Yokinchijchijkej mil kalmej kanin monechikouaj iTlaixpantijkauan Jehová
Itech metstli agosto xiuitl 2013, iTlaixpantijkauan Jehová tlen katej itech altepetl Filipinas okichijchijkej se kali para ompa monechikoskej. Ika non kali yokinchijchijkej 1,000 uan totoka okinchijkej. Tokniuan tlen chantij Filipinas uan noijki tokniuan tlen chantij itech okseki altepemej, amo kipiaj tomin uan amo kimatij ken uelis kinchijchiuaskej kalmej para ompa monechikoskej. Miak xiuitl sekimej omonechikouayaj inkalijtik tokniuan uan oksekimej omonechikouayaj itech kaltsitsintin tlen ochijchitokaj ika bambú.
Itech 1999 Cuerpo Gobernante tlen kinyekana iTlaixpantijkauan Jehová, okichi se programa para kinchijchiuaskiaj kalmej kanin amo okipiayaj para monechikoskej porque itech miakej altepemej uan noijki Filipinas, okachi omomiaktiliayaj iTlaixpantijkauan Jehová. Non programa kinpaleuia altepemej kanin amo kipiaj tomin para kichiuaskej se kali. Tokniuan tlen chantij Filipinas tlapaleuiaj para uelis kichijchiuaskej se kali kanin monechikoskej uan oksekimej tokniuan tlen chantij itech okseki altepemej noijki kitemakaj tomin ika nochi inyolo. Noijki kintitlanij sekimej tokniuan tlen kimatij kalchijchiuaskej para ma tlapaleuitij. Itech Filipinas non programa opejki itech metstli noviembre, xiuitl 2001.
Se tokni tlen itoka Iluminado tlen yaui itech tlanechikol Marilao (Bulacan), kanin omochijchi kali número 1000, kijtoua: “Axkan kuali nikmati melauak miakej tiknimej. Miakej tokniuan oualajkej otechpaleuikoj; tlakamej, siuamej, akinmej yikipiaj miak xiuitl, telpokamej uan ichpokamej. Maski otonaya, san sekan otitekipanojkej. Ijkuak otlamiayaj tonal sapanoua otisotlauayaj pero melauak otiyolpakiayaj porque sapanoua otitekipanojkej”.
Akinmej ompa otlapaleuitoj okichijkej ika nochi inyolo uan non amo san iTlaixpantijkauan Jehová okintlajtlachialti. Se tlakatl tlen okinnemakiltiaya arena uan graba okijto: “Namejuan ken miakej nanaskamej, nochtin nantekipanouaj. Amo keman ijkon onikitaya”.
Yankuik Kali kanin monechikoaj iTlaixpantijkauan Jehová.
Kanaj chikuase semanas okitlamijkej kali. Amo ouejkajkej, ik non, iTlaixpantijkauan Jehová tlen chantij altepetl Marilao ueli otetlapouijkej ika nochi inyolo itech iTekiuajkayo toTajtsin Dios, non tlen okachi miak ipati tikchiuaskej (Mateo 24:14).
Se tokni tlen itoka Ellen, kijtoua: “Itech kali kanin otimonechikouayaj amo otiakiaj uan miakej omokauayaj kiauak. Pero nin yankuik kali okachi ueyi uan melauak kualtsin. Axkan okachi kuali timomachtiaj uan okachi techyolchikauaj nechikolmej”.