Levítico 20:1-27
20 Jehová no kiluij Moisés nejin:
2 “Moneki tikiniluis israelitas: Komo se israelita oso akin okseko kayot uan nemi Israel kimaktilia Mólek* se ikoneuj, moneki mikis. Akin ompa nemij moneki kitetemaskej* hasta maj miki.
3 Nejua nikixtopeuas akin kichiuas nejon uan nikixpolos, porin kimaktilij Mólek se ikoneuj, tapitsotilij kampa nitaxeloj uan kichiuak maj amo kuali noka tajtokan.
4 Komo akin ompa nemij kichiuaj kemej yeskia amo kiitaj akin kimaktilia Mólek se ikoneuj uan amo kimiktiaj,
5 nejua nikixtopeuas yejua uan ichankauan. Nikixpolos yejua uan no akin iuan kiueyichiuaj* Mólek.
6 ”’Akin nechkauas uan kintemos akin kinnojnotsaj mikemej uan adivinos, kemej yeskia auilnemis iniuan okseki dioses. Xikyekmatikan ke akin kichiuas nejon nikixtopeuas uan nikixpolos.
7 ”’Namejuan moneki nanyeskij nanchipaujkej uan nanxeliujtoskej para nejua, porin nejua namoDios Jehová.
8 Uan moneki nankitakamatiskej notanauatiluan. Nejua niJehová, akin namechxelojtok.
9 ”’Akin kiuijuikaltis* itat oso inan, moneki mikis. Yejua motemolij maj kimiktikan* porin kiuijuikaltij itat oso inan.
10 ”’Uan komo se takat moteka iuan se tesiuauj, moneki mikis. Moneki kimiktiskej yejua uan no siuat.
11 Akin moteka iuan itakpanan, kipinaujtia itat. Nejon omen moneki mikiskej. Yejuan motemolijkej maj kinmiktikan.
12 Komo se takat moteka iuan isiuamon, nejon omen moneki mikiskej. Dios amo kiixtalij maj ijkon kichiuakan. Yejuan motemolijkej maj kinmiktikan.
13 ”’Komo se takat moteka iuan se itakaikniuj kemej moteka iuan se siuat, nejon omen kichiuaj tein tetajyaltij. Moneki mikiskej. Yejuan motemolijkej maj kinmiktikan.
14 ”’Komo se takat moteka iuan se siuat uan no iuan inan nejon siuat, tein kichiuaj semi pitsotik. Moneki kinmiktiskej uan kinchichinoskej nejon eyin para maj amo akinok kichiua tein pitsotik.
15 ”’Komo se takat moteka iuan se tapial* moneki mikis, uan no moneki nankimiktiskej tapial.
16 Komo se siuat moteka iuan se tapial, moneki tikmiktis siuat uan tapial. Moneki mikiskej. Yejuan motemolijkej maj kinmiktikan.
17 ”’Komo se takat moteka iuan iikniuj, yeski isiuapil itat oso isiuapil inan, nejon tepinaujtij. Moneki kinmiktiskej ininixpan nochin. Nejon takat kipinaujtij iikniuj. Moneki kitatsakuiltiskej.
18 ”’Komo se takat moteka iuan se siuat keman estemotok, moneki kinmiktiskej porin nion semej kiitak esti kemej Dios kiita.
19 ”’Amo ximoteka iuan motía, yeski iikniuj momaj oso iikniuj mopaj, porin nejon kipinaujtiskia se mochankauj. Nanomen moneki namikiskej.
20 Takat akin moteka iuan isiuatsin itío, kipinaujtia itío. Nejon omen moneki kintatsakuiltiskej. Mikiskej uan amo kinpiaskej ininkoneuan.
21 Komo se takat monamiktia iuan icuñada, nejon tetajyaltij.* Nejon takat kipinaujtia iikniuj. Amo kinpiaskej ininkoneuan.
22 ”’Xiktakamatikan nochi notanauatiluan uan nochi tein nikixtalia. Komo amo ijkon nankichiuaj, tal kampa namechajxititi kemej yeskia namechijsotas.
23 Amo xinemikan kemej akin ompa nemij. Nikinkixtiti porin kichiuaj nochi nejon uan nechtajyaltiaj.
24 Yejua ika namechiluij: “Namejuan namokauiliskej inintal akin nemij itech nejon altepemej uan nejua namechmakas nejon tal kampa onkak miak leche uan nekti.* Nejua namoDios Jehová, akin namechxeloj para amo ximonelokan iniuan akin nemij itech okseki xolalmej”.
25 Moneki nankimatiskej katin tapial chipauak uan katin amo chipauak, uan katin totot chipauak uan katin amo chipauak. Amo xikuakan nion se tapial, nion se totot oso nion se okuilij tein moxoxolatsa, tein namechiluij ke amo chipaujkej para amo nantetajyaltiskej.
26 Moneki nanyeskij nanchipaujkej porin nejua Jehová, senkis nichipauak. Sayoj namejuan namechxelojtok para xinoaxkauan, amo kemej akin nemij itech okseki xolalmej.
27 ”’Akin kinnojnotsas mikemej oso yeski adivino moneki mikis, yeski takat oso siuat. Nochin moneki kintetemaskej* hasta maj mikikan. Yejuan motemolijkej maj kinmiktikan’”.
Tajtolmelaualismej
^ Oso “kitepoxoniskej”, “kimojmotaskej ika tet”.
^ Itech hebreo, “auilnemij”.
^ Oso “kinejnekilis tein amo kuali”, “kitejtelchiuas (kijijtos)”.
^ Itech hebreo, “Iesyo itech yetok”. Nejin mokuis itech nochi capítulo.
^ Nejin kijtosneki motekas iuan se tapial kemej motekaskia iuan se siuat.
^ Nejin kijtosneki komo kikui keman iikniuj yoltokok.
^ Oso “miel”.
^ Oso “kintepoxoniskej”, “kinmojmotaskej ika tet”.
