ITlaixpantijkauan Jehová amo yauij guerras porque:

1.   ToTajtsin Dios ijkon tlanauatia. Biblia okijto itekipanojkauan toTajtsin Dios “kinkopaskej inmiespadas tlen ika tlameuaskej” uan ayakmo kimatiskej moteuiskej (Isaías 2:4).

2.   Jesús ijkon tlanauatia. Jesús okinauati apóstol Pedro: “Xiktlaati moespada, porke akimeh kiwikah iespada, noiwa ika espada kinmiktiskeh” (Mateo 26:52). Ijkon Jesús okiteititi itekipanojkauan amo moneki tlateuiskej.

    Cristo noijki okijto itekipanojkauan “ayakmó de nin tlaltíkpaktli”. Ikinon yejuan amo mokajkalakiaj itech política (Juan 17:16). Noijki amo kuali makixnamikikan tlen tekiuajkej kinekij kichiuaskej, uan noijki amo kinmiluiaj oksekimej amo mamochiuakan soldados.

3.   Akinmej kichiuaj ken Cristo moneki kintlasojtlaskej oksekimej. Jesús okinmilui imachtijkauan: “Ne nomechmaka se yankuik tlanawátili: Ximosepantlasojtlakah” (Juan 13:34, 35). Akinmej melauak kichiuaj ken Cristo yetokej ken iknimej itech nochi tlaltikpak, ikinon amo keman moteuiskej iuan inmikniuan (1 Juan 3:10-12).

4.   Imachtijkauan Jesús amo oyayaj guerra. Se amochtli kijtoua “imachtijkauan Jesús amo otlapaleuiayaj itech guerras nion amo omochiuayaj soldados”, porque okimatiayaj non “amo okatka ken Jesús okinnauati, mamotlasojtlakan nochtin noijki akinmej okinkokoliayaj” (Encyclopedia of Religion and War). Uan Edward Gibbon itech iamoch Historia de la decadencia y caída del Imperio romano, okijto: “Akinmej okichiuayaj ken Cristo amo keman okinekiayaj mochiuaskej soldados [...] tla okikauayaj se tekitl tlen okachi miak ipati”.

 ITlaixpantijkauan Jehová titlapaleuiaj itech altepetl kanin tichantij uan amo keman tikchiuaskiaj itlaj para matlajyoui toaltepe. Uan noijki tikintlakaitaj tekiuajkej uan ijkon tiktlakamatij ninmej tlanauatilmej tlen katej itech Biblia.

•   “Nochteh n tlakah moneki makintlakitakah n tekiwajkeh” (Romanos 13:1).

•   “Xikmakakah n César tlan iaxka n César, iwa xikmakakah Dios tlan iaxka Dios” (Mateo 22:21).

 Ikinon tiktlakamatij tlanauatilmej, tiktlaxtlauaj impuestos uan titlapaleuiaj ika tekiuajkej para nochi kuali mayeto.