TLAMACHTIL 35

¿Ken uelis timouikaskej iuan toTajtsin Dios?

Ijkuak Gabriel itlaj amo kuali okipanok, okitak non okipaleui okachi kuali mouika iuan toTajtsin Dios. Ye okijto: “Notajtsin otechkajte ijkuak onikpiaya 12 xiuitl. Nikilnamiki, se youak sapanoua oniktlatlaujti Jehová ma mokopa notajtsin”.

Gabriel sapanoua omoyolkokouaya, ik non, opejki kitlajtoltia Biblia. Okajsik se texto kanin kijtoua Jehová kinpaleuiaj iknomej (Salmo 10:14). Ijkuak okitlajtolti okiyolchika, ye okijto: “Ijkuak oniktlajtolti onikajsikamatki Jehová kineki nechpaleuis uan onechilnamikti ye notajtsin. Amo onka okse ken Jehová”.

XAMO mitspanotok ken Gabriel. Pero xikilnamiki: Jehová kineki iuan ximouika. Biblia kijtoua: “Xiwalmijkuanikah [noso ximotokikan] inawak Dios, iwa Ye mijkuanis [noso motokis] nomonawak” (Santiago 4:8). Nin kijtosneki, maski amo tikitaj uan sapanoua ueyititok, toTajtsin Dios kineki iuan ma timouikakan.

Para timouikaskej iuan totajtsin Dios moneki itlaj tikchiuaskej. Ma tikijtokan tikpia se xochitl. Tla tikneki ma moskalti uan kualtsin ma mota, ¿tlen moneki tikchiuas? Amo moneki tiktlalis kanin sapanoua tlatotonia uan tikatekis ijkuak moneki. Moneki tikmaluis. Tla tikneki timouikas iuan toTajtsin Dios noijki moneki timochijchikauas. ¿Tlen uelis tikchiuas para kuali iuan timouikas?

Ximomachti

Para ikaj iuan timouikas moneki nochipa iuan timotlapouis uan tikkakis tlen mitsiluia. Noijki ijkon moneki tikchiuaskej tla tiknekij timouikaskej iuan toTajtsin Dios. ¿Ken uelis tikkakiskej toTajtsin Dios? Tla timomachtiaj tlen kijtoua Biblia (Salmo 1:2, 3).

Xamo amo okachi mitspaktia timomachtis. Xamo okachi mitspaktia tikitas televisión, timauiltis videojuegos uan tiyetos iuan moyolikniuan. Pero tla tikneki timouikas iuan toTajtsin Dios moneki tikkakis tlen kijtoua iTlajtol.

Mitspaktis timomachtis Biblia, maski amo okachi mitspaktia itlaj tiktlajtoltis. Achto moneki timajxilis. ¿Ken tikchiuas? Xikchiua ken se ichpochtli tlen itoka Lais, ye okijto: “Nochipa niktlajtoltia Biblia, ijkuak nimeua niktlajtoltia se capítulo”. Okse ichpochtli tlen itoka María uan kipia 15 xiuitl, kijtoua: “Ijkuak yinikochis niktlajtoltia Biblia”.

¿Ken tiktlajtoltis Biblia? Achto xikita tlen kajki  itech página 292. Satepan xikijkuilo tlen hora tiktlajtoltis uan timomachtis.

․․․․․

Mitspaleuis tla tikijkuilos tlen hora timomachtis. Pero ijkuak timomachtis Biblia xamo seki tlamantli oui tikajsikamatis. Ijkon okipanok Jezreel, se telpochtli tlen kipia 11 xiuitl, ye kijtoua: “Ualeua tlen niktlajtoltia amo nikajsikamati”. Amo ximosotlaua. Xikilnamiki, moyolikni Jehová mitstlapouia ijkuak tiktlajtoltia Biblia, ijkon peuas mitspaktis timomachtis.

