SE MAKUIL xiuit achto, Choong Keon uan Julie, akin namikuanij uan kipiaj kemej 35 xiujmej, tekititoyaj kemej precursor regular ompa Sydney (Australia). Choong Keon kijtoua: “Sayoj titekitiaj seki tonalmej uan tikpiayaj se kuali nemilis. Tikteluelitayaj clima uan kualtsin tinemiaj. Uan no, amo uejka nemiaj tochankauan uan totasojikniuan uan nejon semi tikuelitayaj”. Sayoj ke amo senkis kuali momachiliayaj. ¿Keyej? Porin kimatiaj ke okachi ueliskiaj kitekitiliskej Jiova, sayoj ke amo kiixtaliayaj kipataskej tein monekiskia.

Sayoj ke, itech xiuit 2009 itech se ueyi nechikol kikakkej se tanojnots tein ajsik itech ininyolo. Akin kitemakaya tanojnots kiniluij nejin tajtolmej akin ueliskiaj okachi tanojnotsaskej: “Se akin kinejnemiltia icarro uelis kichiuas maj youi iyekmakopa oso iopochmakopa sayoj komo moolinijtokya. No ijkon, Jesús uelis techyekanas uan techpaleuis maj okachi tiktekitilikan Dios sayoj komo tinejnentokejya, tein kijtosneki ke yekmelauj timochikaujtokej tikajsiskej tekimej”. * Choong Keon uan Julie kimachilijkej ke tokniuj yejuan kinnojnotstoya. Itech ueyi nechikol no kinchiuilijkej netajtanilmej ome tokniuan akin namikuanij akin tekititoyaj kemej misioneros ompa Taiwán. Yejuan ika tajtojkej keniuj kintelyolpaktiaya tanojnotsaskej uan kinextijkej ke motelnekia maj oksekin tapaleuitij. Choong Keon uan Julie oksepa kimachilijkej ke yejuan kiniluijtoyaj nejon tajtolmej.

Julie kijtoua: “Satepan ke panok ueyi nechikol, tiktataujtijkej Jiova maj techpaleuiani maj timoyolchikauanij tiyaskej Taiwán”. Uan no kijtoj: “Maski ijkon, tikmouiliayaj tikchiuaskej. Timomachiliayaj kemej ijkuak yekinika se moatamota kampa tel uejkatan”. Se texto tein kinpaleuij maj kemej yeskia moatamotakan yejua Eclesiastés 11:4, tein kijtoua: “Akin kiitstok ejekat amo tatokas, uan akin kiitstok mixti amo kiololos tatok”. Choong Keon kijtoua: “Tikixtalijkej amo sayoj ‘titachixtoskej’, ta tikchiuaskej tein  monekiskia uan peuak ‘titatokaj uan tikololouaj tatok’”. ¿Toni kichiujkej? Miakpa kichiujkej netataujtil, kiixtajtoltijkej kampa ika tajtoua ininnemilis misioneros, kintajkuilouilijkej miakej tokniuan akin tapaleuitoj Taiwán uan kinamakakej carros uan tein tapiayaj kalijtik. Eyi metsti satepan moajsiajya Taiwán.

Axkan, ompa Taiwán moajsij panoua cien tokniuan tein okseko kayomej uan tekititokej miakkan kampa moneki okachi tanojnotsanij. Kipiaj kemej 21 hasta 73 xiujmej, akin kayomej Australia, Canadá, Corea, España, Estados Unidos, Francia, Gran Bretaña uan Japón. Ompa tapaleuijtokej panoua cincuenta tokniuan siuamej akin ininselti. ¿Toni kinpaleuiani nochi nejin tokniuan akin tanojnotsaj ika yolpakilis maj tapaleuitij itech okse ueyi altepet? Maj tikitakan.

Laura, akin iselti uan kayot Canadá tapaleuito kemej precursor ompa Taiwán. Majtakti xiuit achto amo kiyolpaktiaya tanojnotsas. Yejua kimelaua: “Tein melauj, amo nechyolpaktiaya nitanojnotsas porin semi tepitsin nikisaya nitanojnotsati”. Sayoj ke seki itasojikniuan akin kayomej Canadá kiyoleujkej maj iniuan tanojnotsati México se metsti. Laura kijtoua: “Ijkuak yekinika keman yekmelauj uejkauak nimoajsik itech tanojnotsalis. Uan semi nikuelitak”.

Ika nejon tein kipanok, kinemilij tapaleuitiuj itech se nechikol kampa tajtouaj okse tajtol ompa Canadá. Moijkuiloj kampa momachtiskia chino, tapaleuij itech se grupo itech nejon tajtol uan kiixtalij tapaleuitiuj Taiwán. Itech metsti septiembre xiuit 2008, uelik kichiuak tein kiixtalijka. Laura kimelaua: “Hasta keman panok kemej se xiuit uelik kuali nimomachilij kampa nitapaleuijtok. Sayoj ke axkan nion niknemilia nimokepas Canadá”. ¿Keniuj kiita tanojnotsalis? Yejua kijtoua: “Nechtelyolpaktia. Amo onkak okse taman tein teualkuilia ueyi yolpakilis kemej ijkuak se kiita ke aksa kipata inemilis ijkon kemej kiixmati Jiova. Uan yejua nejon miakpa nikitani nikan Taiwán”.

