Kuali tlajtoli tlen techilia tiyoltoskej nochipa itech Tlaltikpak, kajki itech Biblia (Salmo 37:29). Nin amochtli kipia 66 amochtin tlen okijkuilojkej 40 tlakamej yolmelajkej tlen toTajtsin Dios okinpejpenki. Achto makuili amochtin yikipiaj kanaj 3,500 xiuitl okinmijkuilo Moisés, uan saiktlami amochtli yikipia kanaj 1,900 xiuitl okijkuilo tlatitlanil Juan. Nochi tlen ijkuilitok itech Biblia iaxka toTajtsin Dios. ToTajtsin Dios ika iespíritu santo omotlapoui iuan tlakamej tlen okijkuilojkej Biblia (2 Samuel 23:2). Nonmej tlakamej okijkuilojkej tlen okinmili toTajtsin Dios, amo tlen yejuan omokuayejyekojkej. Ik non, tlen ijkuilitok itech Biblia iaxka Jehová.​—Xiktlajtolti 2 Timoteo 3:16 uan 2 Pedro 1:20, 21.

Xikita video ¿Akin iaxka tlen ijkuilitok itech Biblia?

Pampa Biblia iTlajtol toTajtsin Dios. Uan ijkon tikijtoaj pampa tlen Biblia kijtoa panos satepan melauak mochiua, itlaj tlen tlaltikpaktlakamej amo ueli kichiuaj (Josué 23:14). San toTajtsin Dios akin kipia miak chikaualistli ueli ijkon kichiua.​—Xiktlajtolti Isaías 42:9 uan 46:10.

Tla toTajtsin Dios techmaka se amochtli, uelis tikijtoskej kipia miak ipati. Yomochijchijkej sapanoa miakej Biblias uan ika tlatlamantli tlajtolmej. Uan maski yikipia miak xiuitl okijkuilojkej Biblia, achto ompa yomoijtojka tlen axkan tlaltikpaktlakamej ixtlamatkej kimatij. Uan noijki nochi tlen okijkuilojkej 40 tlakamej mochiua san se tlajtoli. * Noijki itech nochi Biblia tikitaj tlasojtlalistli tlen kipia toTajtsin Dios uan noijki axkan Biblia uelis kichiuas ikaj ma kipatla inemilis. Ik non, axkan miakej tlaltikpaktlakamej kineltokaj Biblia melauak iTlajtol toTajtsin Dios.​—Xiktlajtolti 1 Tesalonicenses 2:13.

Xikita video ¿Uelis tikneltokaskej Biblia kijtoa tlen melauak?

Biblia techtlapouia itech se tlajtoli tlen melauak kuali. Techtlapouia tlen kineki toTajtsin Dios pampa nochtin tlaltikpaktlakamej. Noijki techtlapouia ijkuak yikin okinchijchijkej tlaltikpaktlakamej yejuan amo otetlakamatkej, ik non, ayakmo uelij ochantikej itech xochitlali uan noijki techtlapouia ken Tlaltikpak oksepa mochiuas se xochitlali.​—Xiktlajtolti Apocalipsis 21:4, 5.

ITlajtol toTajtsin Dios kipia tlanauatilmej, tlajtolmej tlen techyekanaj uan techpaleuiaj. Uan noijki tikajsij sekimej neskayomej tlen techmachtiaj ken mouika toTajtsin Dios iuan tlaltikpaktlakamej, uan nin techmachtia ken iyelis ye. Ik non, Biblia techpaleuia pampa kuali tikixmatiskej toTajtsin Dios. Noijki techmachtia ken uelis kuali timouikaskej iuan.​—Xiktlajtolti Salmo 19:7, 11; Santiago 2:23, uan 4:8.

Ijkuak Jesús okinekiaya kijtos tlen kijtosnekia iTlajtol toTajtsin Dios, achto okintlajtoltiaya tlaxelolmej uan satepan okiyekijtoaya tlen kijtosnekia. Nin amatlajkuilol noijki ijkon techmachtia pampa techpaleuis tikajsikamatiskej Biblia.​—Xiktlajtolti Lucas 24:27, 45.

Tejuan tikneltokaj melauak tiyolpakis ijkuak timomachtis kuali tlajtolmej tlen toTajtsin Dios techmaka. Maski ijkon, sekimej tlaltikpaktlakamej amo kinpaktia, uan oksekimej kualanij ijkuak kintlapouia itech Biblia. Maski ijkon, amo xikaua non ma mitstsakuili. Pampa ken kijtoa Biblia, nochtin akinmej momachtiskej itech toTajtsin Dios uelis kipiaskej yolilistli tlen amo keman tlamis.​—Xiktlajtolti Juan 17:3, NM.