1. ¿Keniuj uelis tikixtaliskej okachi tiktekitiliskej Jiova?

 AKIN tikchiuaj kemej Cristo, semi tiktasojtaj Jiova uan tiknekij semi kuali tiktekitiliskej. Sayoj ke, uelis tikchiuaskej nejin komo tikixtaliaj seki taman, kemej tiknextiskej kualneskayomej, timomachtiskej tikchiuaskej okseki taman uan tiktemoskej tikinpaleuiskej oksekin.

2. ¿Keyej moneki tikixtaliskej okachi kuali tiktekitiliskej Jiova uan ijkon tikchiuaskej?

² ¿Keyej moneki tikixtaliskej okachi tiktekitiliskej Jiova uan ijkon tikchiuaskej? Yekinika, porin tiknekij tikyolpaktiskej toTajtsin, Jiova. Yejuatsin yolpaki keman tiktekitiliaj ika nochi tein tiuelij tikchiuaj. Uan no, tiknekij okachi kuali tiktekitiliskej porin ijkon uelis okachi tikinpaleuiskej tokniuan (1 Tes. 4:9, 10). Maski uejkaujya tiktekitilijtokej Jiova oso amo, tinochin moneki timochikauaskej okachi kuali tikchiuaskej. Maj tikitakan keniuj.

3. ¿Toni kijtoj Pablo keman kiyolmajxitij Timoteo? (1 Timoteo 4:12-16).

³ Maski Timoteo katka telpochok keman Pablo yekinika kitajkuilouilij uan tapaleuijtoyaya kemej tayekankej, kiyolmajxitij maj mochikauani okachi kitekitilis Jiova (xikonixtajtolti 1 Timoteo 4:12-16). Komo itech titanemiliaj tein Pablo kijtoj, tikitaskej ke kiyolchikauak Timoteo maj kisentokani kinextiani kualneskayomej kemej netasojtalis, takuaujtamatilis uan chipaujkanemilis. Uan no, maj momachtiani okachi kuali taixtajtoltis sentaixpan, tayolmajxitis uan tamachtis. Itech nejin  tamachtilis tikitaskej tein kichiuak Timoteo uan ke komo tikixtaliaj tikchiuaskej seki taman, okachi kuali tiktekitiliskej Jiova. Uan no, tikitaskej seki taman kemej uelis ijkon tikchiuaskej.

4. Kemej kijtoua Filipenses 2:19-22, ¿keyej Jiova kimakak miak tekimej Timoteo?

⁴ ¿Keyej Timoteo kuali kitekitilij Jiova? Porin kinextiaya kualneskayomej tein nochin kiitayaj (xikonixtajtolti Filipenses 2:19-22). Ika tein Pablo kijtoj de Timoteo, tikitaj ke katka yolyemanik, amo tekauaya, kuali tekitia uan katka takuaujtamach. Kintasojtaya tokniuan uan yekmelauj ininka motekipachouaya. Yejua ika, Pablo semi kitasojtaya uan kimakak seki tekimej maski ouij katka porin kimatia ke ueliskia kichiuas (1 Cor. 4:17). Jiova okachi techtasojtas komo tiknextiaj kualneskayomej tein kiyolpaktiaj uan okachi techmakas tekimej itech nechikol (Sal. 25:9; 138:6).

5. 1) ¿Keniuj uelis tikmatiskej toni kualneskayot uelis okachi kuali tiknextiskej? 2) ¿Toni kichiua tokniuj ichpoch akin nesi itech taixkopin tein ika kinextia ke teajsikamati?

⁵ Maj tikixtalikan toni tiknekij okachi kuali tikchiuaskej. Maj tiktataujtikan Jiova maj techpaleui maj tikmatikan toni kualneskayot moneki okachi kuali tiknextiskej. Maj tikixpejpenakan se uan maj timochikauakan okachi kuali tiknextiskej. ¿Xa moneki okachi tikinajsikamatiskej oksekin oso tiknekiskej okachi tikinpaleuiskej? ¿Xa moneki timochikauaskej okachi kuali timouikaskej iniuan oksekin oso okachi titetapojpoluiskej? Komo tiknekij tikmatiskej toni moneki tikpataskej oso toni moneki okachi tikyekchiuaskej, maj tiktajtanikan aksa akin kuali iuan timouikaj (Prov. 27:6).

6. ¿Keniuj uelis okachi kuali tiknextiskej se kualneskayot tein ouij techkisa?

