1 Corintios 1:1-31
1 Nejua Pablo namechtajkuilouilia. Cristo Jesús nechijitak* para nikchiuas tekit kemej tatitanil porin Dios ijkon kinekik. Nietok iuan tokniuj Sóstenes.
2 Namechtajkuilouilia namejuan akin nanpouij itech inechikol Dios ompa Corinto, uan no akin noyampa* kiteneujtokej itokay toTekotsin Jesucristo, ininTekotsin uan no toTekotsin. Dios namechxeloj para xisenpouikan iuan Cristo Jesús uan namechnotsak para nanyeskij naniaxkauan.*
3 Maj toTajtsin Dios uan toTekotsin Jesucristo namechmakakan tatiochiualis tein amo technamiki uan maj namechpaleuikan kuali ximouikakan iuan Dios.
4 Nochipa niktasojkamatilia noDios porin namechnextilij itatiochiualis tein amo technamiki itechkopa Cristo Jesús.
5 Uan kemej nanpouij iuan Cristo, Dios namechmakak nochi, yejua ika kuali nankiteixmatiltiaj itajtol uan kuali nankiixmatij tein melauak,
6 uan moita ke nankiyekneltokaj tamachtilis tein ika tajtoua Cristo.
7 Yejua ika amo teyi namechpoloua axkan ke semi nankichixtokej* ijkuak toTekotsin Jesucristo kinextis ichikaualis.
8 Dios no namechpaleuis amo ximotsinkixtikan, uan ijkon amo akin uelis namechteluilis itech tonal keman toTekotsin Jesucristo ualas.
9 Dios nochipa kichiua tein kijtoua. Yejua namechnotsak para xisenpouikan iuan iKoneuj, toTekotsin Jesucristo.
10 Axkan, nokniuan, namechtataujtia itokaykopa toTekotsin Jesucristo, nanochin ximoyektenkauakan uan amo xixexeliujtokan, ta xikpiakan sayoj se tanemilil uan xikixejekokan sayoj se taman.
11 Nokniuantsitsin, namechiluia nejin porin sekin akin nemij ichan Cloe nechmatiltijkej ke namotajtolteuiaj.
12 Nikijtoua nejin porin tataman tein nankijtojtinemij. Sekin kijtouaj: “Nejua niktojtoka Pablo”, “Nejua niktojtoka Apolos”, “Sayoj ke nejua niktojtoka Cefas”,* “Uan nejua niktojtoka Cristo”.
13 ¿Nankinemiliaj ke Cristo xexeliujtok? Pablo amo namoka momikilij,* ¿melauj? ¿Oso xe namechauijkej itokaykopa Pablo?
14 Niktasojkamatilia Dios porin amo namechauij, ta sayoj nikinauij Crispo uan Gayo,
15 porin ijkon amo akin uelis kijtos ke namechauijkej notokaykopa.
16 Tein melauj, no nikinauij akin nemij ichan Estéfanas. Amo nikelnamiki maj nikinauiani oksekin.
17 Cristo amo nechtitanik maj nikinaui oksekin, ta maj nikteixmatilti kuali tanauatilmej.* Yejua amo nechtitanik maj nitanojnotsa kemej tajtouaj akin semi taixmatij. Porin komo ijkon nikchiuaskia, nenkaj momikilij Cristo itech kouit.*
18 Tein melauj, akin ixpoliuitij* kiitaj ke tamachtilis tein ika tajtoua imikilis Cristo itech kouit* amo tapaleuia, sayoj ke tejuan akin techmakixtijtokej tikitaj ke nejon kinextia ichikaualis Dios.
19 Porin ijkuiliujtok: “Nikchiuas maj tamatinij amo yektanemilikanok uan nikixtopeuas* inintanemilil akin motelmachtiaj”.
20 ¿Kani yetok tamatkej? ¿Kani yetok tajkuilojkej?* ¿Kani yetok akin kiuelita motajtolteuis itech nejin tonalmej?* ¿Xe Dios amo kinextij ke amo tapaleuia inintamatilis akin nemij nikan taltikpak?
21 Porin yejuan takuaujtamatkej itech inintamatilis, yejua ika amo kiixmatkej Dios. Tein tikteixmatiltiaj, oksekin kiitaj ke amo tapaleuia, sayoj ke ika tein tikteixmatiltiaj Dios kinmakixtij akin taneltokaj. Ijkon monextij ke Dios semi tamatkej.
22 Judíos tajtanij kiitaskej milagros uan griegos kinekij yeskij tamatinij.
23 Sayoj ke, tejuan tikteixmatiltiaj Cristo akin kikoujpampilojkej, se taman tein judíos amo kiuelitaj uan akin amo judíos kiitaj ke amo tapaleuia.
24 Sayoj ke, akin Dios kinnotsak, yeskij judíos oso griegos, kiitaj ke Dios kinextia ichikaualis uan itamatilis itechkopa Cristo.
25 Miakej uelis kijtoskej ke tein iaxka Dios amo tapaleuia uan amo chikauak, sayoj ke nejon okachi tapaleuia uan okachi chikauak ke yejuan.
26 Nokniuan, namejuan uelis nankiitaskej ke keman Dios namechnotsak, amo namiakej namechitayaj ke nantamatinij, namiakej amo nantaixyekanayaj uan namiakej amo nankatkaj ininchankauan uejueyi chiuanimej,
27 ta Dios kinijitak* akin oksekin kinitaj ke amo teyi kimatij para kinpinaujtis tamatinij. Dios kinijitak akin oksekin kinitaj ke amo chikaujkej para kinpinaujtis akin chikaujkej.
28 Uan Dios kijitak tein oksekin kiitaj ke amo tayekantok uan tein kiixtopeuaj, kijitak tein amo kipia ipatiuj para kiixpolos tein kipia ipatiuj,
29 uan ijkon amo akin uelis moueyimatis* iixpan Dios.
30 Dios kichiuak xipouikan iuan Cristo Jesús. Yejua kinextij ke Dios semi tamatkej, techpaleuia maj Dios techita ke tiyolmelaujkej, itechkopa uelis tiyeskij tichipaujkej uan yejua taxtauak para techmakixtis.
31 Ijkon uelis mochiuas tein ijkuiliujtok: “Akin moueyitalia, maj moueyitali porin kiixmati Jehová”.*
Tajtolmelaualismej
^ Oso “nechixpejpenak”.
^ Oso “nouian”.
^ Oso “nanchipaujkej iixpan”.
^ Oso “nankichatokej”.
^ No monotsa Pedro.
^ Oso “kikoujpampilojkej”.
^ Xikonita kouit kampa tetajyouiltiaj.
^ Oso “tajtolmej”.
^ Oso “akin momikilijtokej”.
^ Xikonita kouit kampa tetajyouiltiaj.
^ Oso “niksekotalis”.
^ Nejin kijtosneki se akin kuali kiixmati iTanauatil Moisés.
^ Xikonita tonalmej; tein mochiujtok.
^ Oso “kinixpejpenak”.
^ Oso “moueyinekis”.
