Mateo 10:1-42
10 Yejua kinsentilij 12 imomachtijkauan uan kinmakak chikaualis tein ika ueliskia kinkalankixtiskej amokuali ejekamej uan tein ika kinpajtiskej akin kipiayaj tataman kokolis* uan akin tajyouijtoyaj.
2 Ijkon monotsayaj 12 tatitanilmej: Simón (akin kiluiaj Pedro), uan Andrés iikniuj Simón; Santiago uan Juan ikoneuan Zebedeo;
3 Felipe uan Bartolomé; Tomás uan Mateo akin kisentilia impuesto; Santiago ikoneuj Alfeo, uan Tadeo;
4 Simón akin tekiti ika nochi iyolo, uan Judas Iscariote (akin kitemaktij Jesús).
5 Jesús kintitanik 12 itatitaniluan uan kinnauatij nejin: “Amo xiakan kampa nemij akin amo judíos uan amo xikalakikan itech nion se ueyi xolal tein poui Samaria,
6 ta xiksentokakan xikintemokan sayoj israelitas akin kemej yeskia ichkamej* tein poliujtokej.
7 Xikteixmatiltijtiakan: ‘ITaixyekanalis Dios tein moajsi iluikak ejkotokya’.
8 Xikinpajtikan akin mokokouaj, xikinyolitikan* akin momikilijkejya, xikinpajtikan* akin kipiaj lepra, xikinkalankixtikan amokuali ejekamej. Amo nantaxtaujkej keman namechmakakej, amo no xitetaxtaualtikan keman nantemakaskej.
9 Amo xikuikakan oro nion plata nion cobre itech namotajkoilpikauj,*
10 uan amo no xikuikakan namomorral keman nanojtokaskej, nion ome* namotasal nion namotekakuan nion namotopil; porin akin tekiti moneki kimakaskej tein kikuas.
11 ”Keman nanajsiskej itech se ueyi xolal oso se xolaltsin, xitatemokan hasta nankiajsiskej akin kuali namechkakis, uan ompa ximokauakan hasta keman nanyaskejya.
12 Keman nankalakiskej itech se kali, xikintajpalokan* akin ompa yetoskej.
13 Komo kuali namechseliaj, yejuan kipiaskej tatiochiualis* tein nankinnejnekiliaj. Sayoj ke komo amo, nejon tatiochiualis namotech mokauas.
14 Komo itech se kali oso itech se ueyi xolal amo namechseliaj nion namechkakij, keman nanyaskejya ximometstsetselokan para maj uetsi talnex.
15 Namechyekiluia ke itech Tonal keman Dios taixejekos,* nejon ueyi xolal okachi kitatsakuiltiskej ke uejueyi xolalmej Sodoma uan Gomorra.
16 ”Xinechkakikan, namechtitantok kemej ichkamej kampa yetokej koujtajitskuimej. Yejua ika ximotachilikan kemej motachiliaj kouamej, sayoj ke no xiyolchipaujkej kemej palomas.
17 Ximotachilikan, porin namechtemaktiskej iniuan tamelauanij uan namechuijuitekiskej kampa taueyichiuaj judíos.
18 Uan porin notech nantakuaujtamatij, namechuikaskej iniuan tekiuanij uan uejueyi tekiuanij. Nejon tapaleuis xikiniluikan yejuan uan akin nemij itech okseki altepemej tein nankineltokaj.
19 Sayoj ke, keman namechtemaktiskej, maj amo namechtekipacho toni nankijtoskej oso keniuj nankijtoskej, porin keman ajsis nejon hora namechmatiltiskej tein moneki nankijtoskej.
20 Tein melauj amo sayoj namejuan nantajtoskej: ichikaualis namoTajtsin namechpaleuis xitajtokan.
21 Uan no, takat kitemaktis iikniuj maj kimiktikan, uan tetat kitemaktis ikoneuj, uan konemej kinixnamikiskej inintatuan uan kichiuaskej maj kinmiktikan.
22 Nochin namechtauelitaskej porin nantakuaujtamatij itech notokay. Sayoj ke akin taxikos hasta keman tatamis, makisas.
23 Keman namechtajyouiltiskej itech se ueyi xolal, xicholokan itech okse; porin namechyekiluia ke akin yolik kemej takat ejkos achto ke nantaminemiskej itech nochin uejueyi xolalmej tein pouij Israel.