⁶ Maj timochikauakan tikchiuaskej tein tikixtalijkejya. ¿Keniuj? Maj okachi timomachtikan kualneskayot tein tiknekij tiknextiskej. Komo tikitaj ke okachi moneki titetapojpoluiskej, semi techpaleuis komo timomachtiaj uan itech titanemiliaj tein kichiujkej sekin akin ininka tajtoua Biblia, akin yekmelauj tetapojpoluijkej uan sekin akin amo kichiujkej. Maj itech titanemilikan Jesús, yejua tetapojpoluij (Luc. 7:47, 48). Yejua amo kiitaya tein amo kiyekchiuayaj, ta kiitaya tein uelia kichiuayaj. Sayoj ke, fariseos “kinemiliayaj ke oksekin amo teyi chiuanimej katkaj”  (Luc. 18:9, TNM). Satepan ke itech titanemiliskej nejin neskayomej, maj timotajtanikan: “¿Keniuj nikinita oksekin? ¿Toni kualneskayomej nikita ke kipiaj?”. Komo ouij techkisa tiktapojpoluiskej aksa maj tikitakan toni kualneskayomej kipia uan maj timotajtanikan: “¿Keniuj kiita Jesús? ¿Kitapojpoluiskia?”. Komo tikchiuaj nejin uelis techpaleuis maj tikpatakan kemej titanemiliaj. Yekinika xa ouij techkisas tiktapojpoluiskej aksa akin techchiuilij tein amo kuali. Sayoj ke komo timochikauaj, okachi kuali tiknextiskej nejin kualneskayot.

7. ¿Toni tekit kinmaka Jiova akin kuali kichiuaj teisa? (Proverbios 22:29).

⁷ No uelis tikixtaliskej tiueliskej okse taman. Kemej neskayot, itech xiontanemili tokniuan akin tapaleuiaj keman mochijchiuaj sucursales, Kalmej kampa mochiuaj Uejueyi nechikolmej uan Kalmej kampa tiMosentiliaj. Miakej ueli kichiuaj se tekit porin kinmachtijkej tokniuan akin okachi uelijya. Kemej moita itech taixkopimej, tokniuan takamej uan siuamej momachtijtokej keniuj uelis se kiyekpias Kalmej kampa mochiuaj Uejueyi nechikolmej uan Kalmej kampa tiMosentiliaj. Ika nejin uan okseki taman, Jiova “Totayekankau […] sen nachipa”, uan Jesús “Tayekankatsin inpan nochi tayekanani”, kichiuaj miak taman inintechkopa nejin tokniuan (1 Tim. 1:17; 6:15; xikonixtajtolti Proverbios 22:29). Moneki chikauak titekitiskej uan ika tein tiuelij tikchiuaj maj tikueyitalikan Jiova uan amo tejuan (Juan 8:54).

8. ¿Toni techpaleuis maj tikmatikan toni moneki tikyekchiuaskej?

⁸ Maj tikixtalikan toni tiknekij okachi kuali tikchiuaskej. ¿Toni ueliskia timomachtiskej tikchiuaskej? Maj titajtokan iniuan tokniuan tayekananij itech nechikol oso iuan tokniuj takalpanojkej para maj techiluikan toni uelis tikchiuaskej. Kemej neskayot, komo techyolchikauaj maj okachi kuali titemakakan se tanojnots oso maj okachi kuali titamachtikan, uelis tikintajtaniskej toni moneki tikyekchiuaskej. Uan satepan maj tikchiuakan tein techiluiskej. ¿Keniuj?

9. ¿Keniuj uelis okachi kuali tikchiuaskej se taman tein tikixtalijkej?

⁹ Maj timochikauakan tikchiuaskej tein tikixtalijkejya. Maj tiknemilikan ke tiknekij okachi kuali titamachtiskej. Uelis tikchiuaskej nejin komo kuali timomachtiaj folleto Maj okachi kuali titaixtajtoltikan uan titamachtikan. Uan achto ke tikpanoltiskej se tamachtilis itech nechikol tein mochiua itajkotian semana, uelis tiktajtaniskej se tokniuj akin miak xiujmejya kitekitilia Jiova, maj techkaki uan maj techilui toni uelis okachi kuali tikchiuaskej. Komo niman timomachtiaj tamachtilis tein tiktemakaskej, okachi kuali titamachtiskej uan oksekin kiitaskej ke titekitinij uan titakuaujtamachmej (Prov. 21:5; 2 Cor. 8:22).

