Itech Roma “¡melauak otimonechikojkej iuan tokalchanejkauan!”
ITlaixpantijkauan Jehová tlen tlajtoaj tagalo okipixkej se ueyi nechikol 24 a 26 de julio 2015 ompa Roma (Italia) tlen mokaua kanaj 10,000 kilómetros itech Filipinas.
Kijtoaj itech Europa chantij kanaj 850,000 filipinos. Uan iTlaixpantijkauan Jehová yokinchijkej kanaj 60 tlanechikolmej uan okseki grupos uan kinchiuaj nechikolmej ika tlajtoli tagalo uan kintlapouiaj tlen chantij Filipinas.
Pero yikin se ueyi nechikol okipixkej ika intlajtol tlen ouejka eyi tonal. Uan 3,239 tlen ompa okatkaj oyolpakej ijkuak okimatkej tokni Mark Sanderson tlen poui itech Cuerpo Gobernante kintemakaskia saiktlami tlapoualismej itech sejse tonal.
“Oajsik itech noyolo”
¿Tlen tlajtoli okachi kajsikamatij tlaltikpaktlakamej ma kintlapouikan ika intlajtol noso ika tlajtoli tlen satepan omomachtijkej? Eva akin chanti España uan san iselti kinmiskaltia ikoneuan kijtoa: “Nikmati tepitsin inglés pero tlasojkamati nin ueyi nechikol ika tlajtoli tagalo, oajsik itech noyolo nochtin tlamachtilmej. Para yaskiaj Italia, ye uan ikoneuan okijtojkej amo nochipa yaskiaj tlakuatiuij kanin kinemakaj tlakuali san yaskiaj san se uelta itech se metstli. Eva kijtoa: “Melauak kuali tlen otikchijkej uan nochi onikajsikamatki tlen okijtojkej itech nin ueyi nechikol”.
Jasmin akin chanti Alemania, okitlajtlanki seki tonalmej kanin tekiti para yaskia ueyi nechikol. Ye kijtoa: “Ijkuak yiniaskia ueyi nechikol, onechiluijkej ayakmo uelis niaskia porque okatka miak tekitl. Onimoyolseui uan oniktlatlaujti Jehová uan onimotlapoui iuan akin onikpaleuiaya. Otikitakej ken mochiuaskia tekitl para uelis niaskia ueyi nechikol. Melauak oniyolpakik onikatka iuan tokniuan tlen inchan Filipinas”.
Miakej tlen inchan Filipinas uan chantij Europa amo san kilnamikij kanin oneskej, noijki kinmilnamikij inyolikniuan tlen oksekan ochantitoj. Nin ueyi nechikol okinpaleui ompa ma kinmitakan inyolikniuan tlen amo okatkaj iTlaixpantijkauan Jehová pero axkan kema (Mateo 12:48-50). Fabrice kijtoa: “Sapanoa oniyolpakik ijkuak onikinmitak akinmej yonikinmixmatiaya”. Ijkuak otlanki ueyi nechikol, se tokni okijtoaya: “¡Melauak otimonechikojkej iuan tokalchanejkauan!”.
Xamo noijki mitspaktis
UEJUEYIJ NECHIKOLMEJ
¿Tlen tikchiuaj ijkuak timonechikouaj itech uejueyij nechikolmej?
Sejse xiuitl tiiTlaixpantijkauan Jehová timonechikouaj eyi tonal uan ijkon tikchiuaj itech nochi tlaltikpak. Pero ¿tlen tikchiuaj ijkuak timonechikouaj? Xikita tejuatsin.