TAMACHTILIS ITECH IPEUJYAN AMAIX | ¿TAPALEUIA MAJ SE MELAUJKANEMI?
¿Amo tapaleuiaok maj se melaujkanemi?
Hitoshi, tekitia kampa kinpaleuiaj akin kintemouaj tekit ompa Japón uan moajsia kampa tominpouayaj. Se tonal, keman kisenitayaj keniuj motekitiltij tomin, iteko kiluij ke monekia amo kitematiltis kemej yekmelauj mokuik tomin. Sayoj ke Hitoshi kimelauilij ke amo kichiuaskia porin itanemilil kikuejmoloskia. Ompa, iteko kiluij ke kikuiliskia tekit uan ijkon kichiuak.
Seki metsti satepan, Hitoshi motayokoltij keman kitemouaya kiajsis se tekit kampa amo monekiskia takajkayauas. Kemej neskayot, keman tajtoto iuan aksa keman kitemojtoya tekit kiluij ke amo keman kiamataliskia tein amo melauak. Akin kichiuilijtoya netajtanilmej, kiluij: “¡Tel taman tikpia motanemilil!”. Ichankauan uan akin iuan kuali mouikaya kiyolchikauayaj maj amo mosenkaua, sayoj ke yejua amo kiyekmatiaok ox yekmelauj tapaleuia maj se melaujkanemi. Yejua kijtoua: “Peuak nimotajtania ox nechpaleuiskia niktematiltis ke amo nitakajkayauaskia”.
Tetayokoltij tikijtoskej ke tein kipanok Hitoshi kinextia ke amo nochin kiitaj ke motelneki maj se melaujkanemi. Tein melauj sekin kiitaj ke amo tapaleuia uan okachi itech tanamakalis. Itech ueyi altepet Sudáfrica, se siuat kijtoj: “Kampa nitekiti moajsij miakej akin amo melaujkanemij. Uan semi tachikaujkauiaj maj no ijkon se kichiua”.
Axkan okachi miakej takajkayauaj. Seki xiujmej achto, itech se taman tein kitemoj tapajtijkej Robert Feldman akin kiita keniuj tekiti se ikuatixyo uan tekiti itech ueyi Kaltamachtiloyan ompa Massachusetts, kiajsik ke 60% akin uejueykej, takajkayauaj sepa keman monojnotsaj iuan aksa majtakti minuto. Tapajtijkej Feldman kijtoj: “Semi tikmoujkaitakej tein tikajsikej, amo tiknemiliayaj ke mojmostaj miakej takajkayauaj”. Maski miakej amo kiuelitaj maj kinkajkayauakan, ¿keyej semi kichiuaj?
¿Keyej semi momoyauani takajkayaualis, tachtekilis uan okseki taman tein amo melauak? ¿Keniuj taijtakoua nejon? Uan tein okachi moneki, ¿toni uelis techpaleuis maj amo ijkon timonejnemiltikan?
