Juan 16:1-33
16 ”Namechiluia nejin para amo xinechkauakan.*
2 Amo namechkauaskejok ximosentilikan kampa taueyichiuaj judíos. Tein melauj ejkos hora keman akin namechmiktis kinemilis ke kitekitilijtok Dios.
3 Sayoj ke kichiuaskej nochi nejin porin amo kiixmatij noTajtsin nion nechixmatij.
4 Namechiluia nejin para keman ejkos hora keman mochiuas, nankielnamikiskej ke ipa namechiluijkaya.
”Amo namechiluij achto nejin porin nietoya namouan.
5 Sayoj ke axkan nikajsiti akin nechualtitanik, uan nion semej nanechtajtaniaj* ‘¿Kani tiouj?’,
6 ta semi nanyoltayokoyaj porin namechiluij nejin.
7 Sayoj ke yekmelauj tein namechiluia: namechpaleuia maj niouj. Porin komo amo niouj, nejua amo namechualtitanilis ichikaualis Dios maj namechpaleui; sayoj ke komo niouj, nejua namechualtitanilis.
8 Uan keman namechualtitanilis, kinyeknextilis nochin akoni tajtakolchiujtok, akoni kichiujtok tein kuali yetok uan akoni kinamiki maj kitatsakuiltikan.
9 Achto, akoni tajtakolchiujtok, porin yejuan amo nouan takuaujtamatij;
10 uan de ompa, akoni kichiujtok tein kuali yetok, porin niouj nikajsiti noTajtsin uan namejuan amo nanechitaskejok,
11 uan satepan, akoni kinamiki maj kitatsakuiltikan, porin akin taixyekana nikan taltikpak kiixtalijkejya maj kitatsakuiltikan.
12 ”Miak tamanok namechiluiskia, sayoj ke axkan ayamo nankiajsikamatiskiaj.
13 Sayoj ke keman nankiseliskej ichikaualis Dios tein kiteixmatiltia tein melauak, namechixyekanas uan namechpaleuis xikajsikamatikan nochi tein melauak. Sayoj ke nejin chikaualis amo tekiti iselti, ta kiteixmatiltia sayoj tein Dios kiixtalia ke moneki momatis. Yejua ika nankimatiskej miak taman tein mochiuas satepan.
14 Ichikaualis Dios nechueyitalis porin namechixmatiltis nochi tein nechkakilij.
15 Nochi tein kipia noTajtsin, no noaxka. Yejua ika nikijtoj ke namechixmatiltis nochi tein nechkakilij.
16 Amo uejkaua amo nanechitaskejok, sayoj ke no, amo uejkaua nanechitaskej”.
17 Keman kikakkej nejin, seki imomachtijkauan peujkej moiluiaj: “Yejua kijtoua ke amo uejkaua amo tikitaskejok, sayoj ke no, amo uejkaua tikitaskej uan no kijtoua ke kiajsiti iTajtsin, ¿toni kijtosneki nochi nejon?”.
18 Kijtouayaj: “¿Toni kijtosneki keman kijtoua ‘Amo uejkaua’? Amo tikmatij toni ika tajtojtok”.
19 Kemej Jesús kimatia ke kinekiaj kitajtaniskej toni kijtosnekia tein kijtoj, kiniluij: “¿Namotajtanijtokej se iuan okse nejon porin nikijtoj ‘Amo uejkaua amo nanechitaskejok, sayoj ke no amo uejkaua nanechitaskej’?
20 Yekmelauj namechyekiluia ke namejuan nanchokaskej uan nantayokoyaskej, sayoj ke akin nemij nikan taltikpak yolpakiskej; namejuan nantajyouiskej, sayoj ke ejkos tonal keman nanyolpakiskej.
21 Keman se siuatsin kipiati ikonetsin, tajyouia porin ejkokya ihora. Sayoj ke keman kipiaya, yolpaki maj se konetsin yolini, uan nejon kichiua maj kielkaua nochi tein kijyouij.
22 No ijkon panoua namouan. Axkan semi nantayokoxtokej, sayoj ke nejua oksepa namechitas uan semi nanyolpakiskej uan amo akin uelis kichiuas amo xiyolpakikan.
23 Uan nejon tonal amo teyi nanechtajtaniskej. Yekmelauj namechyekiluia ke komo notokaykopa nankitajtaniaj noTajtsin tein yeski taman, yejua namechmakas.
24 Hasta axkan amo teyi nantajtantokej notokaykopa. Xitajtanikan uan namechmakaskej uan ijkon senkis nanyolpakiskej.
25 ”Keman namechiluij nochi nejin namechtapouij miak taman. Ejkos hora keman amo teyi namechtapouisok, ta namechyekiluis tein kichiujtok noTajtsin.
26 Nejon tonal, notokaykopa nankitajtaniskej teisa noTajtsin. Sayoj ke amo nikijtosneki ke nejua namechtajtanilis.
27 Porin noTajtsin namechtasojta, porin nanechtasojtaj uan nankineltokaj ke nejua niualaj nikixnextiko Dios.
28 Niualaj nikan taltikpak nikixnextiko noTajtsin. Axkan nikaujteua nejin taltikpak uan nikajsiti noTajtsin”.
29 Imomachtijkauan kiluijkej: “Axkan kemaj titechyeknojnotsa, amo titechtapouiaok miak taman.
30 Axkan tikmatij ke nochi tikmati uan amo moneki maj nion akin mitstajtani teisa porin tikmattokya tein kinemilijtok. Yejua ika tikneltokaj ke Dios mitsualtitanik”.
31 Jesús kinnankilij: “¿Axkan nantaneltokaj?
32 Xikakikan nejin. Ejkos hora, uan tein melauj ejkokya, keman sejse nancholoskej namochajchan uan nanechkauaskej noselti. Maski amo nietok noselti, porin toTajtsin nouan yetok.
33 Namechiluij nejin para xiyolseujtokan porin nouan nanpouij. Akin nemij nikan taltikpak namechtajyouiltiskej. Sayoj ke ¡ximoyolchikauakan!, nejua niktanik* tein amo kuali tein onkak nikan taltikpak”.
Tajtolmelaualismej
^ Oso “maj amo teyi namechuetsilti (namechtepotami)”.
^ Oso “nanechtajtoltiaj”.
^ Oso “nikxijxikoj”.