Brian uan Michelle, akin namikuanij uan kipiaj panoua treinta xiujmej akin kayomej Estados Unidos, yajkej Taiwán kemej chikueyi xiuit achto. Yekinika kimachiliayaj ke amo semi tapaleuiayaj itech tanojnotsalis. Sayoj ke se misionero akin kipia kuali taixejekolis kiniluij: “Maski sayoj nankikauiliskej aksa se tratado, xikelnamikikan ke nejon taltikpaknenkej xa yekinika kikaki teisa tein kijtoua Jiova. ¡Yejua ika tein nankichiujtokej motelneki!”. Nejon tajtolmej tein teyolchikaua kinpaleuij Brian uan Michelle maj amo mosenkauanij. Okse tokniuj kiniluij: “Komo amo nankinekij nanmosenkauaskej, amo mojmostaj xikitakan ox okachi nanuelij tajtol chino, ta xikitakan keman mochiuas se ueyi nechikol ika okse”. Ijkon kichiujkej uan axkan tel kuali tekit kichiujtokej kemej precursor.

¿Toni uelis mitsonolinis xionmomachti se yankuik tajtol? Xikonixtali tionyas itech ueyi altepet kampa tikonuelitaskia tiontapaleuitiuj, xionyoui nechikolmej, xikonixtali tionmoajsis iniuan tokniuan akin ompa kayomej uan iniuan xiontanojnotsati. Brian kijtoua: “Keman tikonitas ke moajsij tel miakej akin kualtsin kikakij iTajtol Dios uan tikonitas netasojtalis tein mitsonnextiliaj tokniuan, mitsonolinis xiontapaleuiti itech nejon ueyi altepet”.

Sekin akin tapaleuitij kemej precursor ompa Taiwán tamachtiaj tajtol inglés uan ika nejon moixpanoltiaj. Kristin uan Michelle kinemilijkej kinamakaskej amichij. Kristin kimelaua: “Amo keman nikchiujtoya teisa kemej nejon, sayoj ke nejon tekit techpaleuia maj ueli tiksentokakan timoajsikan itech altepet”. Satepan kinajsik akin nochipa kitakouiayaj. Ika nejon, sayoj tekiti seki horas uan kinajsiya tein ika moixpanoltiskej, yejua ika ueli kichiuaj tein okachi moneki: tekitiskej kemej precursor uan ijkon kinpaleuiskej taltikpakneminij.

William uan Jennifer, akin kayomej Estados Unidos ajsikej Taiwán kemej chikome xiuit achto. William kijtoua: “Se momachtis tajtol, se tekitis kemej precursor, se kiyekpias nechikol, se tekitis uan okseki tamanok, uelis semi tesioujtis”. ¿Keniuj ueli kichiuaj nochi nejon uan amo kipolouaj yolpakilis? Kiixtaliaj kichiuaskej tein kemaj ueliskej. Kemej neskayot, amo kiixtalijkej kichiuaskej tein amo taixejekol ijkuak momachtiayaj chino. Ijkon, keman nesia ke amo okachi kisentokayaj ueliaj tajtol, amo mosenkauayaj.

William kielnamiki ke se tokniuj takalpanojkej kiyolmajxitij: “Xiyolpaki keman titekititok”. Tokniuj kijtosnekik ke ijkuak tikixtaliaj tikajsiskej se taman itekiyo Dios, moneki tiyolpakiskej keman tikchiujtoskej tein techpaleuis maj tikajsikan nejon tekit. William kijtoua ke nejon tajtolmej kipaleuij maj kichiuani tein moneki, maj kikakini tein kiyolmajxitiskiaj tokniuan akin taixyekanaj uan maj kipatani kemej kichiuaya teisa uan ijkon okachi kuali kichiuaskia tekit kampa tapaleuijtok. Tokniuj kijtoua: “Uan nejon tayolmajxitilis no techpaleuij maj tikixtalianij tikitatiuij itachijchiualis Dios itech nejin isla kampa semi takualtsinkan”.