10. Xikonijto se neskayot tein kinextia toni uelis tikchiuaskej komo ouij techkisa se taman.

¹⁰ ¿Uan komo tiknekij tikchiuaskej se taman tein ouij techkisa? ¡Maj amo timosenkauakan! Maj tikitakan se taman tein kipanok se tokniuj takat akin monotsa Garry, semi ouij kikisaya taixtajtoltis. Yejua kielnamiki ke semi pinauaya keman monekia taixtajtoltis itech nechikolmej. Sayoj ke amo mosenkauak, ta kisentokak mochikauak okachi kuali kichiuas. Tokniuan uan amaixmej semi kipaleuijkej, axkan yejua kitemaka tanojnotsmej itech nechikolmej uan itech uejueyi nechikolmej.

11. Ijkon kemej Timoteo, ¿toni techpaleuis maj okachi tiktekitilikan Jiova?

¹¹ ¿Mochiuak Timoteo se kuali tamachtijkej  uan kitemakaya kuali tanojnotsmej? Biblia amo kijtoua, sayoj ke tikmatij ke kichiuak tein Pablo kiyolmajxitij. Yejua ika, okachi kuali kichiuak tekimej tein kipiaya (2 Tim. 3:10). Ijkon kemej Timoteo, komo tikixtaliaj timomachtiskej okseki taman, uelis okachi tiktekitiliskej Jiova.

12. ¿Keniuj mitsonpaleuianij oksekin?

¹² ¡Semi tiyolpakij keman oksekin techpaleuiaj! Kemej neskayot, komo tietokej tapajtiloyan, semi techyolchikaua keman techkalpanouaj tokniuan Tayekananij akin Tetajtouiaj itech Tapajtiloyamej oso Oloch Tokniuan tein Kinkalpanouaj akin Mokokouaj. Oso komo tikpanouaj se ouijkayot semi tiktasojkamatij keman se tayekankej kixeloua tiempo para techkakis uan techyolchikauas. Uan komo tiknekij okachi kuali titamachtiskej ika Biblia, semi kuali keman touan youi se tokniuj akin miak xiujmejya precursor uan techiluia toni uelis okachi kuali tikchiuaskej. Jesús kijtoj: “Kachi yolpaktok in tagat ten tapaleuijtinemi ika ten niaxka uan ke ne tagat ten sayo kiselia tapaleuilis” (Hech. 20:35). Nochi nejin tokniuan yolpakij keman techpaleuiaj. Uan tejuan no semi tiyolpakiskej komo tikinpaleuiaj oksekin. ¿Toni uelis tikchiuaskej komo tikixtalijtokej okachi tiktekitiliskej Jiova itech nejin uan okseki taman?

13. ¿Toni moneki tikelnamikiskej keman tikixtaliskej teisa?

¹³ Maj tikixtalikan se taman tein uelis tikchiuaskej. Kemej neskayot, xa tiknemiliskej: “Nikuelitaskia okachi nitapaleuis itech nechikol”. Sayoj ke, xa ouij techkisas tikmatiskej keniuj peuas tikchiuaskej uan xa ouij techkisas tikmatiskej ox tikchiujkej. Yejua ika, okachi kuali maj tikixtalikan tikchiuaskej se taman, hasta uelis tikijkuiloskej tein tikixtaliskej uan no keniuj uelis tikchiuaskej.

14. ¿Keyej moneki tikpataskej tein tikixtaliaj komo moneki?

¹⁴ Maj tikpatakan tein tikixtaliaj komo moneki. ¿Keyej? Porin amo ueli tiktsakuiliaj nochi tein mochiua. Kemej neskayot, tatitanil Pablo tapaleuij maj mochiuani nechikol ompa Tesalónica uan xa kinekia mokauasok para kinyolchikauas akin yankuixtok mochiujkaj tokniuan. Sayoj ke akin kitauelitayaj  kichiujkej maj cholouani (Hech. 17:1-5, 10). Komo mokauaskia ompa, xa no kinchiuiliskiaj tein amo kuali tokniuan itech nejon nechikol. Sayoj ke Pablo amo mosenkauak, ta kipatak tein kiixtalijka kichiuas. Uan satepan kititanik Timoteo maj kinyolchikauati tokniuan (1 Tes. 3:1-3). Yejuan xa semi yolpakkej keman kiitakej ke Timoteo kinekia yas kampa okachi monekia.

