Amo tiyoltoskiaj tla amo techtlauiliskia tonaltsin. Tonaltsin kichiua ma moskalti kuajyo, xochitl, tlakilotl uan ma ixua nochi xiuitl. Tonaltsin kichiua ineluayo kuajyo ma kichichina atl uan ma ajsi itech ixijyo.

ToTajtsin Dios kichiua ma kiaui uan non se tetliokolil. Ijkon tlaki nochi tlen tikkuaj. Kichiua ma kiaui, ma tlaki tlen tiktokaj, ma tikpiakan tlen tikkuaskej uan ijkon ma tiyolpakikan.

Miakej tetajmej kintemoliaj infamilia tlen kikuaskej uan tlen kimokentiskej. ITlajtol toTajtsin Dios kijtoua: “Xikinmitakah n totomeh non patlantinemih, yejwah amo tookah nion pixkah, iwa nion amitla kitlaatiah. Iwa Nomotajtsi Dios non kajki ilwikak kintlakualtia. ¡Iwa nomejwah okachi nomopati ke n totomeh!” (Mateo 6:25, 26).

“Xikitakan kenik moskaltiaj in xochimej [...]. Nej namechilwia ke nion rey Salomón [amo] semi omotlakentij ken se de yinmej xochimej maski omotlakentiaya ika itzotzol katlej okachi patíoj. Iwan tla Dios ijkón kitlakentia in xochitl, [...] ¿kenik amo ma amechtlakenti namejwan?” (Lucas 12:27, 28, Itlajtol totajtzin Dios [NHY]).

Tla toTajtsin Dios techmaka tlen tikkuaskej uan tlen tikmokentiskej, noijki techmakas okseki tlamantli tlen moneki. Pero moneki tikchiuaskej tlen kineki uan ye techpaleuis ma tikpiakan tlen tikkuaskej noso techpaleuis ma tikajsikan tekitl uan ijkon tikmokouiskej tlen techpoloua (Mateo 6:32, 33).

Ijkuak tikitaj tonaltsin, ijkuak kiaui, ijkuak tlaxochiti uan ijkuak tikinmitaj totomej, tikajsikamatij moneki tiktlasojtlaskej toTajtsin Dios. Itech okse tlamachtil tikitaskej ken toTajtsin Dios omotlapoui iuan sekimej.