Megan se tokniuj siuat kayot Estados Unidos akin iselti uan tekititok kemej precursor, mochikaujtok okachi kuali tajtos chino. Ijkon kemej William uan Jennifer, yejua ‘yolpaki keman tekititok’. Nochi itamiampa semana youi iniuan seki tokniuan akin tanojnotsaj kampa semi kiteluelitaj: ueyiatenoj kampa ajsij barcos ompa Kaohsiung tein okachi ueyi itech nochi Taiwán. Itech se barco uan okse, Megan uelini kinnojnotsani amichkitskianij akin kayomej Bangladés, Filipinas, India, Indonesia, Tailandia uan Vanuatu. Tokniuj kimelaua: “Amichkitskianij amo uejkaua yetokej ompa atenoj. Yejua ika, ompa tikiniluiaj ox kinekij momachtiskej Biblia. Kemej tiknekij maj nochin kikakikan iTajtol Dios, miakpa nikinsenmachtia ika  Biblia naui oso makuil taltikpakneminij”. ¿Uan okachi ueliya tajtoua chino? Yejua kijtoua: “Nikuelitaskia okachi ijsiujka niuelis, sayoj ke nimochikaua amo nikelkauas tein se tokniuj nechiluij se tonal: ‘Ximochikaua tikchiuas nochi tein tiuelis uan Jiova mitspaleuis’”.

Cathy akin kayot Gran Bretaña, achto ke yaskia itech okse ueyi altepet, kinemilij tajtanis katiyejua uejueyi altepemej amo tamouilil yeskia maj ompa tapaleuiti se tokniuj siuat akin iselti. Satepan ke kichiuak netataujtil, tajkuiloj itech seki sucursales kampa tajtanik ox ompa amo tamouilil komo youi tapaleuiti. Ika nejmachkayot kiitak tein kinankilijkej uan kiixpejpenak yas Taiwán.

Itech xiuit 2004, keman kipiaya 31 xiujmej, Cathy yajki Taiwán kampa moixpanoltia ika amo miak tomin. Yejua kielnamiki: “Nikintajtanij tokniuan kani amo semi patiyoj kinamakaj tein se kimajseuas. Nejon nechpaleuij maj okachi miak tonalmej nechajsini tomin tein nikpiaya”. ¿Toni kichiua tein kipaleuia maj yolpaki nemis ika sayoj tein tayekantok? Cathy kielnamiki: “Nikchiua netataujtil uan niktajtania Jiova maj nechpaleui maj niyolpakto ika tapalol tein nikmajseua uan ika taken tein nikui maski amo patiyoj. Uan Jiova kinankilia nonetataujtiluan. Nechmachtia maj nikita toni yekmelauj nechpoloua uan maj niyolpaki maski amo nikpia nochi tein niknekiskia”. Uan no kijtoua: “Nikuelita nemilis tein nikpia porin nechpaleuia maj niktayekanalti itekiyo Jiova”.

Maski nemi ika amo miak taman amo kijtosneki ke amo yolpaki, ta tel kuali momachilia. Cathy kimelaua: “Nikan tel miakej moajsij akin kiseliaj kuali tanauatilmej. ¡Semi teyolpaktij nejon!”. Tein melauj, ijkuak ajsik itech xolal kampa peuak tekiti kemej precursor ompa Taiwán, sayoj moajsiaj ome nechikolmej itech tajtol chino, axkan moajsij chikome. Cathy kijtoua: “Nikitas keniuj momiakiliaj tokniuan uan nitapaleuis maj oksekin kiselikan kuali tanauatilmej, kichiua maj niyolpaki itech sejse tonal tein nikpanoua”.

¿Keniuj tekititokej Choong Keon uan Julie akin achto ininka titajtojkej? Yekinika, Choong Keon kinemiliaya ke amo semi tapaleuiskia itech nechikol ta semi tepitsin uelia chino. Sayoj ke tokniuan akin ompa kayomej amo ijkon kiitayaj. Yejua kijtoua: “Keman nechikol moxeloj nechmakakej yankuik tekimej kemej tapaleuijkej. Ijkuak nikmachilij ke yekmelauj nitapaleuijtoya kampa okachi moneki nepaleuil”. Uan no, ika yolpakilis kijtoj: “¡Nechtelyolchikauak nikitas ke hasta nejua ueli nitekiti uan moneki nonepaleuil!”. Axkan Choong Keon tekiti kemej tayekankej. ¿Uan toni kinemilia inamik, Julie? Yejua kijtoua: “Amo keman ijkon timomachiliayaj nion tiyolpakiaj kemej axkan. Tiualajkej porin tiknekiaj titapaleuiskej sayoj ke tikmachiliaj ke tejuan techpaleuiani nochi tein kuali tein tikpanouanij. ¡Semi tiktasojkamatiliaj Jiova maj techkauani maj titekitikan nikan!”.

¿Amo uejkaua tiktamiti nemachtil itech tamachtiloyan uan timotajtania toni tikchiuas ika monemilis? ¿Moselti uan tikuelitaskia okachi titapaleuis itech inechikol Jiova? ¿Tikonneki maj mochankauan kielnamikikan miak taman tein kichikauas inintakuaujtamatilis? ¿Amo tiontekitiok porin tikonajxitijya xiuit uan uelis tikonpaleuis oksekin ika tamatilis tein tikonselijya itech monemilis? Miakkan monekiok maj tokniuan tapaleuitij itech tanojnotsalis. Uelis tikonyekmatis ke komo tikonixtalia okachi tiontanojnotsas kampa okachi moneki nepaleuil, tikonpias miak tatiochiualismej.