Apocalipsis 14:1-20
14 Uan nikitak Ichkatsin* ijkatoya itech tepet Sion, uan iuan yetoyaj 144 mil akin ininixkuako ijkuiliujtoya itokay Ichkatsin uan itokay iTajtsin.
2 Nikakik ke teisa kakistia ne iluikak; mokakia kemej ijkuak miak at ijkoyoka uan kemej ijkuak chikauak tatikuini. Tein nikakik kakistia kemej ijkuak mokuikatiaj* akin kitsotsonaj arpa.
3 Tein yejuan mokuikatijtoyaj iixpan ueyi silla, ininixpan naui ángeles uan tayekananij, mokakia kemej se yankuik tatsotson. Amo akin kuali kimatia keniuj yaya nejon tatsotson, ta sayoj 144 mil akin pouiaj nikan taltikpak uan kinkoujkej.
4 Yejuan akin amo mopitsotilijkej iniuan siuamej; tein melauj, amo akin iuan motekanij.* Kitojtokatinemij Ichkatsin kampa yeski. Pouiaj nikan taltikpak uan kinkoujkej kemej yekinika takilot tein kimaktiliaj Dios uan Ichkatsin.
5 Amo takajkayaujkej uan amo kipiaj nion teyi tein amo kuali.
6 Nikitak okse ángel tein patantoya ejekaixko. Yejua kinixmatiltijtoya akin nemij itech taltikpak kuali tanauatilmej* tein amo keman ixpoliuij: nochin akin pouij itech tataman altepemej, itech tataman uejueyi kalyetonij, akin tajtouaj tataman tajtolmej uan tataman ininxolal.
7 Chikauak kijtouaya: “Xikmojkatokakan Dios uan xikueyitalikan porin ejkokya tonal keman tetatsakuiltis. Yejua ika xikueyichiuakan akin kichijchiuak iluikak, taltikpak, ueyiat uan ameyalmej”.*
8 Satepan nesik se ojpatika ángel, tein kijtouaya: “¡Tapolojya! ¡Ueyi Babilonia tapolojya! Nejon akin kichiuak maj nochin altepemej tayikan ivino tein kichiua maj kitelnekikan auilnemiskej”.*
9 No nesiko se expatika ángel uan chikauak kijtouaya: “Komo aksa* kiueyichiua koujtajtapial uan itaixkopin tamachijchiuj uan kineskayotiaj iixkuako oso imako,
10 no tayis ivino Dios, tein kiixnextia iueyi kualanyo. Nejon vino amo maneliujtok ika okse tayil, uan Dios kipantekas itech icopa kampa kitalia iueyi kualanyo, uan kitajyouiltiskej ika tit* uan azufre, ininixpan ángeles tein yektikej uan iixpan Ichkatsin.
11 Pokti tein kikixtia tit* tein kintajyouiltis pankistos nochipaya. Uan akin kiueyichiuaj koujtajtapial uan itaixkopin tamachijchiuj uan akin kinneskayotiaj ika itokay, youalintonal tajyouijtoskej.
12 Yejua ika akin Dios moinxelouilij* moneki taxikoskej. Yejuan akin kitakamatij itanauatiluan Dios uan takuaujtamatij iuan* Jesús”.
13 Uan nikakik ke aksa ualtajtoj ne iluikak uan kijtouaya: “Xikijkuilo nejin: ‘Yolpakij akin pouij iuan toTekotsin uan desde axkan momikiliaj; Dios kijtoua ika ichikaualis, kemaj, maj moseuikan porin chikauak tekitikej, porin tein kichiujkej amo moelkauas’”.*
14 Nikitak se istak mixti, uan ompa tokotsyetoya se akin tamatia kemej se akin yolik kemej takat; itech itsontekon kiuikaya se corona tachijchiuj ika oro, uan maaktoya se tepos tein semi tenej.
15 Okse ángel kisak den templo uan chikauak kitsajtsilij akin tokotsyetoya itech mixti: “¡Xikui tepos tein semi tenej uan xiksentili tatok. Ejkokya hora keman moneki se kisentilis tatok, porin tatok tein motemakak tamichikauayakya!”.
16 Uan akin tokotsyetoya itech mixti, peuak kisentilia tatok tein mochiuak itech taltikpak ika se tepos tein semi tenej.
17 Okse ángel kisak den templo tein yetok ne iluikak; yejua no kipiaya se tepos tein semi tenej.
18 Uan den altar kisak okse ángel, tein kipiaya tanauatil itech tit.* Uan chikauak kiluij akin kipiaya tepos tein semi tenej: “¡Xikui tepos tein semi tenej uan xikmateki uvajkouit tein mochiuak itech taltikpak uan xiksentili, porin uvas yoksikejya!”.
19 Ángel kikalakij tepos tein semi tenej itech taltikpak uan kitekik uvajkouit, uan kitamotak itech ueyi tekoch kampa kipatskaj uvas tein kiixnextia iueyi kualanyo Dios.
20 Caballos kimetspatskakej uvas ne ueyi xolaltenoj, uan peuak kisa esti itech ueyi tekoch uan ajsik hasta ininxipoj caballos, uan sentakuik* kemej 296 kilómetros.*
Tajtolmelaualismej
^ Oso “Borrego”.
^ Oso “cantarouaj”.
^ Oso “chipaujkej”.
^ Oso “tajtolmej”.
^ Oso “amelmej”.
^ Tajtol griego, pornéia. Xikonita auilnemilis.
^ Oso “akin”, “akaj”.
^ Oso “tekol”.
^ Oso “tekol”.
^ Oso “chipaujkej iixpan Dios”.
^ Oso “kemej”.
^ Itech griego, “iniuan youi”.
^ Oso “tekol”.
^ Oso “motamimoyauak”.
^ Itech griego, “1,600 estadios”. Itamachiuj se estadio katka 185 metros.
