Kemansa, tein kiajsinij tatemouanij kiyeknextia ke yekmelauj nenkej taltikpakneminij tein Biblia ininka tajtoua. Kemansa ixnesi inintokay itech teisa tein uejkauj kayot, oso ompa moijtoua inintokay taltikpakneminij akin mouikayaj iniuan akin ixnesij itech Biblia. Kemej neskayot, itech xiuit 2011 seki tatemouanij tein kayomej Israel kitematiltijkej seki taman ijkuak kiajsikej se kaxontsin tein kayot kemej 2,000 xiujmej achto. Nejon chijchiujtok ika istaktet tein kipiaya iomiyouan se siuat tein ompa kitalijkaj satepan ke uejueliuik inakayo.

Nejon kaxontsin kipia se tajkuilol tein kijtoua: “Míriam, isiuapil Yeshúa ikonetsin Caifás, itiopixkauj Maazías tein pouia Bet Imrí”. Caifás katka tayekankatiopixkat judío tein moajsik iniuan akin kijtojkej maj kitatsakuiltikan uan maj kimiktikan Jesús (Juan 11:48-50). Uan itech se amaix tein kikixtij tajkuilojkej Flavio Josefo kijtoua ke nejin tayekankatiopixkat katka “José tein no motokaytiaya Caifás”. Yejua ika, moyekita ke nejin kaxontsin iaxka katka se ichankauj Caifás. Uan itech se kaxontsin tein kiajsikej achto, tein kinemiliaj ke iaxka katka Caifás, moajsi se tajkuilol tein kitokaytia Yehosef bar Caiapha (José ikonetsin Caifás). * Nejin kinextia ke Míriam katka ichankauj Caifás.

Autoridad de Antigüedades de Israel kitematiltij ke nejon kaxontsin kinkuilijkej seki tachtekinij tein kikixtijkaj itech se miketekoch tein uejkauj kayot katka. Tein kiajsikej keman kiitakej nejin kaxontsin uan tajkuilol tein kipia, kiyeknextia ke melauak tein moijtoua.

Nejon kaxontsin kitematiltia se taman tein yankuik. Ne uejkauj, ompa Israel tiopixkamej xeliujtoyaj itech 24 grupos tein moixpatatiayaj keman tekitiaj itech templo ompa Jerusalén, uan tein yetoya hasta satepan yejua kampa moajsia “Maazías” (1 Crón. 24:18). Autoridad de Antigüedades de Israel kijtoua ke tajkuilol kinextia ke “ichankauan Caifás pouiaj itech grupo kampa moajsia Maazías”.

Itech tajkuilol no ixnesi “Bet Imrí”. Autoridad de Antigüedades de Israel kijtoua ke nejin tokayit uelis kijtosnekis ome taman. Yekinika uelis yeski “itokay se kalyetouanij tein katkaj tiopixkamej, ikoneuan Imer (Esdras 2:36, 37; Nehemías 7:39-42), akin tekoneuan pouiaj itech grupo kampa moajsia Maazías”. Ojpatika taman tein uelis kijtosnekis yejua “xolal kampa kayot katka nejon siuat tein momikilijkaya oso nochi ichankauan”. Sayoj ke nejon kaxontsin kiyeknextia ke Biblia ininka tajtoua taltikpakneminij tein pouiaj itech seki kalyetouanij tein yekmelauj nenkej.