Hechos 15:1-41
-
Ompa Antioquía sekin peuaj kijtouaj maj takamej motekikan (1, 2)
-
Kiteixpantiaj nejon kuejmol ompa Jerusalén (3-5)
-
Tayekananij uan tatitanilmej mosentiliaj (6-21)
-
Tein kiixtaliaj tayekananij uan tatitanilmej (22-29)
-
Maj amo kikuikan esti (28, 29)
-
-
Tein kiixtaliaj kinyolchikaua tokniuan (30-35)
-
Pablo uan Bernabé moxelouaj (36-41)
15 Uan seki takamej temokej de Judea uan peujkej kinmachtiaj tokniuan: “Komo amo namotekij* ijkon kemej kijtoua iTanauatil Moisés, amo uelis namakisaskej”.
2 Sayoj ke Pablo uan Bernabé amo tanemiliayaj kemej yejuan, uan satepan ke semi monojnotskej, tokniuan kiixtalijkej maj Pablo, Bernabé uan okseki tokniuan pankisanij Jerusalén kampa yetoyaj tatitanilmej uan tayekananij uan maj ika tajtotij nejin.
3 Yejua ika tokniuan tepitsin kinnalkauatoj uan mokepkej. Uan yejuan kisentokakej ojtokakej uan panotiajkej Fenicia uan Samaria. Uan kintapouijtiajkej tokniuan keniuj akin amo judíos peuayaj kiueyichiuayaj Dios. Keman tokniuan kikakiaj nejon, semi yolpakiaj.
4 Keman ajsikej Jerusalén, tokniuan itech nechikol, tatitanilmej uan tayekananij kuali kinselijkej, uan yejuan kintapouijkej nochi tein Dios kinpaleuij maj kichiuakan.
5 Sayoj ke, sekin akin pouiaj iniuan fariseos uan peujkej taneltokaj, moketskej kampa tokotsyetoyaj uan kijtojkej: “Moneki maj takamej motekikan* uan maj tikinnauatikan maj kitakamatikan iTanauatil Moisés”.
6 Yejua ika, tatitanilmej uan tayekananij mosentilijkej para kiitaskej nejin.
7 Satepan ke semi ika tajtojkej, Pedro moketsak uan kiniluij: “Nokniuan, nankimatijya ke Dios achto nejua nechijitak* para maj nikinixmatilti kuali tanauatilmej* akin amo judíos uan maj taneltokakan.
8 Uan Dios akin kiixmati toyolo, kinextij ke kiyolpaktiayaj keman kinmakak ichikaualis, ijkon kemej kichiuak touan.
9 Yejua amo kinchichikouij yejuan nion tejuan, ta kinyolchipauak porin takuaujtamatkej.
10 Komo ijkon, ¿keyej nankikualantijtokej Dios uan nankinkechmamaltiaj nejin tokniuan se tamamal tein etik? Nejin tamamal nion tejuan nion touejkaujtatuan uelik tikuikakej.
11 Sayoj ke axkan, yejuan uan tejuan titakuaujtamatij ke timomakixtiaj itechkopa itatiochiualis toTekotsin Jesús tein amo technamiki”.
12 Keman kikakkej nejin, nochin amo teyi kijtojkej uan peujkej kinkakij Bernabé uan Pablo. Yejuan kintapouijkej nochi milagros uan uejueyi taman tein se kimojkaita tein Dios kinpaleuijka maj kichiuakan ininixpan akin amo judíos.
13 Keman tamitajtojkej, Santiago kijtoj: “Nokniuan, xinechkakikan.
14 Ijkon kemej tikakkejya, Symeón techtapouij ke Dios kinselijya akin amo judíos uan peuak kinijita* sekin akin no kiuikaskej itokay.
15 Uan nejon no yejua tein kijkuilojkej Tanauatianij.* Ijkuiliujtok:
16 ‘Satepan ke panos nejin, nimokepas uan oksepa nikyekchijchiuas ichan* David, tein uejueliujtok. Nikyekchijchiuas tein xijxitintok uan nikualtsintilis
17 para maj akin mokauaskejok kitemokan Jehová* ika nochi ininyolo iniuan akin kayomej itech nochin altepemej, akin kiuikaj notokay. Ijkon kijtoua Jehová,* akin kichiua nejin,
18 tein ne uejkaujya moixmati’.
19 Yejua ika, niknemilia ke amo kuali yetok maj tikinkuejmolokan akin amo judíos akin kinekij kitekitiliskej Dios.
20 Okachi kuali, moneki se kintajkuilouilis maj kiixtopeuakan tein kinmaktilianij tatadiosmej,* maj amo auilnemikan,* maj amo kikuakan tapialmej tein amo kineskixtiaj uan maj amo kikuikan esti.