15. Ika se neskayot xikonijto toni uelis panos ika tein tikixtaliaj tikchiuaskej komo mopata teisa itech tonemilis.

¹⁵ ¿Toni techmachtia tein kichiuak Pablo uan tein kipanok ompa Tesalónica? Xa tikixtalijkaj se taman kemej tiktekitiliskej Jiova, sayoj ke mopata teisa itech tonemilis uan amo ueli tikchiuajok (Ecl. 9:11). ¿Toni tikchiuaskej? Maj tiknemilikan okse taman tein uelis tikchiuaskej. Yejua nejon tein kichiujkej Ted uan Hiedi. Kemej semej kokolispeuak amo uelikok tapaleuijkej Betel. Sayoj ke, kemej semi kitasojtayaj Jiova niman kitemojkej keniuj ueliskia kisentokaskej kitekitiliskej. Yekinika mochiujkej precursores regulares, satepan kinixtalijkej kemej precursores especiales. Uan Ted kimachtijkej keniuj takalpanos itech nechikolmej keman tokniuj takalpanojkej amo ueliskia. Sayoj ke mopatak xiujmej tein aksa ueliskia kipias para uelisok takalpanos itech nechikolmej uan yejua ika Ted uan Hiedi kiitakej ke amo ueliskiaok kichiuaskej nejon tekit. Maski yekinika tepitsin motayokoltijkej kimatiaj ke ueliskiaok kitekitiliskej Jiova itech okseki taman. Ted kijtoua: “Tikitanij ke amo sayoj se taman kemej uelis tiktekitiliskej Jiova”.

16. ¿Toni techmachtia tein kijtoua Gálatas 6:4?

¹⁶ Amo ueli tikixtaliaj tein techpanos itech tonemilis. Yejua ika moneki tikelnamikiskej ke Jiova amo techpatiuita porin tikpiaj se tekit itech inechikol. Amo no techpaleuiskia komo tikitaj tekimej tein oksekin kipiaj uan tein tejuan amo tikpiaj. Hiedi kijtoua: “Komo tikitaj tein oksekin kinpanoua ika tein tejuan tikpanouaj amo tiyolpakiskejok” (xikonixtajtolti Gálatas 6:4). Yejua ika, okachi kuali maj tiksentokakan tiktemokan okseki taman kemej uelis tiktekitiliskej Jiova uan tikinpaleuiskej oksekin. b

17. ¿Toni moneki tikchiuaskej komo tiknekij tikseliskej okachi tekimej?

¹⁷ Uelis tikseliskej okachi tekimej itech nechikol komo amo tiktemouaj tikpiaskej miak taman uan amo timotauikaltiaj komo amo moneki. Maj tikixtalikan axkan tein techpaleuis maj satepan tikchiuakan okseki tekimej. Kemej neskayot, komo tikonneki  tionmochiuas precursor regular, ¿ueliskia tionmochiuas precursor auxiliar seki metsti? Oso komo tikonneki tionyeski tapaleuijkej itech nechikol, ¿ueliskia okachi tiontanojnotsas uan tikonkalpanos tokniuan akin xiuejkejya uan akin mokokouaj? Tein tikonchiuas axkan, mitsonpaleuis xikonseli okachi tekimej satepan. Xikonixtali tikontekitilis Jiova nochi tein tionuelis (Rom. 12:11).

18. ¿Toni techmachtia tein kichiuak Beverley? (No xikonita taixkopin).

¹⁸ Komo tixiuejkejya, maj amo tiknemilikan ke amo uelisok tikixtaliskej tikchiuaskej seki taman. Tein kipanok Beverley, se tokniuj siuat akin kipia 75 xiujmej kinextia ke uelisok se kichiuas tein se kiixtalia. Amo uelia yeknejnemia porin mokokouaya. Sayoj ke semi kinekia tapaleuis keman motayoleuaskia maj mosentilikan keman moelnamikiskia imikilis Cristo. Yejua ika, kiixtalij kichiuas seki taman uan semi yolpakik keman uelik kichiuak, nejon kinyolchikauak oksekin maj okachi tanojnotsanij. Nejin kinextia ke Jiova semi kipatiuita nochi tein kichiuaj tokniuan akin xiuejkejya, maski amo ueli kichiuajok miak taman (Sal. 71:17, 18).

19. ¿Toni uelis tikixtaliskej tikchiuaskej?

¹⁹ Maj tikixtalikan tein uelis tikchiuaskej. Maj tiknextikan kualneskayomej tein kiyolpaktiaj Jiova. Maj tiuelikan tikchiuakan seki taman uan ijkon uelis tikseliskej okachi tekimej itech inechikol Jiova. Maj tiktemokan keniuj uelis okachi tikinpaleuiskej tokniuan. c Komo tikchiuaj nochi nejin, Jiova techtatiochiuis uan nochin kiitaskej ke okachi titakuaujtamatij ijkon kemej Timoteo (1 Tim. 4:15).