Nochipa ximotlatlaujti

ToTajtsin Dios kipaktia iuan ma timotlapouikan. Iuan timotlapouiaj ijkuak timotlatlaujtiaj, nin yetoskia ken se tetliokolil. Uelis timotlapouis iuan Jehová ijkuak tlanestok noso yiyouak, ye mitskakis maski san tlen hora tiktlatlaujtis. Ik non, Biblia kijtoua: “Nochipa xikilikah n Toteko tlan nonkinekih keman nonmotiotsajtsiliah, xiktlajtlanilikah iwa ximotlasojkamatikah” (Filipenses 4:6).

Nin kijtosneki uelis tikiluis toTajtsin Dios nochi tlen mitspanoua noso mitstekipachoua. Pero noijki xiktlasojkamatili. Ijkon ken tikintlasojkamatiliaj moyolikniuan. Jehová moyolikni tlen okachi mitspaleuia (Salmo 106:1).

Xikijkuilo tlen tikneki tiktlasojkamatilis Jehová.

․․․․․

Tla se tonal sapanoua timoyolkokoua uan timotekipachoua, ¿tlen uelis tikchiuas? Biblia kijtoua: “Xikmaka Jehová motlamamal uan ye mitspaleuis. Amo kikauas ma uetsi akin yolmelauak” (Salmo 55:22).

Xikijkuilo tlen mitstekipachoua uan xikilui Jehová ijkuak tiktlatlaujtis.

․․․․․

Ma mitspaleui tlen mitspanoua

Para timouikas iuan toTajtsin Dios amo xikilkaua tlen okijkuilo David, itech se tlakuikali okijto: “Xikyejyekokan uan xikitakan Jehová yolkuali” (Salmo 34:8). Achto kijkuiloskia nin, okipanok seki tlamantli temomojti. Tekiua Saúl okinekiaya kimiktis, ik non, omotlatito kanin katej filisteos pero satepan okixmatkej, filisteos uelis kimiktiskia. ¿Tlen okichi David? Okichi ken okuatlapolo (1 Samuel 21:10-15).

Pero David amo okijto san ye omomakixti, ijkuak okijkuilo tlakuikali okijto toTajtsin Dios okipaleui “Oniktlatlaujti Jehová uan ye onechnankili. Onechpaleui ijkuak onimomojtiaya” (Salmo 34:4). Tlen okipanok David okipaleui, ik non, techiluia: “Xikyejyekokan uan xikitakan Jehová yolkuali”. *

Xikilnamiki ken Jehová omitspaleui ijkuak omitspanok tlen amo kuali uan xikijkuilo, porque ualeua techpaleuia pero amo tikpatioita.

․․․․․

Sejse tejuan moneki timochijchikauaskej timouikaskej iuan toTajtsin Dios maski totatajuan otechmachtijkej tlen melauak kijtoua Biblia. ¿Timochijchikajtok timouikas iuan toTajtsin Dios? Tla amo, nin capítulo mitspaleuis tikchiuas seki tlamantli. Jehová mitsteochiuas tla timochijchikaua iuan timouikas, Biblia kijtoua: “Xiktlajtlanikah tlan nomechpoloa iwa nomechmakaskeh. Xiktemokah tlan nomechpoloa iwa nonkajsiskeh” (Mateo 7:7).

TLA TIKNEKI OKACHI TIKMATIS XIKITA ACHTO AMOCHTLI ITECH CAPÍTULO 38 UAN 39

ITECH OKSE CAPÍTULO

¿Timomojtia titetlapouis? ¿Ken uelis tikijtos tlen tikneltoka?

[Nota]

TEXTO TLEN MONEKI TIKILNAMIKTOS

“Ma yolpakikan akinmej kimatij moneki kitemoskej toTajtsin Dios” (Mateo 5:3, TNM).

NIN UELIS TIKCHIUAS

Tla nochipa tiktlajtoltia 4 páginas tlen kipiaj Biblia tlamis tiktlajtoltis san itech se xiuitl.

¿OTIKMATIAYA?

