Itech tamachtilis tein achto tikitakej, ika motajtoj tein Jesús kijtoj ke mochiuaskia. Tein mochiujtok axkan kinextia ke Dios kiixtalijya itaixyekanalis ompa iluikak uan no kiixtalij maj Jesucristo tekiuajti.

Biblia kijtoua ke keman Jesús peuak taixyekana, kinkixtij Satanás uan iángeles akin amo yolkualmej ompa iluikak. Axkan, yejuan tekitij nikan taltikpak, uan yejua ika okachi mochiua tein amo kuali satepan ke panok xiuit 1914 (Apocalipsis 12:7, 9).

Maski axkan okachi mochiua tein amo kuali, Jesús, akin taixyekana itech iTekiuajyo Dios, kichiuani miak taman tein kuali nikan taltikpak. Yejua kiixyekana tamachtilis ika Biblia tein motemaka itech nochi taltikpak ijkon kemej kijtojka. Yejua ika, millones momachtiaj tein kijtoua Biblia uan kitakamatij (Isaías 2:2-4). Yejuan momachtianij ke moneki tekitiskej ika taixejekol, kuali mouikaskej iniuan ininchankauan, kipiaskej seki taman, sayoj ke amo kitayekanaltiskej kipiaskej okachi. Tein Biblia kijtoua kinpaleuia maj yolpakikan uan kinmachtia maj kuali moojtokaltikan porin ijkon Dios kinselis itech iTekiuajyo.

Maski Jesús taixyekantokya ompa iluikak, nikan taltikpak kisentokaj taixyekanaj takamej. Sayoj ke, Dios kiluij Jesús: “Xikintantiuj akin mitstauelitaj” (Salmo 110:2). Amo uejkaua, Jesús kinixpolos nochin akin kiixnamikij uan kitamis nochi kuejmolmej tein kintajyouiltia akin kitakamatij Dios.

Keman taixyekanas iTekiuajyo Dios, kichiuas nejin:

• Kinixpolos taneltokalismej tein amo melaujkej. Biblia kijtoua ke taneltokalismej tein amo melaujkej kemej yeskia se siuat akin auilnemi uan kiixpoloskej amo uejkaua. Miakej taneltokalismej tamachtiaj tein amo melauak keman ika tajtouaj Dios. No kintajyouiltiaj oksekin. Yejua ika, amo moajsiskejok. Miakej momoujtiskej keman ixpoliuiskej nejon taneltokalismej (Apocalipsis 17:15, 16).

• Kinixpolos akin taixyekanaj nikan taltikpak. ITekiuajyo Dios kinixpolos nochin akin taixyekanaj nikan taltikpak (Apocalipsis 19:15, 17, 18).

• Kinixpolos akin amo yolkualmej. ¿Toni kinpanos akin kisentokaj kichiuaj tein amo kuali uan amo kinekij kitakamatiskej Dios? “Akin amo yolkualmej ixpoliuiskej itech taltikpak.” (Proverbios 2:22.)

• Kinixpolos Satanás uan iángeles akin amo yolkualmej. Satanás uan iángeles akin amo yolkualmej ‘amo uelis ok kinkajkayaujtinemiskej ok in taltikpakuanij’ (Apocalipsis 20:3, 10).

¿Uan keniuj nemiskej akin kinekij maj kinixyekana iTekiuajyo Dios?

Jesucristo taixyekantokya ompa iluikak uan kichiuas okachi miak taman ke akin taixyekanaj nikan taltikpak. Uan no, taixyekanas iniuan 144,000 akin kinixpejpenkej nikan taltikpak (Apocalipsis 5:9, 10; 14:1, 3). Jesucristo kichiuas maj nikan taltikpak mochiua tein Dios kineki. ¿Toni kichiuas iTekiuajyo Dios?

• Kitamis kokolismej uan mikilis. Biblia kijtoua: “Nion se taltikpaknenkej kijtos: ‘Nimokokoua’”. No kijtoua: “Amo aken momikilis ok” (Isaías 33:24; Apocalipsis 21:4).

• Onkas yekyetolis uan amo akin moujkanemisok. Biblia kijtoua: “Mokoneuan semi yolseujtoskej”. No kijtoua: “Sejse motalis iuvajmekatampa uan ihigokoujtampa uan amo akinok kinmojmoujtis” (Isaías 54:13; Miqueas 4:4).

• Nochin kinyolpaktis tekit tein kipiaskej. Biblia kijtoua: “Notaixpejpenaluan semi kinyolpaktis tekit tein kichiuaskej. Amo nenkaj motekitiltiskej” (Isaías 65:22, 23).

• Kichiuas maj taltikpak moajsi chipauak. Biblia kijtoua: “Onkas yolpakilis taluakyan uan kampa tauaktok. Onkas yolpakilis taluakyan uan taxochiouas kemej azafrán” (Isaías 35:1).

• Techmachtis tein moneki tikchiuaskej uan ijkon uelis tinemiskej nochipaya. Biblia kijtoua: “Ne nachipa nemilis kijtosneki yejua nijin: Ke in taltikpakuani ma mitsonixmatikan Tejuatsin ke tion Dios tion Yolmelauaktsin, uan sayo Tejuatsin tion Dios. Uan in taltikpakuani ma nechixmatikan Nejuatsin ke ni Jesucristo ten Tejuatsin tinechonualtitanik ya nikan taltikpak” (Juan 17:3).

Dios kineki xikonseli nejon tatiochiualismej (Isaías 48:18). Itech okse tamachtilis tikitaskej tein uelis tikchiuaskej uan ijkon uelis tikseliskej.