2 Corintios 9:1-15
9 Amo moneki namechtajkuilouilis para nankimatiskej ke moneki nankinpaleuiskej* akin Dios moinxelouilij,*
2 porin nikmati ke yekmelauj nankinekij nantapaleuiskej uan namechueyitalia ininixpan akin yetokej Macedonia, porin nikiniluia ke akin yetokej Acaya se xiuitya kiixtalijtokej tapaleuiskej. Tein melauj, kemej nantapaleuiaj ika nochi namoyolo, miakej no kinekij tapaleuiskej.
3 Sayoj ke nikintitani tokniuan para xikpiakanya tein ika nantapaleuiskej, ijkon kemej nikijtoj ke nankipiayajya, uan ijkon maj amo nenkaj tikijtouanij ke yekmelauj nantapaleuisnekij.
4 Porin komo akin yetokej Macedonia nouan yaskiaj uan namejuan ayamo nankipiaskiaj tein ika nantapaleuiskej, tejuan timopinaujtiskiaj porin namotech titakuaujtamatkej, uan namejuan no namopinaujtiskiaj.
5 Yejua ika nikixejekoj ke monekia nikiniluis tokniuan maj achto yakan kampa namejuan uan maj namechpaleuikan xiksentilikan tein namotenkaujkej nankitemakaskej. Ijkon keman tiajsiskej nankipiaskejya tein nankitemakaskej ika nochi namoyolo, uan amo nankitemakaskej porin namechchikaujkauiaj.
6 Xikelnamikikan nejin: akin sayoj tepitsin tatoka, sayoj tepitsin kisentilis, uan akin miak kitoka, no miak kisentilis.
7 Maj sejse kichiua ijkon kemej kiixtalij itech iyolo, uan maj amo kiyolkoko kitemakas nion maj kitemaka porin kichikaujkauiaj, porin Dios kitasojta akin kitemaka ika miak pakilis.
8 Tein melauj, Dios ueli namechnextilia itatiochiualis tein amo technamiki para maj amo keman namechpolo tein moneki uan no xiktelpiakan nochi tein moneki para nankichiuaskej tein yeski taman tein kuali.
9 (Ijkon kemej ijkuiliujtok: “Yejua kitetayokoliani miak taman tein kipia, uan no kinmakani pobres. Tein kuali tein kichiuak nochipa moelnamikis”.
10 Akin kimaka tel miak xinach akin tatoka uan techmaka tein tikmajseuaskej, no kitemakas uan kimiakiltis xinach para xitatokakan. No namechpaleuis xiksentilikan miak taman tein kuali porin nankichiujkej tein kuali).
11 Dios semi namechtatiochiuia para uelis nankitemakaskej miak taman ika pakilis, uan keman tiktemakaskej tein nankititanij, miakej kitasojkamatiliskej Dios.
12 Porin nejin tein nankichiujkej, amo sayoj kinpaleuia maj kipiakan tein kinpoloua akin Dios moinxelouilij,* ta no tapaleuia maj miakej kitasojkamatilikan Dios.
13 Ijkon, yejuan kiueyitaliskej Dios porin tein nankitemakakej kinextia ke namejuan nankichiuaj tein kijtoua kuali tanauatilmej* tein ika tajtouaj Cristo tein nankiteixmatiltiaj. Uan no kinextia ke namechyolpaktia nankinmakaskej tein nankipiaj, yejuan uan nochin.
14 Uan keman yejuan namoka motataujtiskej, kijtoskej ke namechtasojtaj porin Dios semi namechnextiliani itatiochiualis tein amo technamiki.
15 Tiktasojkamatiliaj Dios porin techtayokolij se taman tein semi kuali.*
Tajtolmelaualismej
^ Oso “nantekitiskej para”.
^ Oso “chipaujkej iixpan Dios”.
^ Oso “chipaujkej iixpan Dios”.
^ Oso “tajtolmej”.
^ Oso “tein amo tikajxiliaj keniuj tikmelauaskej”.
