Apocalipsis 20:1-15
20 Nikitak se ángel tein ualpantemouaya de ne iluikak, maaktiualaya llave tein ika kitapoua ueyi ostok* tein uejkatan uan no maaktiualaya se ueyi cadena.
2 Kikitskij ueyi kouat tamouilil, yekinika kouat, in Amokuali uan Satanás uan kiilpij* mil xiujmej.
3 Uan kipankajkauak itech ueyi ostok* tein uejkatan, kitentsakuak uan kitalilij se sello para maj amo akinok kikajkayaua hasta maj tami mil xiujmej. Satepan kikajkauaskej seki tonalmej.
4 Nikitak uejueyi sillas, uan akin ompa motalijkej kinmaktilijkej tanauatil para kiixtaliskej tein kinnamiki kiseliskej akin nemij nikan taltikpak. Kemaj, nikitak ininesyo* akin kinmiktijkej* porin kiteixmatiltijkej Jesús uan ika tajtouayaj Dios. Yejuan amo kiueyichiujkej koujtajtapial nion itaixkopin tamachijchiuj uan amo kinneskayotijkej ininixkuako nion ininmako. Yejuan oksepa nenkej uan tekiuajtikej iuan Cristo mil xiujmej.
5 Yejuan akin yekinika oksepa nemij. (Okseki mikemej oksepa nenkej hasta ke tamik mil xiujmej).
6 Yolpakij uan yektikej akin yekinika oksepa nenkej; ojpatika mikilis amo teyi kinchiuilis, ta yeskij itiopixkauan Dios uan Cristo uan iuan tekiuajtiskej mil xiujmej.
7 Sayoj ke, keman tamis mil xiujmej, kikajkauaskej Satanás
8 uan takajkayauatiuj itech nejon altepemej tein yetokej naujkampa itech taltikpak, nejin yejuan Gog uan Magog, para kinsentilis uan maj tateuikan. Amo ueli se kinpoua porin tel miakej kemej xal tein yetok ueyi atenoj.
9 Uan yejuan momoyaujkej* itech nochi taltikpak uan kiyoualojkej inintakenkaluan akin Dios moinxelouilij* uan ueyi xolal tein Dios kitasojta. Sayoj ke ualpantemok tit* uan kintamichichinoj.
10 Amokuali, akin kinkajkayaujtoya, kipantamotkej kampa kuakualakatok* tit kampa yetoyaya koujtajtapial uan tanauatijkej tein amo melauak. Yejuan kintajyouiltiskej* youalintonal nochipaya.
11 Nikitak se ueyi silla istak uan akin ompa tokotsyetoya. Taltikpak uan iluikak cholojkej uan amo keman oksepa kinitakej.
12 Uan nikinitak akin momikilijkaj, akin ueyichiuanimej uan akin amo, ijkatoyaj iixpan ueyi silla uan motapojkej amatajkuilolmej.* Sayoj ke motapoj okse amatajkuilol, nejin yejua kampa ixnesij akin nemiskej. Uan akin tokotsyetok itech ueyi silla kiixtalij tein kinnamiki kiseliskej akin momikilijkaj por nochi tein kichiujkej, ijkon kemej ijkuiliujtoya itech nejon amatajkuilolmej.
13 Ueyiat kintemakak mikemej akin ompa yetoyaj, uan mikilis uan Miketekoch* kintemakakej mikemej akin ompa yetoyaj. Uan kiixtalijkej tein kinamiki kiselis sejse por nochi tein kichiuak.
14 Mikilis uan Miketekoch* kinpantamotkej kampa kuakualakatok* tit, tein kiixnextia ojpatika mikilis.
15 Uan no, akin amo ijkuiliujtoyaj itech amatajkuilol kampa ixnesij akin nemiskej, kinpantamotkej kampa kuakualakatok* tit.
Tajtolmelaualismej
^ Oso “tekoch”. Xikonita ueyi ostok.
^ Oso “kitsikoj”.
^ Oso “tekoch”. Xikonita ueyi ostok.
^ Itech griego, “kinmiktijkej ika hacha”.
^ Oso “moxinijkej”.
^ Oso “chipaujkej iixpan Dios”.
^ Oso “tekol”.
^ Oso “molontok”.
^ Oso “tsaktoskej”.
^ Itech griego, “amatatetekuinolmej”. Xikonita amatatetekuinol.
^ Oso “Hades”, kampa moseuijtokej mikemej. Xikonita miketekoch.
^ Oso “Hades”, kampa moseuijtokej mikemej. Xikonita miketekoch.
^ Oso “molontok”.
^ Oso “molontok”.
