Apocalipsis 11:1-19
11 Uan nechmakakej se akat tein tamatia kemej se takot tein ika se tatamachiua uan yejua nechiluij: “Ximoketsa uan xiktamachiua itemplo Dios, altar uan akin ompa taueyichiuaj.
2 Sayoj ke xikixpanaui kalixpan den templo uan amo xitatamachiua ompa, porin kinmaktilijkej akin pouij itech altepemej, uan yejuan kintajyouiltiskej akin pouij itech ueyi xolal tein yektik 42 metsti.
3 Nikchiuas maj ome notaixpantijkauan kiteixmatiltikan tein Dios kiniluis 1,260 tonalmej uan maj takentiakan ika tasal tein teajuayotia”.
4 Nejin taixpantinij kinixnextiaj ome olivojkouit uan ome tauilketsaloni, uan ijkatokej iixpan akin taixyekana itech taltikpak.
5 Komo aksa* kineki kinchiuilis teisa, inintenoj kisa tit* tein kinixpoloua akin kintauelitaj. Ijkon moneki mikis akin kinekis kinchiuilis teisa.
6 Yejuan kipiaj tanauatil para tatsakuaskej ne iluikak uan kichiuaskej maj amo kioui itech tonalmej keman kiteixmatiltiskej tein Dios kiniluis. No kipiaj tanauatil para kichiuaskej maj at mokepa esti uan maj mochiua miak taman tein amo kuali nikan taltikpak nochipa keman kinekiskej.
7 Keman kitamiteixmatiltiskej tein Dios kiniluis, koujtajtapial tein ualkisa itech ueyi ostok* tein uejkatan kinteuis, kintanis uan kinmiktis.
8 Ininnakayo uetstos itech ueyi ojti tein kipia ueyi xolal kampa ininTeko no kikoujpampilojkej, uan Sodoma uan Egipto kiixnextiaj nejin ueyi xolal.
9 Akin pouij itech tataman xolalmej, uejueyi kalyetonij, akin tajtouaj tataman tajtolmej uan akin pouij itech tataman altepemej, kiitstoskej ininnakayo nejon akin kinmiktijkej eyi tonal uan tajko, uan amo kinkauaskej maj kintokakan.
10 Uan akin nemij nikan taltikpak yolpakiskej uan iluitiskej porin kinmiktijkej uan motatayokoliskej miak taman se iuan okse, porin nejin ome tanauatianij* kintajyouiltijkaj akin nemij nikan taltikpak.
11 Keman panok nejon eyi tonal uan tajko, Dios kichiuak maj oksepa nemikan,* uan yejuan moketskej. Akin kinitakej motelmoujtijkej.
12 Uan yejuan kikakkej ke aksa chikauak ualtajtouaya ne iluikak uan kiniluiaya: “Xiualpankisakan”. Uan pankiskej ne iluikak itech se mixti, uan akin kinixnamikiaj kinitakej.*
13 Itech nejon hora chikauak talolinik. Ueyi xolal moxeloj itech majtakti cachos uan xixitikak se cacho uan chikome mil momikilijkej keman talolinik. Oksekin semi mojkakalakkej uan kiueyitalijkej Dios akin yetok ne iluikak.
14 Ojpatika ouijkayot panokya. ¡Xikitakan! Expatika ouijkayot ejkotokya.
15 Chikometika ángel kipitsak itrompeta. Uan mokakik ke chikauak tajtouayaj ne iluikak. Kijtouayaj: “Axkan Dios uan iCristo taixyekantokejya itech nochi taltikpak, uan yejua taixyekanas kemej tekiuaj nochipaya”.
16 Nochin 24 tayekananij akin tokotsyetoyaj itech ininueyi silla iixpan Dios motankuaketskej uan moixpilojkej hasta talpan uan kiueyichiujkej Dios.
17 Kijtojkej: “Timitstasojkamatiliaj toDios Jehová,* akin tikpia nochi chikaualis, akin axkan tinemi uan akin achto ipa tinemia, porin tikuik moueyi chikaualis uan peuakya titaixyekana kemej tekiuaj.
18 Sayoj ke akin pouij itech altepemej semi kualankej, uan tikinnextilij moueyi kualanyo. Uan ejkok tonal tein ixyetok para tikixtalis tein kinnamiki kiseliskej mikemej uan tikintaxtauis tanauatianij akin mitstekitiliaj, akin timoinxelouilij* uan akin kimojkatokaj motokay (akin ueyichiuanimej uan akin amo), uan para tikinixpolos akin kiixpolojtokej taltikpak”.
19 Uan tapouik itemplo Dios ne iluikak uan moitak tatiochiualkaxon* itech itemplo. Uan tapepetanik, mokakik ke tajtouayaj, tatitikuinik, talolinik uan chikauak tesiuik.
Tajtolmelaualismej
^ Oso “akin”, “akaj”.
^ Oso “tekol”.
^ Oso “tekoch”. Xikonita ueyi ostok.
^ Xikonita tanauatijkej.
^ Oso “oksepa kinijyomakak”.
^ Oso “kinitstoyaj”.
^ Oso “chipaujkej moixpan”.
^ Oso “kaxon tein kiixnextia tein Dios motenkauak”.
