amo nankichijchiujkej nion yalua nion axkan tabiques tein ipa nankichijchiuayaj?”.
15 Uan israelitas akin kinixyekanayaj okseki israelitas kiluitoj tekiuaj: “¿Keyej ijkon titechchiua?
16 Amo techmakajok sakat, sayoj ke kisentokaj techiluiaj: ‘¡Xikchijchiuakan tabiques!’. Uan amo sayoj nejon, ta no techmagaj* maski inintajtakol motakeualuan”.
17 Sayoj ke yejua kinnankilij: “¡Nantatsiuinij! ¡Sayoj nantatsiujkayetokej! Yejua ika nankijtouaj: ‘Tiasnekij. Tiknekij tikmaktiliskej Jehová seki tapialmej’.
18 ¡Xiakan xitekititij! Amo namechmakaskej sakat, uan moneki nankichijchiuaskej tabiques tein ipa nankichijchiuayaj”.
19 Yejua ika israelitas akin kinixyekanayaj okseki israelitas semi motekipachojkej, porin kinnauatijkaj ke monekia kichijchiuaskej tabiques tein ipa kichijchiuayaj sejse tonal.
20 Keman yejuan kiskej, iniuan moitakej Moisés uan Aarón, akin kinchixtoyaj.*
21 Nimantsin kiniluijkej Moisés uan Aarón: “Maj Jehová kiita tein nankichiujkej uan maj namechtatsakuilti, porin nankichiujkej maj tekiuaj uan itakeualuan techtauelitakan,* uan kemej yeskia nankimaakijkej se machete tein ojkan tenej* para maj techmiktikan”.
22 Uan Moisés kiluij Jehová: “Jehová, ¿keyej tikintajyouiltia israelitas? ¿Keyej tinechualtitanik nikan?
23 Desde ke nikitako tekiuaj para nikiluis tein tinechnauatij, yejua okachi fiero kinchiuani israelitas uan tejua amo tikinmakixtijtok”.
Tajtolmelaualismej
^ Oso “tikokoxkakuikan”.
^ Oso “kinuitekkej”.
^ Oso “kintajtoltijkej”.
^ Oso “techuitekij”.
^ Oso “kinchatoyaj”.
^ Oso “techijiyakan”.
^ Oso “espada”.
