1 Tesalonicenses 4:1-18
4 Nokniuan, yotimechmachtijkej tlen moneki nankichiuaskej para nankiyolpaktiskej toTajtsin Dios uan ijkon nankichijtokej. Pero axkan timechiluiaj uan timechtlatlaujtiaj ika itoka toTeko Jesús okachi ijkon xikchiuakan.
2 Namejuan yinankimatij tlen otechilui toTeko Jesús matimechnauatikan.
3 ToTajtsin Dios kineki xiyetokan nanyolchipauakej uan amo xiauilnemikan.*
4 Nochtin namejuan xikmatikan ken nankinauatiskej namocuerpo para mayeto chipauak uan makitlakaitakan.
5 Amo xikchiuakan ken akinmej amo kixmatij toTajtsin Dios, porque yejuan sapanoua kinekij ikaj iuan motekaskej uan san kinekij ijkon kichijtoskej.
6 Namokni amo xiktoktikan tlen amo kuali porque Jehová kintlajyouiltia akinmej ijkon kichiuaj. Ijkon ken yotimechiluijkej uan yotimechnejmachtijkej.
7 Porque toTajtsin Dios otechnotski para matiyetokan tiyolchipauakej uan amo para matiyetokan tisokiojkej.
8 Akin amo ijkon kichiua kijtosneki kixtopeua toTajtsin Dios uan amo kixtopeua se tlakatl. ToTajtsin Dios namechmaka espíritu santo.
9 Namejuan amo moneki timechtlajkuililiskej para nanmotlasojtlaskej ken namiknimej, porque toTajtsin Dios namechmachtijtok ken moneki nanmosepantlasojtlaskej.
10 Namejuan ijkon yinankichijtokej inuan nochtin tokniuan tlen chantij Macedonia. Nokniuan, pero tejuan timechiluiaj okachi ijkon xikchiuakan.
11 Ximochijchikauakan kuali ximouikakan, amo ximokajkalakikan kanin amo namechnotsaj uan xitekipanokan ijkon ken yotimechnauatijkej.
12 Ijkon akinmej amo tlaneltokaj kitaskej nanyeknemij uan namejuan amitlaj namechpolos.
13 Nokniuan, tiknekij xikajsikamatikan tlen kinpanos akinmej yoixpolikej. Ijkon amo nanmoyolkokoskej ken moyolkokouaj akinmej amitlaj kichiaj.
14 Tla tikneltokaj Jesús oixpoliuik uan okiyolitijkej, noijki tikneltokaj toTajtsin Dios kinyolitis akinmej okatkaj idiscípulos Jesús para mayetokan iuan Jesús.
15 Axkan timechiluiaj tlen kijtoua Jehová: akinmej tiyoltoskej uan timakisaskej ijkuak toTeko yinikan yetos amo tikinyekanaskej akinmej yoixpolikej,
16 porque toTeko ualtemos itech iluikak. Ye chikauak tlajtos ken arcángel, kipixtos itrompeta toTajtsin Dios uan achto kinyolitiskej idiscípulos tlen yoixpolikej.
17 Satepan akinmej tiyoltoskej uan timakisaskej inuan tiaskej tlakpak itech mixtli. Ompa timonamikiskej iuan toTeko ipan ejekatl. Ijkon nochipa tiyetoskej iuan toTeko.
18 Ikinon nochipa ximosepanyolchikauakan ika ninmej tlajtolmej.
Notas
^ Ika griego moijtoua pornéia. Xikita diccionario kanin kijtoua auilnemi.
