2 Timoteo 2:1-26
-
Maj se kinmachti takamej akin kuali kimatij keniuj tamachtiskej (1-7)
-
Maj tikteixmatiltikan kuali tanauatilmej maski titajyouiskej (8-13)
-
Xiktekitilti itajtol Dios kemej moneki (14-19)
-
“Amo xikchiua tein kinejnekij telpochmej uan ichpochmej” (20-22)
-
Keniuj moneki tikinnankiliskej akin techixnamikij (23-26)
2 Yejua ika nokonetsin, xiksentoka xiktajtani Dios maj mitschikaua itechkopa tatiochiualis tein amo technamiki tein kinextia Cristo Jesús.
2 Uan tein tinechkakilij uan tein miakej kiyeknextijkej ke melauak, xikinmachti akin takuaujtamachmej, uan ijkon yejuan kuali kimatiskej keniuj kinmachtiskej oksekin.
3 Kemej se kuali isoldado Cristo Jesús, xikijyoui tein monekis tikijyouis.
4 Komo se soldado kineki kiyolpaktis akin kiixyekana, amo mokalakia itech okse tekit para motekipanos.
5 Hasta keman mauiltiaj, amo akin tatani komo amo mauiltiaj kemej ixyetok.
6 Milajtekitikej akin chikauak tekiti, moneki achto yejua kikuas tein kitokak.
7 Nochipa xitanemili itech tein nikijtojtok; toTekotsin mitsajsikamatiltis* nochi.
8 Xikelnamiki ke Jesucristo oksepa nemik* uan iuejkaujtat katka David. Yejua nejin kuali tanauatilmej* tein nikteixmatiltia,
9 uan yejua ika nitajyouijtok uan nitsaktok kemej se akin kichiuak tein amo kuali. Sayoj ke itajtol Dios amo akin uelis kitsakuilis.*
10 Yejua ika nikxikojtok nochi para nikinpaleuis akin Dios kinijitak,* para maj yejuan no momakixtikan itechkopa Cristo Jesús uan maj kinueyitalikan nochipaya.
11 Nejin tein nikijtojtok melauak: komo iuan timikij, tikyekmatij ke no iuan tinemiskej;
12 komo tiksentokaj titaxikouaj, no iuan titaixyekanaskej kemej tekiuanij; komo tikijtouaj ke amo tikixmatij, yejua no kijtos ke amo techixmati;
13 maski tejuan amo tikchiuaskej tein Dios kijtoua, yejua nochipa kichiua tein kijtoua, porin yejua amo keman motajtolpata.*
14 Xiksentoka xikinelnamikti nejin uan xikinnauati* iixpan Dios maj amo moteuikan sayoj por tajtolmej, nejon senkis amo tapaleuia, porin kinijtakoua* akin takaktokej.
15 Xikchiua nochi tein tiuelis para tikyolpaktis Dios uan timonextis iixpan kemej se tekitikej akin amo kipia toni ika mopinaujmatis, akin kitekitiltia tajtol tein melauak kemej moneki.
16 Sayoj ke xikixtopeua tajtolmej tein amo tapaleuiaj tein kiixnamiki Dios, porin nejon kichiuas maj okachi taixnamikikan,
17 uan inintajtoluan momauas kemej se kokolis* tein kipalantijtiuj se inakayo. Yejua nejin tein kichiuaj Himeneo uan Fileto.
18 Nejin takamej kikaujkej tamachtilis tein melauak uan kijtouaj ke mikemej oksepa nemijya, uan kichiujtokej maj sekin amo takuaujtamatikanok.
19 Maski ijkon, tepankalikxit tein Dios kitalij kisentoka kuali toktok uan amo teyi kiolinia, uan itech ijkuiliujtok nejin tajkuilol: “Jehová* kinixmati akin iaxkauan”, uan “Nochin akin kinotsaskej Jehová* ika itokay moneki amo kichiuaskejok tein amo kuali yetok”.
20 Itech se ueyi kali amo sayoj onkak tapalkamej tein chijchiujtokej ika oro uan plata, ta no ika kouit uan sokit. Seki kualtsitsin uan okseki mokui mojmostaj.
21 Yejua ika akin amo moneloua iniuan tapalkamej tein mokui mojmostaj yeski se tapalkat tein kualtsin, chipauak iixpan Dios, semi kipaleuis akin iaxka uan kimatis kichiuas tein yeski tekit tein kuali.
22 Amo xikchiua* tein kinejnekij telpochmej uan ichpochmej uan ximochikaua tikchiuas tein kuali yetok, titakuaujtamatis, titetasojtas uan tiyolseujtos.* Xikchiua nejin iniuan akin takuaujtamatij iuan toTekotsin uan yolchipaujkej.
23 Uan no, amo ximokalaki keman ika monojnotstoskej tein amo tapaleuia uan nenkaj, porin tikmati ke nejon kichiua maj se moteui.
24 Itekitikauj toTekotsin amo moneki moteuis, ta moneki yeski kualtakat iniuan nochin, kimatis keniuj tamachtis, amo momakepas keman kichiuiliskej tein amo kuali
25 uan yeski yolnejmach keman kinmachtis akin amo kiuelkakij tein motamachtia. Dios xa kinkauas maj moyolpatakan para maj kuali kiixmatikan tein melauak,
26 uan ijkon oksepa yektanemiliskej uan momakixtiskej imako in Amokuali, porin yejua kinkitskijtok para maj kichiuakan tein yejua kineki.
Tajtolmelaualismej
^ Oso “mitspaleuis kuali xikixejeko”.
^ Itech griego, “moajokuik”.
^ Oso “tajtolmej”.
^ Oso “amo ilpitok (tsikaujtok) ika cadena”.
^ Oso “kinixpejpenak”.
^ Oso “moixnamiki”.
^ Oso “kuali xikinixmatilti”.
^ Oso “kinixpoloua”, “kinuetsiltia”.
^ Oso “kokoxkayot”.
^ Itech griego, “Xikcholui (xikcholouili)”.
^ Oso “kuali timouikas iniuan oksekin”.