21 Porin ne uejkaujya itech sejse ueyi xolal onkanij akin kiteixmatiltiaj iamatajkuiloluan Moisés, porin nochi sábados keman moseuiaj chikauak kiixtajtoltiaj* nejin amatajkuilolmej kampa taueyichiuaj judíos”.
22 Yejua ika, tatitanilmej uan tayekananij, iniuan nochin tokniuan itech nechikol kiixtalijkej kintitaniskej seki takamej akin ompa yetoyaj maj yakan Antioquía iuan Pablo uan Bernabé. Kintitankej Judas akin no kiluiayaj Barsabás, uan Silas, akin taixyekantoyaj itech nechikol.
23 Yejua nejin tein kijkuilojkej uan kinmakakej maj kiuikakan:
“Tejuan, namokniuan, tatitanilmej uan tayekananij, tamechtajpalouaj tokniuan akin amo nanjudíos akin nanemij Antioquía, Siria uan Cilicia.
24 Tikmatkej ke sekin akin touan pouij, maski amo teyi tikinnauatianij, namechkuejmolotoj ika tein namechiluijkej porin kitemouaj namechpojpoloskej.
25 Yejua ika, tiksenixtalijkej tikinijitaskej* seki takamej uan tamechintitaniliskej iniuan tokniuantsitsin Bernabé uan Pablo,
26 akin motemakakej mikiskej porin takuaujtamatij itech itokay toTekotsin Jesucristo.
27 Yejua ika, tamechintitaniliaj Judas uan Silas, para maj yejuan no namechtapouikan nejin.
28 Porin ichikaualis Dios techpaleuij maj tikajsikamatikan maj amo tamechnauatikan okseki taman, ta sayoj nejin tein moneki:
29 xikixtopeuakan tein kinmaktilianij tatadiosmej,* amo xikuikan esti, amo xikuakan tapialmej tein amo kineskixtiaj uan amo xiauilnemikan.* Komo senkis nankiixtopeuaj nejin, kuali nanyetoskej. ¡Xipaktokan!”.*
30 Nejin takamej monauatijkej uan temokej Antioquía. Ompa kinsentilijkej nochin tokniuan uan kinmakakej tein kinijkuilouilijkaj.
31 Keman kiixtajtoltijkej,* yolpakkej porin kinyolchikauak nejon tajtolmej.
32 Uan kemej Judas uan Silas no katkaj tanauatianij, kinpaleuijkej uan kinyolchikaujkej tokniuan ika miak tanojnotsmej.
33 Ompa yetoyaj seki tonalmej, uan satepan tokniuan kiniluijkej maj kualtsin yakan uan yejuan oksepa mokepkej Jerusalén.
34 *
35 Sayoj ke Pablo uan Bernabé mokaujkej Antioquía uan iniuan miakej tokniuan tamachtiayaj uan kiteixmatiltiayaj* itajtol Jehová.*
36 Seki tonalmej satepan, Pablo kiluij Bernabé: “Maj timokepakanya uan maj tikinkalpanotij tokniuan akin nemij itech nochin uejueyi xolalmej kampa tikteixmatiltijkej itajtol Jehová* para tikitaskej keniuj yetokej”.
37 Bernabé kiixtalijkaya maj iniuan youi Juan, akin kiluiayaj Marcos.
38 Sayoj ke Pablo kiitaya ke amo kuali yetoya maj kiuikakan, porin keman yetoyaj ompa Panfilia kinkaujka uan amo iniuan tanojnotstinemiaok.
39 Yejua ika semi mokualantijkej uan motajtolteuijkej, uan moxelojkej. Bernabé kiuikak Marcos uan yajki Chipre itech barco.
40 Pablo kijitak* Silas uan yajki satepan ke tokniuan kitataujtijkej Jehová* maj kiyekpia.
41 Uan panok Siria uan Cilicia kinyolchikaujtiaya tokniuan itech nechikolmej.
Tajtolmelaualismej
^ Oso “amo namochiuiliaj circuncisión”. Xikonita circuncisión.
^ Oso “mochiuilikan circuncisión”.
^ Oso “nechixpejpenak”.
^ Oso “tajtolmej”.
^ Oso “kinixpejpena”.
^ Xikonita tanauatijkej.
^ Oso “itakenkal”.
^ Oso “tiotsitsin”.
^ Tajtol griego, pornéia. Xikonita auilnemilis.
^ Oso “kilerouaj”.
^ Oso “tikinixpejpenaskej”.
^ Oso “tiotsitsin”.
^ Tajtol griego, pornéia. Xikonita auilnemilis.
^ Oso “¡Timotaskej!”.
^ Oso “kilerojkej”.
^ Nejin versículo moajsi itech seki Biblias, sayoj ke itech miak uejkauj amatajkuilolmej itech tajtol griego amo yetok.
^ Oso “kiteixmatiltiayaj kuali tanauatilmej tein kipia”.
^ Oso “kiixpejpenak”.
