Génesis 2:1-25
2 Ijkon Dios kitamichijchiuak iluikak, taltikpak uan nochi tein onkak.
2 Itech chikuasentika tonal, Dios matamik tekit tein kichiujtoya. Uan itech chikometika tonal, peuak moseuia uan amo tachijchiuakok.
3 Dios kitiochiuak chikometika tonal uan moxelouilij, porin itech nejin tonal Dios moseuijtok satepan ke kichijchiuak nochi ijkon kemej kiixtalijka.
4 Yejua nejin tein panok itech tonal keman Jehová* Dios kichijchiuak iluikak uan taltikpak.
5 Itech taltikpak ayamo onkayaj koujmej uan ayamo taxiujyouaya, porin Jehová Dios ayamo takiouiltiaya, uan ayamo akin nemia para tatokas.
6 Sayoj ke pankisaya mixti uan kiajuachuiaya nochi in tal.
7 Uan Jehová Dios peuak kichijchiua takat ika tal uan kiyekapitsak para maj ueli nemi. Uan takat peuak nemi.*
8 Uan no, Jehová Dios kichijchiuak se xochital ompa Edén, kampa ika ualkisa tonaltsin uan ompa kitalij takat akin kichijchiujka.
9 Uan Jehová Dios kichiuak maj moskaltikan nochi tataman koujmej tein kualtsitsin katkaj uan tein kitemakayaj kuajkuali takilot tein ueli se kikua. No kichiuak maj moskalti tatajko den xochital kouit tein kiixnextia se inemilis uan kouit tein kiixnextia akoni kinamiki kiixtalis tein kuali uan tein amo kuali.
10 Desde Edén kisaya miak at tein kiajauiaya xochital uan satepan naujkan moxelouaya nejon at.
11 Yekinika at tein moxeloua monotsa Pisón. Nejon at kiyoualoua nochi in tal kampa motanotsa Havilá, kampa onkak oro.
12 Oro tein ompa onkak tel kuali. Ompa no onkak chokil tein ajuiyak tein monotsa bedelio uan tetsin tein monotsa ónice.
13 Ojpatika at tein moxeloua monotsa Guihon. Nejon at kiyoualoua nochi in tal kampa motanotsa Cus.
14 Expatika at tein moxeloua monotsa Hidequel.* Nejin at panoua Asiriajkopa uan youi kampa ika ualkisa tonaltsin. Uan naujpatika at tein moxeloua monotsa Éufrates.
15 Jehová Dios kitalij takat itech xochital tein kichijchiujka ompa Edén para maj kiyekpia uan maj tatoka.
16 Uan no, Jehová Dios kinauatij takat nejin: “Uelis tikuas nochin koujtakilomej tein moajsij itech xochital hasta tiixuis.
17 Sayoj ke amo uelis tikuas itakilo kouit tein kiixnextia akoni kinamiki kiixtalis tein kuali uan tein amo kuali, porin itech tonal keman tikuas xikyekmati ke timikis”.
18 Uan Jehová Dios kijtoj: “Amo kuali yetok maj takat kisentoka iselti. Nikchijchiuiliti se akin kinamikis uan kipaleuis”.
19 Jehová Dios kinchijchiujtoya ika tal nochin koujtajtapialmej uan okuiltsitsin tein patanij ejekaixko. Uan kinuikilijtiaya in takat para kiitas keniuj kitokaytiskia sejse tapial. Uan sejse tapial monotsak kemej takat kijtoj.
20 In takat kintojtokaytij tapialmej tein momatij kalijtik, okuiltsitsin tein patanij ejekaixko uan koujtajtapialmej. Sayoj ke takat amo kipiaya se akin kinamikiskia uan kipaleuiskia.
21 Yejua ika, Jehová Dios kichiuak maj takat tel kochini, uan keman kochtoya kinalkixtilij se ielchikiuj, uan satepan oksepa kikauak inakayo kemej yetoya.
22 Uan ika nejon omit tein kikixtilijka, Jehová Dios kichijchiuak se siuatsin uan kiuikilij in takat.
23 Uan takat kijtoj:
“Axkan kemaj se akin kemej nejua.Iomiyouan uan inakayo notech kiskej.
Monotsati Siuat,porin Dios kikixtij de nonakayo”.
24 Yejua ika, takat kikauas itat uan inan, nemis* iuan isiuatsin uan yejuan mochiuaskej sayoj se.
25 Uan in takat uan isiuatsin amo takentoyaj. Maski ijkon, amo mopinaujmatiaj.
Tajtolmelaualismej
^ Itech Biblia nikan kampa yekinika ixnesi itokay Dios, יהוה (YHWH). Xikonita A4.
^ Oso “takat yoltoyaya”. Tajtol hebreo néfesh, kijtosneki ‘se akin mijyotia (ijsika)’. Xikonita néfesh.
^ Oso “Tigris”.
^ Oso “yetos”. Tajtol hebreo kiteajsikamatiltia pepechiujtos.
