Colosenses 4:1-18
4 Namejuan akin nankinpiaj takeualmej, xikinchiuilikan tein kuali namotakeualuan uan amo xikinchichikotasojtakan.* Xikelnamikikan ke namejuan no nankipiaj se namoTeko ne iluikak.
2 Nochipa xikchiujtokan netataujtil; xiijsatokan* uan ximotasojkamatikan.
3 Uan no, xiktataujtikan Dios maj techpaleui maj tiuelikan tikteixmatiltikan itajtol uan tein Dios amo kitematiltijtoya* tein ika tajtoua Cristo. Kemej nikteixmatiltia nejin, nitsaktok uan niilpitok* ika cadena.
4 No xiktajtanikan Dios maj nechpaleui maj niyektajto keman nikteixmatiltis, ijkon kemej moneki nikchiuas.
5 Xiknextikan ke nantamatinij keman nanyetoskej iniuan akin amo taneltokaj uan kuali xikuikan namotiempo.*
6 Nochipa kualtsin xitenojnotsakan kemej ijkuak nankipoyeliaj se tapalol para maj uelia, uan ijkon nankimatiskej keniuj moneki nantanankiliskej.
7 Noknitsin Tíquico namechtapouis keniuj nietok. Yejua takuaujtamach uan nouan kitekitilia toTekotsin kemej takeual.
8 Namechtitanilia para maj namechmatilti keniuj tietokej uan para maj namechyolseui.
9 Iuan yas noknitsin Onésimo, akin takuaujtamach uan namouan yetoya. Yejuan namechtapouiskej nochi tein nikan panotok.
10 Aristarco, akin nouan tsaktok, namechontajpaloua uan no Marcos, iprimo Bernabé (akin moneki nankiseliskej ika pakilis komo namechitati, ijkon kemej tamechnauatijkej),
11 uan Jesús akin kiluiaj Justo no namechontajpaloua. Yejuan judíos.* Sayoj yejuan nouan tekititokej uan nouan kiteixmatiltiaj iTaixyekanalis Dios, uan semi nechpaleuianij uan nechyolchikauanij.
12 No namechontajpaloua Epafras, akin namouan yetoya uan kitekitilia Cristo Jesús. Yejua nochipa chikauak namoka motataujtia, para xiksentokakan semi xitakuaujtamatikan uan senkis xikyekmatikan ke melauak nochi tein Dios kineki.
13 Uelis nikyekijtos ke yejua chikauak tekiti para namechpaleuis namejuan, uan no akin yetokej Laodicea uan Hierápolis.
14 Lucas, tapajtijkej akin tiktasojtaj uan no Demas, namechontajpalouaj.
15 Xinechintajpalouilikan tokniuan akin yetokej Laodicea, toknitsin Ninfa uan tokniuan akin mosentiliaj ichan.
16 Satepan ke moixtajtoltis* nejin amatajkuilol, maj no moixtajtolti itech nechikol ompa Laodicea, uan amatajkuilol tein nikintitanilij yejuan, xikixtajtoltikan* namejuan.
17 Uan no, xikiluikan Arquipo: “Xiksentoka chikauak xitekiti para tiktamichiuas tekit tein toTekotsin mitsmakak”.
18 Nejua Pablo, nikmaijkuiloua nejin tajtolmej tein ika namechtajpaloua. Xikelnamiktokan ke nitsaktok uan niilpitok* ika cadena. Maj Dios namechmaka itatiochiualis tein amo technamiki.
Tajtolmelaualismej
^ Oso “amo xikinchichikouikan”.
^ Oso “xitachixtokan”, “xiixpetantokan”.
^ Xikonita tein Dios amo kitematiltijtoya.
^ Oso “nitsikaujtok”.
^ Oso “amo xitonalpolokan”. Itech griego, “xikouakan tiempo tein ixyetok”.
^ Oso “kintekkej”. Xikonita circuncisión.
^ Oso “moleros”.
^ Oso “xiklerokan”.
^ Oso “nitsikaujtok”.
