Miakej taltikpakneminij amo youijok inintiopan oso kampa taueyichiuaj porin amo kiseliaj se kuali nepaleuil nion yolseuilis. Yejua ika, ¿keyej tejuatsin monekiskia tionyas itech nechikolmej tein kipiaj itaixpantijkauan Jiova? ¿Toni ompa uelis tikonselis?

Kuali tionmomachilis iniuan akin tetasojtanij uan kualtakamej. Akin yekinika kichiuayaj kemej Cristo pouiaj itech tataman nechikolmej uan mosentiliayaj uan kiueyichiuayaj Dios, momachtiayaj iTajtol uan moyolchikauayaj se iuan okse (Hebreos 10:24, 25). Monechikouayaj iniuan akin no kichiuayaj kemej Cristo, kampa nochin motasojtayaj uan yekmelauj kiajsiaj akin iuan kuali mouikaskej (2 Tesalonicenses 1:3; 3 Juan 14). Tejuan no ijkon tikchiuaj uan no tikmachiliaj nejon pakilis.

Tikonselis nepaleuil porin tikonmatis keniuj tikontekitiltis tein kijtoua Biblia. Ijkon kemej kijtoua Biblia ke takamej, siuamej uan konemej monechikouayaj, tejuan no timonechikouaj uan tikinkakij kuali tamachtianij akin techpaleuiaj maj tikajsikamatikan keniuj tiktekitiltiskej itech tonemilis tanauatilmej tein kitemaka Biblia (Deuteronomio 31:12; Nehemías 8:8). Nochin akin youij uelij tanankiliaj keman mochiua netajtanilmej uan ueli mokuikatiaj, ijkon kinextiaj inintakuaujtamatilis iuan Dios (Hebreos 10:23).

Uelis tikonchikauas motakuaujtamatilis iuan Dios. Tatitanil Pablo kintajkuilouilij akin pouiaj itech se nechikol itech itonaluan: “Semi nikyolnejneki namechitas [...], ijkuakon kachi ok timoyolmajxitiske ika ne totakuautamatilis. Namejuan nanmoyolmajxitiske uan nejua no nimoyolmajxititi ika notakuautamatilis” (Romanos 1:11, 12). Keman timonechikouaj iniuan tokniuan mochikaua totakuaujtamatilis uan okachi tikixtaliaj tinemiskej kemej Biblia tanauatia.

¿Tikonuelitaskia tionyas itech se nechikol uan tikonitas tejuatsin ox melauj tein moijtojya? Tel kuali timitsonseliskej. Itech nechikolmej amo motaxtaua nion motajtani tomin.

• ¿Toni neskayot tiktojtokaj keman tikchiuaj tonechikoluan?

• ¿Toni nepaleuil ueli tikseliaj keman tiyouij nechikolmej?