Mateo 6:1-34
-
TAMACHTIA ITECH SE TEPET (1-34)
-
Maj amo se kichiua tein kuali sayoj para maj teitakan (1-4)
-
Keniuj se motataujtis (5-15)
-
Padrenuestro: kemej se motataujtis (9-13)
-
-
Keman se kiixtalis amo se takuas (16-18)
-
Tein kipia ipatiuj nikan taltikpak uan ne iluikak (19-24)
-
Maj amo se motekipachojto (25-34)
-
“Nochipa xiktayekanaltikan iTaixyekanalis Dios” (33)
-
-
6 ”Amo keman xikchiuakan tein kuali ininixpan oksekin sayoj para maj namechitakan. Porin komo ijkon nankichiuaj, namoTajtsin akin yetok ne iluikak amo namechmakas nion se tatiochiualis.
2 Keman tikpaleuis* se pobre, amo xikijtojtinemi,* kemej kichiuaj taixkajkayauanij ne kampa taueyichiuaj judíos uan itech ojti para maj oksekin kinueyitalikan. Namechyekiluia ke yejuan kiselijkejya nochi inintaxtauil.
3 Okachi kuali, keman tikpaleuis se pobre, maj moopochmay amo kimati tein kichiua moyekmay;
4 ijkon tein ika tikinpaleuis pobres amo akin kimatis. Uan moTajtsin, akin nochi kiita,* mitstatiochiuis.
5 ”Uan no, keman namotataujtiskej, amo xikchiuakan kemej taixkajkayauanij. Keman yejuan motataujtiaj, kiuelitaj ijkatoskej kampa taueyichiuaj judíos uan kampa monamikij uejueyi ojmej* para maj oksekin kinitakan. Namechyekiluia ke yejuan kiselijkejya nochi inintaxtauil.
6 Sayoj ke, keman tejua timotataujtis, xikalaki mocuarto uan xitatsakua, uan xiktataujti moTajtsin akin amo akin ueli kiita.* Uan moTajtsin, akin nochi kiita,* mitstatiochiuis.
7 Keman timotataujtis, amo miakpa xikijto sayoj se taman, kemej kichiuaj akin amo judíos, porin yejuan kinemiliaj ke Dios kinkakis porin uejkaua tajtojtokej.
8 Amo xikchiuakan kemej yejuan, porin namoTajtsin kimattokya tein namechpoloua hasta achto ke nankitajtaniskej.
9 ”Namejuan moneki namotataujtiskej ijkuin:
”‘ToTajtsin akin tietok ne iluikak, maj nochin kiitakan ke motokay semi ueyi.*
10 Maj techixyekanaki moTaixyekanalis. Maj mochiua tein tikneki nikan taltikpak, ijkon kemej ne iluikak.*
11 Xitechmaka totaxkaltsin tein monekis nejin tonal;
12 xitechtapojpolui tein titauikaj, kemej tejuan no tikintapojpoluianij akin techtauikiliaj.
13 Uan amo xikaua maj timotajtakolmakakan, ta xitechmakixti den Amokuali’.
14 ”Porin komo nankintapojpoluiaj oksekin, namoTajtsin akin yetok ne iluikak no namechtapojpoluis.
15 Sayoj ke, komo amo nankintapojpoluiaj oksekin, namoTajtsin amo no namechtapojpoluis.
16 ”Keman nankiixtaliskej amo nantakuaskej seki tonalmej, amo xiksentokakan ximoixtayokoltikan, kemej kichiuaj taixkajkayauanij. Yejuan kichiuaj maj moitakan ke ixtayokoltikej para maj oksekin kinitakan ke kiixtalijkej amo takuaskej seki tonalmej. Namechyekiluia ke yejuan kiselijkejya nochi inintaxtauil.
17 Sayoj ke, keman tejua tikixtalis amo titakuas seki tonalmej, ximokuatalili aceite tein ajuiyak uan ximoixpajpaka
18 para maj oksekin amo kiitakan ke tikixtalijtok amo titakuas, ta sayoj maj kiita moTajtsin akin amo akin ueli kiita.* Uan moTajtsin, akin nochi kiita,* mitstatiochiuis.
