Keman namikuanij kipiaj yekinika konetsin uelis kinyolpaktis, sayoj ke no uelis kintekipachos. Xa amo kichiayaj ke monekia kichiuaskej miak tekit porin nochipa moneki iuan yetoskej uan kiyekpiaskej. Kemej amo semi moseuiaj uan mopata tein kimachiliaj, uelis kichiuas maj mokualantikan kemej namikuanij. Yejua ika, monekis kipataskej seki taman tein kichiuayaj uan ijkon uelis kiyekpiaskej konetsin uan no ininkuali uikalis kemej namikuanij. ¿Keniuj uelis kinpaleuis tein tayolmajxitia Biblia maj kiixnamikikan nejin ouijkayomej?

TEIN BIBLIA KIJTOUA: “Ne naken kipixtinemi tetasojtalis [...,] yolyemanik uan kixikoa tajyouilis. [...] Amo no kinemilijtinemi sayo ten niaxka. Uan ne naken tetasojtatinemi, yejua ne amo moyolkualantijtinemi” (1 Corintios 13:4, 5). Temomaj, kemej yekinika konetsin tein tikonpia, okachi tikonnekis tikonitas tein yejua kipoloua. Sayoj ke, nejon uelis kichiuas maj monamik kimachili ke amo tikonitaok, yejua ika amo xikonelkaua ke no moneki tikonitas tein motakauj kipoloua. Ika nejmachkayot uan poujkaitalis, uelis tikonnextilis ke inepaleuil semi moneki uan ke tikontasojkamati maj mitsonpaleui tikonyekpias konetsin.

“Namejuan nanteyokichuan, moneki xinentinemikan iuan namosiuauan ika chipaukatamachilis [oso taixmatilis].” (1 Pedro 3:7.) Tepopaj, komo yekinika konetsin tein nankipiaj, moneki tikonajsikamatis ke axkan monamik okachi moneki kiitas tein kipoloua konetsin, uan xa motekipachojtos, sioujtos oso hasta motayokoltis porin kipia okachi tekit. Kemansa xa kualanis mouan, sayoj ke amo no iuan xionkualani, porin “akin amo niman kualani okachi kuali ke se takat akin kipia chikaualis” (Proverbios 16:32). Kuali xiontaixejeko uan xikonpaleui kampa moneki (Proverbios 14:29).

TEIN UELIS TIKONCHIUAS:

• Tepopaj: Xikonpaleui monamik maj kiyekpia konetsin, hasta ijkuak yeski youak. Xikonita keniuj amo semi tikonchiuasok seki taman uan ijkon okachi tionyetos iuan monamik uan mokonetsin

• Temomaj: Keman monamik mitsoniluis ke mitsonpaleuis ika konetsin, xikonkaua maj kichiua. Komo amo kiyekchiua, amo xikonajua, ta ika netasojtalis xikonnextili keniuj kichiuas

TEIN BIBLIA KIJTOUA: “Omen mochiuaskej sayoj se” (Génesis 2:24). Maski axkan kemej kalyetouanij amo sayoj nanomen, ta naneyinya, amo xikonelkaua ke tejuatsin uan monamik nankisentokaj “sayoj se”. Xikonchiua nochi tein tionuelis tein tapaleuis maj kisentoka chikauak mokuali uikalis iuan monamik.

Siuat akin namikej, xikontasojkamatili monamik keman mitsonpaleuia. Tajtolmej tein ika tikontasojkamatilis uelis tapaleuis maj amo onka kuejmolmej (Proverbios 12:18). Takat akin namikej, xikonmatilti monamik ke tikonteltasojta uan ke semi moneki itech monemilis, uan no ke tikontasojkamatilia tekit tein ika kinpaleuia kalyetouanij (Proverbios 31:10, 28).

“Ma amo tiktemokan sayo tapaleuilis para tejuan san.” (1 Corintios 10:24.) Nochipa xikonchiua tein kipaleuis monamik uan amo xikonixpanaui chikaujkayot tein kichiua. Xiktemokan nantajtoskej uan nankikakiskej tein nanmoiluiaj. Uan keman nanmosentekaskej kemej namikuanij, amo xikontemo sayoj tejuatsin tionmoyolpaktis. Xikonita keniuj momachilia monamik. Biblia kijtoua: “Amo ximotatakaualtikan de ke amo nansenkochiske se uan okse komo amo achto nanmonojnotske uan nanmoyektenkauke de ke ijkon nankichiuaske” (1 Corintios 7:3-5). Yejua ika xionyektajtokan ika nejon. Komo amo tionyolijsiui uan tionteajsikamati mitsonpaleuis maj mochikaua mokuali uikalis iuan monamik.

TEIN UELIS TIKONCHIUAS:

• Xikontemo tionyetos moselti iuan monamik

• Xikonchiua teisa tein kinextis ke tikontasojta monamik, kemej tikonmakas se netetayokolil tein amo ueyi oso tikonijkuilouilis teisa

TEIN BIBLIA KIJTOUA: “Kuak tipili ok tikatka, ijkuakon peuke mitsnextiliayaj no nijin Tajkuilolamatsin de Dios. Uan sayo nijin Tajtoltsin de Dios uelis mitsnextilis uan mitsyekantiyas para tikajsis ne nemakixtilis” (2 Timoteo 3:15). Xikonixtali keniuj tikonmachtis mokonetsin. Se kimoujkaita keniuj se konetsin ueli kiajsikamati miak taman hasta achto ke yolis. Kemej neskayot, maski ayamo yoli ueli mitsontenixmatiya uan kimachilia tein tejuatsin tikonmachilia. Niman xionpeua xikonixtajtoltili amaixmej, ta maski amo kiajsikamatis tajtolmej, uelis tapaleuis maj kiuelita taixtajtoltis keman ueyias.

Amo xikonnemili ke mokonetsin amo kiajsikamatis keniuj tamati Dios porin semi nojnelok. Xikontataujti Jiova iixpan mokonetsin (Deuteronomio 11:19). Keman iuan tionmauiltis, xikontapoui tein Dios kichiuani (Salmo 78:3, 4). Ijkon kemej moskaltijtiyas, kiitas ke tejuatsin semi tikontasojta Jiova uan mokonetsin no kitasojtas.

TEIN UELIS TIKONCHIUAS:

• Xikontajtani Dios maj mitsonmaka tamatilis uan ijkon kuali tikonmachtis mokonetsin

• Miakpa xikonilui mokonetsin tanemililmej uan tajtolmej tein okachi monekij uan ijkon niman kiajsikamatis