NETAJTANIL 9
¿Moneki nikneltokas ke nemilis iselti peuak?
¿TEJUA TONI TIKCHIUASKIA?
Xiknemili nejin: Alex amo kimatiok toni kinemilis. Nochipa kineltokani ke Dios kichijchiuak nochi tein onkak. Sayoj ke axkan akin kimachtia Biología kijtoua ke tamatinij kiajsinij ke nemilis iselti peuak. Alex amo kineki maj kiitakan ke amo tamati uan monemilia: “Tein melauj, komo tamatinij kijtouaj ke nemilis iselti peuak, ¿nejua toni nichiujkej komo nikijtoua ke amo melauak?”.
Komo tiyeskia tiAlex, ¿tikneltokaskia ke nemilis iselti peuak sayoj porin amatajkuilolmej ijkon kijtouaj?
XIMOTSAKUILI UAN XITANEMILI
Seki taltikpakneminij senkis kijtouaj ke kineltokaj ke nemilis iselti peuak oso ke aksa kichijchiuak nochi, sayoj ke amo kimatij kimelauaskej keyej kineltokaj nejon.
-
Sekin kineltokaj ke Dios kichijchiuak nochi sayoj porin ijkon kinmachtijkej tiopan.
-
Oksekin kineltokaj ke nemilis iselti peuak porin yejua nejon kinmachtijkej kaltamachtiloyan.
CHIKUASEN NETAJTANILMEJ TEIN MONEKI TIMOCHIUILIS
Hebreos 3:4 kijtoua: “Yetok se aksa nikan taltikpak ten kichijchiuak cada kali. Pero Totajtsin Dios Yejuatsin kichijchiuak nochi ten ongak”. ¿Tikita ke taixejekol maj se kineltoka nejin?
Keman se kijtoua ke amo moajsi se Tachijchiujkej, kemej yeskia se kijtoskia ke nejin kali iselti mochijchiuak
TEIN MOIJTOUA: Nochi tein onkak mochiuak porin se tonal tatopontikisak, tein moixmati kemej Big Bang.
1. ¿Toni oso akoni kichiuak Big Bang?
2. ¿Toni okachi taixejekol: maj se kinemili ke nochi iselti peuak, oso ke aksa kipeualtij?
TEIN MOIJTOUA: Taltikpakneminij tiualeuaj itech tapialmej.
3. Komo tiualeuaj itech tapialmej, kemej itech monos, ¿keyej okachi titamattokej ke yejuan?
4. ¿Keyej hasta seki taman tein moita ke tel tsikitsitsin semi ouij se kiajsikamati keniuj chijchiujtokej?
TEIN MOIJTOUA: Onkak tein kinextia ke nemilis iselti peuak.
5. Akin kijtoua nejin, ¿kitemouani ox melauak ijkon mochiuak?
6. ¿Kanachimej kineltokaj ke nemilis iselti peuak sayoj porin kiniluiaj ke akin tamattokej ijkon kineltokaj?
“Ximonemili ke tinejnentok koujtaj uan tikajsiti se kualtsin kali tein chijchiujtok ika kouit. Amo tiknemiliskia: ‘Nikan xa uejuetskej seki koujmej uan mochijchiuak nejin kali’. Nejon amo taixejekol. Yejua ika, ¿keyej moneki tikneltokaskej ke nochi tein onkak iselti mochijchiuak?” (Julia)
“Komo aksa mitsiluia ke tatoponik kampa kichijchiuaj amaixmej, uan ke tapal sentakuik uan kisak se ueyi diccionario, ¿tikneltokaskia?” (Gwen)
¿KEYEJ MONEKI NIKNELTOKAS KE NEMI DIOS?
Biblia kijtoua ke moneki tiktekitiltis motanemilil (1 Tesalonicenses 5:21). Nejin kijtosneki ke tein tikneltoka moneki amo yeski porin:
-
TEISA MITSOLINIA: “Teisa kichiua maj nikmachili ke onkak se okachi ueyi chikaualis”.
-
OKSEKIN KINELTOKAJ: “Kampa ninemi nochin kineltokaj ke Dios nemi”.
-
IJKON MITSMACHTIJKEJ: “Nochan nechiluiaj ke moneki nikneltokas Dios”.
Okachi kuali, moneki senkis tikmatis keyej tikneltoka Dios.
“Keman tamachtijkej techmelauilia keniuj tekiti se inakayo, okachi nikneltoka ke Dios nemi. Sejse taman itech tonakayo kichiua se tekit, maski moita ke amo teyi kichiua. Miakpa nion tikmatij toni panoua toijtik. ¡Semi se kimoujkaita!” (Teresa)
“Keman nikita se kali tel uejkapantik, se barco oso se carro, nimotajtania: ‘¿Akoni kichijchiuak?’. Kemej neskayot, aksa akin tamatkej kiixtalia keniuj kichijchiuas se carro porin chijchiujtok ika miak tataman teposmej, uan nochin moneki kuali monajnamikiskej uan sentekitiskej. Yejua ika, komo aksa kichijchiuak se carro, taltikpaknenkej no.” (Richard)
“Keman okachi nimomachtiaya tein tamachtiaj tamatinij, okachi amo nikneltokaya ke nemilis iselti peuak. [...] Niknemilia ke okachi ouij se kineltokas ke nemilis iselti peuak ke se kineltokas ke moajsi se Tachijchiujkej.” (Anthony)
XIKNEMILI NEJIN
Maski tamatinij uejkaujya kitemouanij, kisentokaj tataman kimelauaj keniuj peuak nemilis. Komo nion yejuan ueli moyektenkauaj ika nejin, uan moijtoua ke yejuan tamatinij, ¿tiknextis ke amo titamatkej komo taman titanemilia?
