Jehová kichia akinmej yomonamiktijkej nochipa ma kichiuakan tlen okijtojkej ijkuak omonamiktijkej. Ijkuak Jehová okinnamikti achto tlakatl uan achto siuatl, ye okijto: “Ik non, tlakatl [...] mosetilis iuan isiua, uan moneki mochiuaskej san se tlalnakayotl”. Opanok miak xiuitl uan Jesucristo noijki okijto nonmej tlajtolmej: “Yika, tlan Dios yokiseitili, amaka makinxexelo” (Génesis 2:24; Mateo 19:3-6). Ken tikitaj, Jehová uan Jesús  kijtoaj akinmej monamiktiaj, moneki nochipa san sekan ma yetokan, uan tlami innamiktilis ijkuak tlakatl noso siuatl miki (1 Corintios 7:39). Pampa namiktilistli moneki mopatioitas, amo ikaj san niman uelis kijtos kineki moxelos. Jehová kikokolia ijkuak ikaj mokajkaua inmixpan tekiuajkej san pampa kineki, uan amo ijkon ken kijtoa Biblia (Malaquías 2:15, 16).

¿Uan san tlen ika uelis ikaj mokajkauas inmixpan tekiuajkej? Jehová kikokolia ijkuak ikaj momekatia noso auilnemi (Génesis 39:9; 2 Samuel 11:26, 27; Salmo 51:4). Sapanoa kikokolia auilnemilistli, ik non, kitekauilia ma mokajkauakan inmixpan tekiuajkej ijkuak ikaj auilnemi. (Itech tlamachtil 9, párrafo 7, kijtoa tlen poui itech auilnemilistli.) Jehová kikauilia akin okikajkayajkej ma kipejpena tla ok kineki yetos iuan inamik, noso kijtos mokajkauaskej inmixpan tekiuajkej (Mateo 19:9). Ik non, tla kijtos mokajkauaskej inmixpan tekiuajkej, amo kichiuas itlaj tlen Jehová kikokolia. Pero nion se tokni uelis kiluis ijkon ma kichiua. Akin okijkakayajkej uelis mokuayejyekos itech miak tlamantli uan kitlapojpoluis inamik, tla kita melauak moyolkuepa. Ye kijtos kox mokajkauaskej inmixpan tekiuajkej, uan satepan kixikos nochi tlen panos (Gálatas 6:5, TNM).

Ualeua, ijkuak panoa itlaj tlen sapanoa amo kuali, akin kichiua ken Cristo uelis kijtos kox moxelos itech inamik, noso kox mokajkauaskej inmixpan tekiuajkej, maski inamik amo omomekati. Ijkuak ijkon panoa, Biblia kijtoa akin kineki moxelos “ayakmó oksepa mamonamikti, noso mamotlapojpolwi iwa [inamik]” (1 Corintios 7:11). Uan amo kitemos ikaj pampa oksepa monamiktis (Mateo 5:32). Axkan ma tikitakan seki ouijkayotl tlen kipiaj akinmej omonamiktijkej uan tlen kichiua ma moxelokan.

Ijkuak amo kineki kinmakas tlen kinpoloa ikalchanejkauan. Katej tlakamej tlen amo kinmakaj tlen kinpoloa inkalchanejkauan pampa amo kinekij, maski uelis kichiuaskej, ik non, sapanoa tlasojti inkalijtik. Pero itech non, Biblia kijtoa: “Tla aka amo kimpalewia [...] non de icha, non tlakatl inewia kitenextia mach milák tlaneltoka iwa okachi amokuali kichijtok ke non amo kineltokah n Toteko Dios” (1 Timoteo 5:8). Tla se tlakatl  amo kineki kinmakas tlen kinpoloa ikalchanejkauan, siuatl uelis kijtos pampa kuali yetos ye uan ikoneuan, moxelos itech inamik uan yas inmixpan tekiuajkej kanin kimakaskej se amatl kanin kijtos uelis moxelos. Ijkuak se tokni siuatl kijtos inamik ijkon kichiua, tlayekankej itech tlanechikol moneki kitaskej nochi tlen panotok, pampa akin amo kinmaka tlen kinpoloa ikalchanejkauan, uelis kikixtiskej itech tlanechikol.

Ijkuak sapanoa kiuiteki inamik. Ualeua, tlakatl noso siuatl sapanoa kiuiteki inamik uan uelis kikokos noso kimiktis. Tla akin teuiteki se tokni, tlayekankej moneki kuali kitaskej tla melauak ijkon panotok, pampa akin sapanoa kualani uan teuiteki uelis kikixtiskej itech tlanechikol (Gálatas 5:19-21).

Ijkuak amo kikauilia ma kiueyichiua Jehová. Ualeua tlakatl noso siuatl sepa amo kikauilia inamik ma kitekichiuili Jehová, noso kichiualtia amo ma kintlakamati itlanauatiluan toTajtsin Dios. Ijkuak ijkon kipanos se tokni, pampa ‘kitlakitas tlan Dios kijtoa iwa amo tlan kijtoah n tlakah’, uelis moxelos itech inamik uan yas inmixpan tekiuajkej kanin kimakaskej se amatl kanin kijtos uelis moxelos (Hechos 5:29).

Itech nochi tlamantli, ijkuak panoa itlaj tlen sapanoa amo kuali ken yotikitakej, amo ikaj uelis kiluis tokni akin kitlajyouiltia ma moxelo itech inamik noso ma yeto iuan. Maski tlayekankej uan oksekimej tokniuan tlen kipiaj chikauak intlaneltokilis uelis kinpaleuiskej ika principios bíblicos, ma kilnamiktokan san ye Jehová akin kuali kimati ken kajki tlakatl uan isiua. Se tokni tlakatl noso siuatl, amo kiteititis kitlakaita toTajtsin Dios nion namiktilistli, tla kajxitilia ouijkayotl tlen kipiaj pampa kineki moxelos itech inamik. Jehová kuali kimati tla ikaj san kitemojtok ken uelis moxelos, maski sapanoa kitlatis tlen kineki kichiuas. Ken kijtoa Biblia, “nochi tlan Ye okichijchi, kita ik pánixko iwa ik tlaijtik, iwa se tonati” tinochtin techtlajtlanilis tlen tikchijtokej (Hebreos 4:13). Uan tla se tokni kixikojtok tlen sapanoa amo kuali uan satepan kijtos moxelos itech inamik, amo ikaj ma kiteneua. Pampa ken kijtoa Biblia, “tosejselti tikmokuitiskeh inawak Dios nochi tlan otikchijkeh” (Romanos 14:11, 12).