TAMACHTILIS ITECH IPEUJYAN AMAIX | ¿TONI PANOUA SATEPAN KEMAN TIMOMIKILIAJ?
¿Toni techpanoua keman timomikiliaj?
“Nikneltokaya ke satepan ijkuak se momikilia tepanoua eyi taman: se youi iluikak, miktan oso purgatorio kampa se mochipaua uan ijkon uelis se ajsis iuan Dios. Niknemiliaya ke amo senkis katka niyolkuali uan ijkon niyas iluikak, nion senkis amo niyolkuali uan ijkon niyas miktan. Tein amo nikyekmatia toni katka purgatorio. Amo keman nikixtajtoltijtoya tein Biblia tamachtia; sayoj nikmatia tein oksekin kijtouayaj.” (Lionel)
“Nechmachtijkaj ke tinochin tiyouij iluikak, sayoj ke amo nikyekmatia ox melauak nejon. Nikneltokaya ke ijkuak se momikilia ompa tami nochi.” (Fernando)
¿Tionmotajtaniani toni panoua keman se momikilia? Akin tikintasojtaj uan momikilijkejya, ¿tajyouijtokej kansaika? ¿Oksepa tikinitaskej? ¿Keniuj uelis tikmatiskej ke oksepa nemiskej akin momikilijkejya? Maj tikitakan tein Biblia tamachtia, ijkon tikmatiskej itanankililuan nejon netajtanilmej. Yekinika maj tikitakan toni tamachtia keman ika tajtoua mikilis uan satepan tikitaskej keniuj kinankilia okseki eyi netajtanilmej.
¿Keniuj moajsij mikemej?
TEIN BIBLIA TANANKILIA: “Akin yoltokej kiyekmattokej ke momikiliskej; sayoj ke akin momikilijkejya, yejuan amo kimatijok nion teyi, uan amo teyi kitanijok, porin yejuan kinelkaujkejya. Nochi tein momay kiajsis toni kichiuas, xikchiua ika mochikaualis, porin amo onkak tekit nion teisa tein monemilia mochijchiuas nion taixmatilis nion tamatilis itech Miketekoch, * kampa tiyouj.” (Eclesiastés 9:5, 10.)
Keman Biblia ika tajtoua Seol, kijtosneki taltekoch. Seol sayoj kiixnextia ke mikemej amo teyi kimatij nion amo teyi uelij kichiuajok. Kemej neskayot, xikonnemili tein Job akin amo kikauaya Dios kiajsikamatia keman ika tajtouaya taltekoch. Itech sayoj se tonal momikilijkej nochi ikoneuan uan kipoloj nochi tein kipiaya. Satepan semi tajyouij keman nochi inakayo kokotokatoya. Ompa kitataujtij Dios: “Okachi kuali itech Seol xinechtati, ompa xinechtati hasta maj pano mokualanyo” (Job 1:13-19; 2:7; 14:13). Job, amo kineltokaya maj itech taltekoch oso miktan onkaskia tit, kampa okachi tajyouiskia. Ta yejua kineltokaya, ke ompa ueliskia moseuis.
Okse taman tein techpaleuis maj tikmatikan keniuj moajsij mikemej yejua tikixtajtoltiskej tajkuilolmej itech Biblia kampa ininka tajtoua akin oksepa kipiakej nemilis. (Xikonita recuadro “ Chikueyin akin oksepa kipiakej nemilis tein Biblia ika tajtoua”.)
Nion semej akin oksepa kipiak nemilis kijtoj ke moajsia kampa senkis yolpakia nion kampa kitajyouiltijtoyaj. Komo ompa moajsinij, ¿amo kitetapouiskiaj? ¿Amo tikonnemilia ke moijkuiloskia itech Biblia uan ijkon momatiskia kani moajsiaj? Sayoj ke, Biblia amo teyi kijtoua. Yejuan amo teyi kijtojkej, porin amo teyi kipanokej. Yejuan amo teyi kimatiaj, kemej yeskia kuali kochtoskiaj. Tein melauj, Biblia kemansa kikui tajtol “kochilis” uan ika tajtoua mikilis. Kemej neskayot, keman ika tajtoua tekiuaj David, iTajtol Dios kinextia ke “kochik itech mikilis” uan no ijkon kipanok Esteban se imomachtijkauj Jesús (Hechos 7:60; 13:36, TNM).
Yejua ika, ¿tami nochi keman se momikilia? ¿Uelis se “ijsas” keman se kochi itech mikilis?
^ párr. 7 Itech tajtol hebreo Seol uan itech tajtol griego Hades kijtosneki “taltekoch”, oso “kampa kinpachouaj mikemej”. Seki Biblias kikepaj nejin tajtolmej kemej “miktan”, sayoj ke itech iTajtol Dios nion seko kijtoua maj mikemej kintajyouiltikan ika tit.
