Apocalipsis 12:1-17
12 Moitak ne iluikak se ueyi taman tein kiixnextia teisa: se siuat mokentijtoya tonaltsin, metsti yetoya imetstampa uan kuaaktoya se corona tein kipiaya 12 sitalimej.
2 Kokoxkayetoya, uan kemej yaya tayolititiya, chikauak tsajtsia porin semi tajyouijtoya.
3 Uan ne iluikak moitak okse taman tein kiixnextia teisa: nesiko se ueyi kouat tamouilil, chichiltik kemej tit.* Kipiaya chikome itsontekonuan uan majtakti ikuaomiyouan uan itech itsontekonuan kipiaya chikome coronas.
4 Sitalimej exkan moxelojkej uan ika ikuitapil kinkuitikisak se cacho de nejon sitalimej uan kinualpantamotak nikan taltikpak. Uan ueyi kouat tamouilil ijkatoya iixpan siuat akin yaya tayolititi, ijkon keman tayolitiskia kikualiskia ikonetsin.
5 Siuat kiyolitij se okichpiltsin akin kinixyekanas* akin pouij itech nochin altepemej ika se takot tachijchiuj ika tepos. Nimantsin keman konetsin yolik, kiuikilijkej Dios akin yetok itech iueyi silla.
6 Uan siuat choloj uan yajki taluakyan, kampa Dios kitakauilijkaya uan kampa kitamakaskiaj 1,260 tonalmej.
7 Uan peujkej moteuiaj ne iluikak. Miguel* uan iangeluan moteuijkej iuan ueyi kouat tamouilil. Uan ueyi kouat tamouilil uan iangeluan no moteuijkej,
8 sayoj ke amo tatankej,* uan amo kinkaujkejok maj yetokan ne iluikak.
9 Yejua ika kiualpantamotkej ueyi kouat tamouilil. Yejua yekinika kouat* tein kiluiaj Amokuali uan Satanás, tein kinkajkayaujtok nochin akin nemij nikan taltikpak. Kiualpantamotkej nikan taltikpak uan iangeluan no kinualpantamotkej iuan.
10 Uan nikakik ke aksa* chikauak kijtouaya ne iluikak:
“¡Axkan Dios kinmakixtij akin nemij taltikpak uan kinextijya ichikaualis. Peuakya taixyekana, uan iCristo peuakya kikui itanauatil! Porin kipantamotkejya akin kinteluilia tokniuan uan kintakajkayauilia youalintonal iixpan toDios.
11 Yejuan kitankej porin kinpaleuij iesyo Ichkatsin* uan no tein kiteixmatiltijkej, uan yejuan amo moujkej mikiskej* nion keman kiitayaj ke mikitijya.
12 Yejua ika, ¡xiyolpakikan akin nanemij ne iluikak! Sayoj ke ¡teikneltij taltsin uan ueyiat! Porin Amokuali pantemok kampa nanyetokej uan semi kualantok porin kimati ke amo uejkauatiok”.
13 Keman ueyi kouat tamouilil kiitak ke kiualpantamotkej nikan taltikpak, kiikantokak siuat akin yekin kiyolitijka okichpiltsin.
14 Sayoj ke siuat kimakakej ome ajtapalmej kemej tein kipia se ueyi totot* para maj patani hasta taluakyan, kampa Dios kitakauilij, kampa moneki kitamakaskej eyi xiuit uan tajko* uan kouat amo kiajsis.
15 Uan kouat kikanpeyauak miak at iikampa siuat, kemej se ueyiat para maj moaeltsimiani.
16 Sayoj ke tal kipaleuiko siuat. Nejon tal motapoj uan kitoloj at tein ueyi kouat tamouilil kikanpeyauak.
17 Yejua ika ueyi kouat tamouilil semi kitauelitak siuat uan kinteuito ikoneuan akin mokauajok. Yejuan akin kitakamatij itanauatiluan Dios uan kiteixmatiltiaj Jesús.
Tajtolmelaualismej
^ Oso “tekol”.
^ Oso “kintatsakuiltis”.
^ Tein kijtosneki ‘¿akoni kemej Dios?’.
^ Oso xa “sayoj ke kitankej”. Nikan ika tajtojtok ueyi kouat tamouilil.
^ Oso “kouat tein uejkaujkayot”.
^ Oso “akin”, “akaj”.
^ Oso “Borrego”.
^ Oso “águila”.
^ Oso “se tiempo, ome tiempo uan tajko tiempo”.