19 ”Amo xiksentokakan xiksentilikan miak taman tein kipia ipatiuj nikan taltikpak, porin palani* uan okuiloua* uan tachtekinij kiichtekij.
20 Okachi kuali, xiksentilikan tein kipia ipatiuj ne iluikak, kampa amo palanis uan okuilouas nion tachtekinij kiichtekiskej.
21 Porin kampa yetos tein tikpatiuita, ompa tiyoltanemilijtos.
22 ”Moixtololouan kemej yeskia se tanex tein ika motauilia monakayo. Komo sayoj se taman tikita,* nochi monakayo petanis.
23 Sayoj ke, komo moixtololouan tenexikoluiaj,* nochi monakayo yetos tayouayan. Uan komo motanex amo tauiaok, tein melauj ¡semi tayouayanijtik tietos!
24 ”Amo akin uelis kintekitilis ome tekomej, porin kitauelitas uan kiixtopeuas se, oso kitasojtas uan kipaleuis okse. Amo uelis nankitekitiliskej Dios uan Tomin.*
25 ”Yejua ika namechiluia: maj amo namechtekipachojtook toni nankimajseuaskej uan nantayiskej oso toni namotaliliskej. ¿Amo okachi tayekantok se yoltos ke takual uan ke tein timotaliliaj?
26 Kuali xikinitakan totomej. Amo tatokaj nion kitekij tatok nion kisentiliaj, sayoj ke namoTajtsin akin yetok ne iluikak kintamaka. ¿Xe namejuan amo okachi nantayekantokej ke totomej?
27 Komo namotekipachojtokej, ¿namechpaleuis xiyoltokan okse minuto?*
28 Uan no, ¿keyej namechtekipachoua tein namotaliliskej? Kuali xikitakan keniuj moskaltiaj xochimej ne xiujtaj. Amo chikauak tekitij nion tajkitij;*
29 sayoj ke namechiluia ke nion Salomón motakentij kemej semej nejon xochimej, maski tel tominpiaya.
30 Komo Dios ijkon kinkualtsintilia xiujtsitsin tein axkan moskaltijtokej uan mosta kintikotamotaskej, ¿amo okachi namechtakentis namejuan? ¡Amo semi nantakuaujtamatij!
31 Yejua ika amo keman ximotekipachokan uan xikijtokan: ‘¿Toni tikmajseuatij?’ oso ‘¿Toni titayitij?’ oso ‘¿Toni timotalilitij?’.
32 Porin nochi nejon yejua tein semi kitemouaj akin amo kiixmatij Dios.* NamoTajtsin akin yetok ne iluikak kimati ke namechpoloua nochi nejin.
33 ”Yejua ika, nochipa xiktayekanaltikan iTaixyekanalis Dios uan tein yejua kijtoua ke kuali yetok. Komo nankichiuaj nejon, Dios no namechmakas nochi tein namechpoloua.
34 Yejua ika maj amo keman namechtekipacho tein mostika panos, porin mostika no namechtekipachos okseki taman. Sayoj xitanemilikan itech kuejmol tein onkas sejse tonal.
Tajtolmelaualismej
^ Oso “tiktayokolis teisa”.
^ Itech griego, “amo xikpitstiuj trompeta”.
^ Oso “ichtakatachixtok”.
^ Oso “itech ojmaxalmej”.
^ Oso “ichtakayetok”.
^ Oso “ichtakatachixtok”.
^ Oso “ke motokay yektik”.
^ Oso “ne iluikak uan no nikan taltikpak”.
^ Oso “ichtakayetok”.
^ Oso “ichtakatachixtok”.
^ Oso “moxoxa”, “moxixa”.
^ Itech tajtol griego kijtosneki okuiltsin tein patani uan kikua tasal.
^ Oso “Komo moixtololouan yektekitij”.
^ Nejin kijtosneki komo kitemouaj miak taman. Itech griego, “komo moixtololo amo kuali”.
^ Oso “no nankitemojtinemiskej namotomintiskej”.
^ Oso “kichijchiuaj hilo”.
^ Oso “akin kayomej itech okseki altepemej”.
