Jiova, “Dios akin yolpaki”, kitemaka kuali tanauatilmej, uan yejuatsin akin kineki maj yolpakikan kalyetouanij (1 Timoteo 1:11, TNM). Yejuatsin kiixtalij nenamiktilis. Keman nenamiktilis ixyetok ininixpan tekiuanij, tapaleuia maj tetatmej uan konemej kimachilikan ke kintasojtaj uan yolpakij. Akin kinekij kitakamatiskej Dios moneki monamiktiskej ijkon kemej kiixtaliaj tekiuanij. Xikonixtajtolti Lucas 2:1, 4, 5.

¿Keniuj kiita Dios nenamiktilis? Yejuatsin kineki maj ika nejon mosentilikan nochipaya se takat iuan se siuat. Jiova kineki maj namikuanij amo mokajkayauakan iuan okse (Hebreos 13:4). Kitauelita maj motsayana amat ininixpan tekiuanij (Malaquías 2:16). Sayoj kikaua maj aksa kichiua nejon uan maj oksepa monamikti komo inamik auilnemik. Xikonixtajtolti Mateo 19:3-6, 9.

Jiova kinchijchiuak takat uan siuat maj sentekitikan uan maj mosenpaleuikan kemej namikuanij (Génesis 2:18). Takat, yejua taixyekana uan moneki kintekipanos ichankauan uan kinpaleuis maj kiixmatikan Dios. No moneki kichiuas okseki taman maski ouij kikisas porin kitasojta inamik. Namikuanij moneki motasojtaskej uan mopoujkaitaskej. Uan kemej nochin omen tajtakouanij moneki kimatiskej motapojpoluiskej porin ijkon uelis yolpakiskej. Xikonixtajtolti Efesios 4:31, 32; 5:22-25, 33, uan 1 Pedro 3:7.

Komo namikuanij kipiaj kuejmolmej, nochin omen moneki mochikauaskej mouikaskej ika netasojtalis (1 Corintios 13:4, 5).  ITajtol Dios amo tayolchikaua maj mokakauakan namikuanij keman kipiaj kuejmolmej. Xikonixtajtolti 1 Corintios 7:10-13.

Jiova kineki maj konemej yolpakikan. Yejua ika tel kuali kinmachtia keniuj monejnemiltiskej ijkuak telpochmejok. Kineki maj kiselikan ininnepaleuil tetatmej akin tamattokej uan okachi ixmachmej (Colosenses 3:20). Uan no, kineki maj yolpakikan keman kichiuaj itanejnekilis yejuatsin uan iKonetsin. Xikonixtajtolti Eclesiastés 11:9–12:1; Mateo 19:13-15, uan 21:15, 16.

Tetatmej moneki kichiuaskej nochi tein uelis uan ijkon kinmakaskej tein kikuaskej, tein ika motakentiskej uan kani nemiskej (1 Timoteo 5:8). Sayoj ke no moneki kinmachtiskej maj kitasojtakan Dios uan maj kiixmatikan (Efesios 6:4). Keman kiitaj ke tetatmej kitasojtaj Dios, kinkauiliaj se kuali neskayot tein kintelpaleuia konemej. Keman tein kinmachtiaj kikixtiaj itech iTajtol Dios, kinpaleuia ininkoneuan maj kuali tanemilil kipiakan. Xikonixtajtolti Deuteronomio 6:4-7 uan Proverbios 22:6.

Konemej kinpaleuia keman kinyolchikauaj uan kiniluiaj ke kuali kichiujkej se taman. Kemansa no moneki kinmejmelauaskej, ta ijkon kinpaleuiskej maj amo kichiuakan tein uelis kinijtakos (Proverbios 22:15). Sayoj ke keman kinmejmelauaskej maj amo kintajyouiltikan nion maj kintelteuikan. Xikonixtajtolti Colosenses 3:21.

Itaixpantijkauan Jiova kikixtianij miak amaixmej tein moijkuilojkej kemej kuali kinpaleuis tetatmej uan konemej. Nochi tein kijtouaj nejin amaixmej mokixtiaj itech Biblia. Xikonixtajtolti Salmo 19:7, 11.