Tiktlajtoltijtok nin amochtli uan tiktlakamati itlanauatiluan porque Jehová kineki yetos moyolikni (Juan 6:44).

¡MA TIKCHIUAKAN!

Nin nikchiuas para nikajsikamatis Biblia ijkuak nimomachtis: ․․․․․

Nin nikchiuas para okachi kualtsin nimotlatlaujtis: ․․․․․

¿Tlen nikneki nikintlajtlanis notatajuan? ․․․․․

¿TLEN TIMOKUAYEJYEKOUA?

● ¿Tlen uelis tikchiuas para mitspaktis timomachtis Biblia?

● ¿Techkaki Jehová ijkuak timotlatlaujtiaj maski titlajtlakolejkej?

● ¿Tlen uelis mitspaleuis para okachi kuali timotlatlaujtis?

[Tlen moijtoua]

Ijkuak onikatka takotsin nochipa san se tlamantli onikiluiaya Jehová pero axkan nikiluia tlen kuali uan tlen amo kuali nechpanoua, ik non, nochipa nikiluia Jehová miak tlamantli’’ (Eva).

[Recuadro uan foto]

 Xikixmati moBiblia

1. Xikpejpena tlen mitspaktia. Xikilui Jehová ma mitspaleui xikajsikamati tlen tiktlajtoltia.

2. Kuali xiktlajtolti. Amo san xiktlajtolti. Kuali ximokuayejyeko uan xikchiua nin makuili tlamantli: Xikita tlen uelis opanok, ximokuayejyeko tikkaki tlen tiktlajtoltijtok uan tikijnekui tlen ompa kajki noijki ximokuayejyeko tikmachilia noso tikyekoua tlakuali... Ijkon tlen tiktlajtoltis okachi tikajsikamatis.

3. Ximotlajtlani. Ijkuak tlamis tiktlajtoltis ximotlajtlani:

● ¿Tleka Jehová okinek ma kijkuilokan nin tlamantli?

● ¿Ken akinmej uelis nikchiuas?

● ¿Tlen nechmachtia?

● ¿Ken nechpaleuia okachi ma nikixmati Jehová tlen oniktlajtolti?

4. Ximotlatlaujti. Xikilui Jehová tlen yotimomachti uan ken tikchiuas tlen otiktlajtolti. Xikilnamiki moneki tiktlasojkamatilis porque otechmakak itlajtol, Biblia.

[Foto]

“Motlajtol se lámpara para nokxi uan se tlauili para noojui” (Salmo 119:105).

[Recuadro uan foto]

Tlen okachi ipati

¿Amo timajxilia timotlatlaujtis uan timomachtis Biblia? Moneki tikmatis tlen achto tikchiuas.

Ma tikchiuakan nin tlamantli. Itech se cubeta xikintlali uejueyij temej, satepan xiktlali xali. ¿Tlen tikpia? Se cubeta tlen kipia uejueyij temej uan xali.

Axkan xikinkixti uejueyij temej uan xali, oksepa xikintlali ijtik cubeta pero achto xali uan satepan temej. ¿Tlen panoua? Ayakmo akis, ¿amo melauak? Ijkon opanok porque achto otiktlali xali.

¿Tlen mitsmachtia? Tla achto tikchiuas seki tlamantli, ken timoyolpaktia, ayakmo uelis tikchiuas tlen okachi ipati, ken timouikas iuan toTajtsin Dios, ik non, Biblia kinmiluiaj akinmej kichiuaj ken Cristo moneki “nochipa nonkimatiskeh ken ijki nonkipejpenaskeh tlan okachi kuali” (Filipenses 1:10). Tla ijkon tikchiuas timajxilis timomachtis uan timoyolpaktis. Xikilnamiki moneki tikchiuaskej achto tlen okachi ipati.

[Foto]

Timouikaskej iuan toTajtsin Dios yetoskia ken se xochitl, moneki tikmaluiskej para uelis moskaltis