Filipenses 4:1-23
4 Notasojikniuantsitsin, semi namechtasojta uan semi nikneki namechitas. Namejuan nankichiuaj maj niyolpaki uan namechita kemej se corona. Xiksentokakan amo ximotsinkixtikan kemej itatojtokakauan toTekotsin, ijkon kemej namechiluij.
2 Niktataujtia Evodia uan Síntique maj kipiakan sayoj se tanemilil kemej itatojtokakauan toTekotsin.
3 Uan tejua akin yekmelauj tinotekitikaikniuj, no nimitsiluia xiksentoka xikinpaleui nejin siuamej akin mochikauanij kiteixmatiltiskej kuali tanauatilmej* nouan uan iuan Clemente uan no iniuan okseki notekitikaikniuan, akin inintokay ijkuiliujtok itech amatajkuilol kampa ixnesij akin nemiskej.
4 Nochipa xiyolpakikan kemej itatojtokakauan toTekotsin. Oksepa namechiluia: ¡xiyolpakikan!
5 Maj nochin kimatikan ke namejuan amo nankitemouaj maj nochipa mochiua tein nankinemiliaj. ToTekotsin amo uejka yetok.
6 Amo teyi ika ximoteltekipachokan, ta nochipa xikchiuakan netataujtil uan chikauak xiktataujtikan Dios maj namechixyekana itech tein yeski taman tein nankipanoskej uan nochipa xiktasojkamatilikan.
7 Komo nankichiuaj nejin, Dios namechyolseuis kemej amo akin ueli kiajsikamati, uan nejon kiyekpias namoyolo uan namotanemilil* itechkopa Cristo Jesús.
8 Yejua ika nokniuan, nochipa xitanemilijtokan itech nochi tein melauak, itech nochi tein amo se kiauilmati, itech nochi tein Dios kiita ke kuali yetok,* itech nochi tein chipauak, itech nochi tein kichiua maj se tetasojta, itech nochi tein kuali ika motajtoua,* itech nochi tein kuali uan itech nochi tein kinamiki maj kiueyitalikan.
9 Xikchiuakan tein namechmachtij, tein nankineltokakej, tein nanechkakilijkej uan tein nankiitakej ke nikchiuak, uan Dios akin teyolseuia namouan yetos.
10 Semi niyolpaki uan niktasojkamatilia toTekotsin maj axkan oksepa noka xitanemilikan. Maski ipa noka nantanemilijtoyaj, amo nanueltoyaj nankinextijtoyaj.
11 Amo nikijtoua nejin porin amo nikpia tein ika nimoixpanoltis, porin nikmati keniuj niyolpakis* itech tein yeski taman tein nikpanos.
12 Nikmati keniuj se nemi keman amo teyi se kipia uan nikmati keniuj se nemi keman se kitelpia. Itech nochi uan itech tein yeski taman tein nikpanouani, nikmati tein amo miakej kimatij: keniuj se yolpakis keman se ixuitos uan keman se mayantos, keman se kitelpias uan keman amo teyi se kipias.
13 Nikpia chikaualis para nikixnamikis nochi porin Dios nechmaka chikaualis.
14 Sayoj ke, semi kuali tein nankichiujkej porin nanechpaleuijkej keman nitajyouijtoya.
15 Tein melauj, nokniuan akin nanyetokej Filipos, no nankimatij ke satepan ke yekinika nankikakkej kuali tanauatilmej uan nikisak de Macedonia, itech nion se nechikol nechpaleuijkej nion kinekkej maj nikinpaleui, ta sayoj namejuan;
16 porin keman nietoya Tesalónica, namejuan nanechtitanilijkej tein ika nimoixpanoltis, uan amo sayoj sepa, ta ojpa.
17 Amo niktemojtok xinechtayokolikan teisa, ta sayoj nikneki xikmiakilikan tein kuali tein nankichiuaj iixpan Dios.
18 Sayoj ke nikpia nochi tein nechpoloua uan okachiok. Amo teyi nechpolouaok porin Epafrodito nechmakak tein namejuan nanechtitanilijkej. Tein nanechtayokolijkej kemej yeskia se taman tein kualtsin ajuiyak tein nankimaktilijkej Dios uan tein yejua kiyolpaktia.
19 Yejua ika, noDios akin semi techtatiochiuia, namechmakas nochi tein namechpolos itechkopa Cristo Jesús.
20 ToDios uan toTajtsin kinamiki maj kiueyitalikan nochipaya. Maj ijkon mochiua.*
21 Xinechintajpalouilikan nochin akin Dios moinxelouilij,* akin pouij iuan Cristo Jesús. Tokniuan akin nouan yetokej namechontajpalouaj.
22 Nochin akin Dios moinxelouilij,* uan okachiok akin yetokej ichan Tekiuaj* namechontajpalouaj.
23 Maj toTekotsin Jesucristo namechmaka itatiochiualis tein amo technamiki porin nankinextiaj se kuali tanemilil.
Tajtolmelaualismej
^ Oso “tajtolmej”.
^ Oso “namotanemililuan”.
^ Oso “tein melauak iixpan Dios”.
^ Oso “tein Dios kiyolpaktia”.
^ Oso “toni nikchiuas”.
^ Oso “Amén”.
^ Oso “chipaujkej iixpan Dios”.
^ Oso “chipaujkej iixpan Dios”.
^ Itech griego, “César”.
