LUCÍA KOXOTAKTSA ITECH IOPOCHMETS. Keman katka nojnel kikuik poliomielitis, se kokolis tein semi temaua uan kijtakoua sistema nervioso. Keman kipiaya 16 xiujmej, siuat akin kitekitiliaya, kiluij: “Dios mitstatsakuiltij ika nejin kokolis porin amo tiktakamatik momomaj uan amo tikpoujkaitak”. Seki xiujmej satepan, Lucía kielnamikiok keniuj kiyolxokolij nejon.

KEMAN DÁMARIS KIMATIK KE KIPIAYA SE TUMOR ITECH IKUATIXYO, ipopaj kiluij: “Mitspanoua nejon porin xa tikchiuak teisa tein tel amo kuali. Yejua ika, Dios mitstatsakuiltijtok”. Dámaris semi moyolkokoj.

Tel miak xiujmejya, miakej kineltokanij ke tikokolispeuaj porin Dios techtatsakuiltia. Itech amatajkuilol Usos y costumbres de las tierras bíblicas, moijtoua ke itech itonaluan Jesús kineltokayaj “ke aksa kokolispeuaya porin yejua kichiujka se tajtakol oso ichankauan, uan yeua ika kintatsakuiltiayaj porin tajtakojkaj”. Uan tel miak xiujmej satepan ke Cristo nemik nikan taltikpak, moijtoua ke “sekin kinemiliayaj ke Dios kintatsakuiltiaya akin tajtakolchiuayaj ika kokolismej tein temauaj” (Medieval Medicine and the Plague [La medicina medieval y la peste]). Komo ijkon, ¿kintatsakuiltij Dios akin nemiaj ompa Europa itech siglo catorce ika se kokolis tein temaua? ¿Oso sayoj katka se kokolis kemej satepan kimatkej tamatinij? Xa tejuatsin tionmotajtania ox Dios techtatsakuiltia ika kokolismej porin titajtakolchiuaj. *

XIONTANEMILI ITECH NEJIN: Komo Dios kintatsakuiltiaya akin kinnamikia ika kokolis uan tajyouilis, ¿keyej Jesús kinpajtiaya akin mokokouayaj? ¿Amo kinextijtoskia ke kiixnamiktoya imelaujkayo Dios? (Mateo 4:23, 24.) Jesús amo keman kiixnamikiskia iPopaj. Yejua kijtoj: “Nachipa nikchiutinemi sayo ne ten Yejuatsin kipaktia”. Uan no kijtoj: “Ijkon keme Notajtsin Dios nechnauatilij ya ma nikchiua, no ijkon nikchiutinemis” (Juan 8:29; 14:31).

Biblia kijtoua ke Jiova nochipa “yolmelauak uan melauak” (Deuteronomio 32:4). Dios amo keman kichiuaskia maj se avión panuetsi uan maj momikilikan tel miakej sayoj porin kineki kitatsakuiltis se akin ompa youi. Abrahán, se itekitikauj Dios akin nochipa kitakamatik, kimatia ke Dios amo keman kichiuaskia nejon. Yejua ika kijtoj ke amo ueli se kineltoka maj yejuatsin kiixpolo akin yolmelauak iuan akin amo yolkuali (Génesis 18:25). Uan no, Biblia kijtoua ke “Dios amo kichiua tein amo kuali” (Job 34:10-12).

Keman titajyouiaj, amo techtatsakuiltijtok Dios porin tikchiujkej se tajtakol. Jesús kinextij nejon keman yejua uan imomachtijkauan kiajsikej se takat akin amo uelia tachiaya. Yejuan kitajtanijkej: “Totamachtijkau, ¿keye yolik ixpojpoyot ne tagat? ¿Xe yolik ixpojpoyot porin de nintajtakol den nitatuan oso de yejua itajtakol san?”. Uan Jesús kinnankilij: “Amo yolik ixpojpoyot porin den itajtakol, uan nión no porin nintajtakoluan den nitatuan” (Juan 9:1-3).

Kemej itech nejon tonalmej taman tanemiliayaj, imomachtijkauan Jesús xa semi kimoujkakakkej maj kiniluiani ke nion nejon takat nion itatuan kichiujkej se tajtakol uan yejua ika kitatsakuiltijtoyaj. Keman Jesús kichiuak maj oksepa tachia,  kinextij ke nejon tein kineltokayaj amo katka melauak (Juan 9:6, 7). Tikmatiskej ke Dios amo kichiua maj titajyouikan semi kinyolseuia akin kipiaj uejueyi kokolismej.

Biblia techyekiluia:

• “Dios amo uelis kipias se tayejyekolis ika tein amo kuali, nion kitalilia tayejyekolis aksa” (SANTIAGO 1:13, TNM). Uan no, amo uejkaua Dios kitamis “tein amo kuali” tein miak xiujmejya semi techtajyouiltiani, kemej kokolismej, tekokojkayot uan mikilis.

• Jesucristo “kinpajtij nochi in kokoyani” (MATEO 8:16). Keman kinpajtij akin mokokouayaj kinextij tein iTekiuajyo Dios kichiuas noyampa taltikpak.

• Dios “kinelkaualtis de ninchokilisuan de nochi itaneltokakauan. Uan amo aken momikilis ok; uan amo aken mochoktis ok; uan amo aken motekipachos ok; uan amo aken yoltajyouis ok. Uan ijkon yeski porin nochi tajtamik ya de ne achtopa onkaya” (APOCALIPSIS [REVELACIÓN] 21:4).

Yejua ika, ¿keyej semi titajyouiaj? Komo Dios amo itajtakol, ¿akoni itajtakol? Tel miak xiujmejya miakej motajtanianij nejon. Itech okse tamachtilis tikonajsis tanankililmej.