24 ”Se akin momachtia amo okachi ueyichiujkej ke itamachtijkauj, nion takeual okachi ueyichiujkej ke iteko.
25 Akin momachtia moneki yolpakis komo mochiua kemej itamachtijkauj, uan takeual moneki yolpakis komo mochiua kemej iteko. Komo akin taixyekana kalijtik kiluiaj Amokuali Belcebú,* ¡xikyekmatikan ke no ijkon kiniluiskej akin nemij ichan!
26 Yejua ika amo xikinmouilikan, porin nochi tein kitatijtokej* kiajsiskej, uan nochi tein amo akin kimati momatis.
27 Tein namechiluia sayoj namejuan, xikiniluikan nochin; uan tein namechichtakailuia, xikteixmatiltikan kalkuapan.
28 Uan amo xikinmouilikan akin uelis namechmiktiskej, sayoj ke amo uelis kichiuaskej maj amo oksepa xinemikan satepan, ta xikmouilikan akin uelis namechtamiixpolos itech Gehena.*
29 Kinnamakaj ome tototsitsin* ika se tomintsin,* ¿melauj? Sayoj ke, namoTajtsin kuali kimati keman semej tototsitsin panuetsi.*
30 Uan yejua hasta kimati kanachi tsonti nankipiaj.
31 Yejua ika amo ximouikan. Namejuan okachi nantayekantokej ke miakej tototsitsin.
32 ”Akin senteixtenoj kijtos ke nomomachtijkauj, nejua no nikijtos ke yejua nomomachtijkauj iixpan noTajtsin akin yetok ne iluikak.
33 Sayoj ke akin nechixtopeua senteixtenoj, nejua no nikixtopeuas iixpan noTajtsin akin yetok ne iluikak.
34 Amo xiknemilikan ke niualaj para maj nochin kuali mouikakan, ta niualaj ika se machete tein ojkan tenej* tein kichiuas maj nochin moxexelokan.
35 Porin nikchiuako maj moxexelokan. Okichpil kiixnamikis itat, siuapil kiixnamikis inan uan tesiuamon kiixnamikis imonan.
36 Tein melauj, akin namechtauelitaskej yeskij akin nemij namochan.
37 Akin okachi kitasojta itat oso inan ke nejua, amo kinamiki nechtojtokas; uan akin okachi kitasojta iokichpil oso isiuapil ke nejua, amo kinamiki nechtojtokas.
38 Uan akin amo kineki tajyouis* uan nechtojtokas, amo kinamiki yeski nomomachtijkauj.
39 Akin kitemos momakixtis,* momikilis, uan akin momikilis porin notech takuaujtamati, oksepa nemis.
40 ”Akin namechselia namejuan no nechselia nejua, uan akin nechselia nejua no kiselia akin nechualtitanik.
41 Akin kiselis se tanauatijkej* porin tanauatijkej, yejua kimakaskej taxtauil tein kimakaj se tanauatijkej, uan akin kiselis se akin yolmelauak porin yolmelauak, yejua kimakaskej taxtauil tein kimakaj se akin yolmelauak.
42 Yekmelauj tein namechiluia: akin kimakas maski sayoj se vaso sesekat semej nejin nomomachtijkauan akin amo ueyichiujkej, namechyekiluia ke kimakaskej itaxtauil”.
Tajtolmelaualismej
^ Oso “kokoxkayot”.
^ Oso “borregos”.
^ Itech griego, “xikinajokuikan”.
^ Oso “xikinchipauakan”.
^ Oso “namopaxa”, “namotajkotsikaujka”. Nejin kipiaya kani kiuikaskej tomin.
^ Oso “ome panti”.
^ Keman judíos motajpalouayaj kijtouayaj: Xiyolseujtokan.
^ Oso “yolseuilis”.
^ Xikonita Tonal keman Dios taixejekos.
^ Oso “Beelzebub”. No ijkon kitokaytiaj Satanás.
^ Oso “kicholtijtokej”.
^ Oso “chiktejtsitsin”.
^ Itech griego, “se asarión”. Tomin tein aksa kitania itech 45 minutos.
^ Oso “pantemoua”.
^ Oso “espada”.
^ Oso “kixikos kouit kampa tetajyouiltiaj”. Xikonita kouit kampa tetajyouiltiaj.
^ Xikonita tanauatijkej.
