Tapijpianij israelitas yajkej altepet Jericó uan mokaujkej ichan se siuat akin motokaytiaya Rahab. Keman akin tekiuajtia Jericó kimatik, kintitanik tateuianij ichan Rahab. Yejua kintatij ome tapijpianij ikalkuako uan kintitanik tateuianij okseko maj kintemotij. Ompa Rahab kiniluij tapijpianij: “Namechpaleuiti porin nikmati ke Jiova yetok namouan uan ke nanmoaxkatiliskej nejin tal. Ika kualtakayot, xinechyekiluikan ke nankinmakixtiskej nochankauan”.

Tapijpianij kiluijkej Rahab: “Komo tikilpia se mekat chichiltik itech moventana, timotenkauaj ke amo teyi kinpanos akin yetoskej mokalijtik. Ijkon makisaskej mochankauan”.

Rahab kinpaleuij tapijpianij maj kisanij Jericó keman kintemoltij itech iventana ika se mekat. Tapijpianij motatijkej itech tepemej eyi tonalmej, uan satepan mokepkej kampa yetoya Josué. Satepan, israelitas kipanauijkej ueyiat Jordán uan kichiujkej tein monekia tein kinpaleuiskia maj moaxkatilikan altepet. Jericó yeskia yekinika altepet tein moaxkatiliskiaj. Jiova kinnauatij maj tayoualouanij itech altepet  sepa itech tonal. Chikuasen tonalmej kichiujkej nejon. Itech chikometika tonal, chikojpa tayoualojkej itech altepet. Ompa, tiopixkamej kikakistiltijkej inintrompetas, uan tateuianij israelitas tel chikauak tsajtsikej. Uan tepamit tein kiyoualouaya altepet xitinik. Maski ichan Rahab yetoya itech nejon tepamit, amo xitinik. Rahab uan ichankauan makiskej porin yejua takuaujtamatik iuan Jiova.